Эш күп булачак

Эш күп булачак
Шәһәребез көннән–көн яңарыш кичерә, үсә, яшәрә. Бу үзгәрешләр һәркемнең күз алдында. Быел юллар игътибар үзәгендә булды.
Халык мөрәҗәгате буенча кайбер-ләренә асфальт салынды, икенчеләренә вак таш түшәлде. Юллары каралмаган урамнарда яшәүчеләр дә шуны көтә. Шәһәрдә хәл ителергә тиешле мәсьәләләр аз түгел. Монда халыкның да ярдәме, киңәше белән булса да катнашуы кирәк. Менә шуларны күздә тотып, җәмәгатьчелекне идарә органнарына якынайту максатында территориаль җәмәгатьчелек үзидарәләре (ТҖҮ) оеша башлады.
—Арчада алар бишәү, шәһәрнең көнчыгыш, көнбатыш, үзәк, көньяк, питомник өлешләрендә булачак,—диде Арча шәһәре башкарма комитеты җитәкчесе Рафил Исмәгыйлев җәмәгатьчелек үзидарәсен оештыру җыелышында.—Территориаль җәмәгатьчелек үзидарәләре республиканың кайбер районнарында бар инде. Тик алар да эшне яңа башлап җибәрде. ТҖҮләр нәрсә белән шөгыльләнәчәк соң? Алар халык белән дәүләт арасында арадашчы ролен үтәчәк. Һәр ТҖҮгә халык арасында абруйлы җаваплы кеше сайланып куела. Әлеге җаваплы кеше халыкның моң–зарын, гозерен, мөрәҗәгатен тыңлап, җитәкчеләргә җиткерә, үз территориясендәге оешмалар белән аралаша һ.б.
Җыелышта Үзәк җәмәгатьчелек үзидарәсе җитәкчесе итеп 40 ел гомерен белем бирүгә багышлаган, җитәкче урыннарда эшләгән, хәзерге вакытта лаеклы ялдагы Илшат Гатин тәкъдим ителде.
—Татарстан Республикасы Президенты шундый инициатива белән чыгып, җитәкчеләр тарафыннан кабул итеп алынган икән, димәк, әлеге программа нигезендә алып барылган эш шәһәребез тормышын яхшыртуга уңай йогынты ясаячак. Ә без, укытучылар, һәр яңалыкның башында булырга тиеш,—ди Арчаның беренче мәктәбе директоры Эльмира Сафина.
ТҖҮнең беренче җыелышында ук халыкны күп еллардан бирле борчып килгән сораулар яңгырады.
—Арчада яңа зират булдыру өчен 16 гектар җир бүлеп бирелгән, ул үлчәнеп, казыклар да кагылган. Аны койма белән әйләндереп алырга иде,—диде Арча үзәк мәчете имам–хатыйбы Илгизәр Касыймов.—Мәчет янындагы ясый башлаган паркны да ахырына җиткерергә кирәк. Ул халык өчен менә дигән ял урыны булачак.
—Чыннан да, Илгизәр хәзрәт бик мөһим мәсьәләләр күтәрде. Парк—безнең җитешсезлек. Без ул эшне хәзердән үк башлаячакбыз. Зиратка килгәндә, быел Арча станциясе зиратын төзекләндерү эшен төгәлләргә кирәк,—диде Рафил Исмәгыйлев.
Шулай ук урамнарга асфальт түшәлү мәсьәләсе дә күтәрелде, маршрут автобусын көнбатыш өлеше аша җибәрергә кирәклеге хакында да сүз булды.
—Быелга Арча урамнарына асфальт салу, вак таш түшәү тәмамланды. Ул алдагы 3–4 ел эчендә төгәлләнер, дип уйлыйбыз. Көнбатыш өлеше аша автобус йөртү мәсьәләсе буенча да сөйләшү алып барырбыз,—дип җавап бирде шәһәр башкарма комитеты җитәкчесе.
ТҖҮнең беренче җыелышы менә шулай активлык белән үтте. Халык битараф түгел, аны шәһәрдәге бик күп проблемалар борчый. Димәк, территориаль җәмәгатьчелек үзидарәләре җитәкчеләренә эш күп булачак.
Гөлсинә ЗӘКИЕВА