Барысы да — безнең өчен

Барысы да — безнең өчен
Районда тормышка ашырылучы “Бердәм Россия” партиясенең “Чиста су”, “Татарстан чишмәләре”, “Тиз төзелүче физкультура–сәламәтләндерү комплекслары”, “Мәгарифне модернизацияләү”, “Тормыш сыйфаты (сәламәтлек)”, “Балалар бакчалары — балаларга” проектлары халык мәнфәгатьләрен, безне кайгыртып эшләнгән.
— Республика бюджетыннан ел саен районга “Чиста су” программасын тормышка ашыру өчен 10 миллион сум акча бирелә, — дип сөйли район башкарма комитетының инфраструктура үсеше секторы мөдире Илфат Рәхимов. — Быел планлаштырылган эшләр тәмамланып килә. Арчаның көнбатыш өлешенә су һәм канализация челтәре эшләнде. Арча станциясенең Айван ягындагы өч урамга, Югары Курсага, Шекәгә су кертү эш-ләре бара.
— Башня тузгач, сусыз калдык, — дип сөйли Зур Бирәзәдән Мәрхәбә Исмәгыйлева. — Узган ел сулы иттеләр. Тик менә сыйфаты начар. Анысын да хәл итсәләр, бик әйбәт булыр иде. Чәйгә, ашка йомшак суны чишмәдән алып кайтабыз.
— Авылда су кертү эшләре тәмамланып килә, — дип сөйли Югары Курсадан Фирая Усманова. —Су сыйфаты әйбәт буласы, диләр. Торбадан өйгә кергән су бик рәхәт инде ул.
Халык сәламәтлеген кайгыртып, чирне алдан ачыклау һәм дәвалау максатыннан хәзер Арча хастаханәсе поликлиникасында бушлай медицина тикшерүе (диспансерлаштыру) үткәрелә. Бу дәүләт прог-раммасы узган ел тормышка ашырыла башлады.
— Күптән табибка күренгәнем юк иде, — дип сөйли Арчадан Г. Сибгатуллина. — Быел поликлиникага ча-кырттылар. Шикәргә, холес-теринга, гемоглобинга һ.б. кан анализы алдылар, кан басымын үлчәделәр, йөрәккә кардиограмма төшерделәр, күз басымын үлчәделәр, эчке органнарга УЗИ үткәрделәр. Ә минем өчен иң мөһиме — Казаннан күчмә маммография кабинеты кайткан иде, күкрәкләрне рентгенга төшерделәр. Үзем дә белмәгәнмен, кан басымым, холестерин югары булып чыкты. Менә хәзер дәваланам.
Узган ел Түбән Оры, Өчиле авылларына фельдшер–акушерлык пунктлары эшләнде, Яңа Кенәр табиблык амбулаториясе һәм тагын ун авылда фельдшер–акушерлык пунктлары ныклап төзекләндерелде. 1942 елда төзелгән район үзәк хастаханәсе бинасын ныклап төзеклән-дерү эшләре тәмамланды. Быел шулай ук ике авылга фельдшер–акушерлык пунктын төзү һәм сигез авылның фельдшер–акушерлык пунктын ныклап төзекләндерү планлаштырыла.
— Авылда фельдшер–акушерлык пункты булу бик рәхәт, — дип сөйли Түбән Орыдан Нурания Вафина. — Авылның нәкъ уртасына матур итеп төзеп куйды-лар. Менә әле яңа гына укол ясатып кайттым. Дарулар кирәк булганда да фельдшерга гына әйтәбез, алып кайтып бирә.
Мәктәпләрне ныклап төзекләндерү, спорт мәйданчыклары эшләү, заманча техник җиһазлар белән тәэмин итү — барысы да балалар өчен. Узган ел Шушмабаш, Иске Чүриле, Лесхоз мәктәпләре ныклап төзекләндерелсә, быел Арчаның 7нче мәктәбе, Түбән Мәтәскә, Шурабаш һәм Урта Курса мәктәпләре ныклап төзекләндерелә, Арчаның 3нче мәктәбен үзгәртеп кору планлаштырыла.
— Төзекләндерү эшләре тәмамланып килә, — дип сөйли Арчаның 7нче мәктәбе җитәкчесе Альмира Гатауллина. — Мәктәпне танып булмый хәзер. Дәүләтнең “Ныклап төзекләндерү” һәм “Уңайлы мохит” программалары нигезендә мәктәпнең түбәсе, ишек, тәрәзәләре, су, канализация, ут, бүлмәләр, ашханә, бәдрәфләр — барысы да өр–яңадан төзекләндерелде. Мөмкинлекләре чикләнгән балаларга уңайлыклар тудырылды. Сөенеп туя алмыйбыз.
Узган ел Арча педагогика көллияте, Арчаның 1нче, 2нче мәктәпләре, 5нче гимназия территорияләрендә заманча спорт мәйданчыклары эшләнде. Быел Арча үзәк стадионына спорт мәйданчыгы, Яңа Кенәр лицеена мини–футбол өчен спорт мәйданчыгы һәм тагын алты мәктәптә спорт мәйданчыгы корыла.
Быел файдалануга тапшырыласы ясалма Боз сарае да яшьләр бәхетенә булачак.
ЗАГС мәгълүматларына караганда, узган ел районда 652 бала туган, бу 2012 елга караганда 26 балага күбрәк.
Районда балаларны бакчалар белән тәэмин итү мәсьәләсе хәл ителеп килә. 2011 елда Арчада заманча 140 урынлы “Бәләкәч” балалар бакчасы төзелде. Быел Арча станциясендә 260 урынлы балалар бакчасы сафка басачак.
Румия НАДРШИНА