Оныклары да горурланыр

Оныклары да горурланыр
Балалары гына түгел, оныклары да аларның башкарган эшләре белән горурланып яшәячәк. Чөнки Арчада “Арча МСО”сы егетләре төзегән биналар, йортлар бихисап: көнбатыш өлешендәге мәчет, “Бәләкәч” балалар бакчасы, педагогика көллиятенең төзекләндерелгән бинасы, Зәйнуллин, Көнбатыш һ.б. урамнардагы күпкатлы торак йортлар.
Узган ел гына да Арчаның көнбатыш өлешендә 6 күпкатлы йорт төзеп файдалануга тапшырганнар. Ходайның һәр бирмеш көне эштә алар. Бүгенге көндә Кызыл Бистәдә йорт төзү, М.Горький урамында торак йортка нигез салу белән мәшгульләр.
Оешманың горурлыгы —тырыш хез-мәткәрләре. Озак еллар эшләүче кранчы Рөстәм Сабиров, тәүлек буе юлда, “КамАЗ”ы белән ераклардан, Россиянең төрле шәһәрләреннән төзелеш материаллары ташучы Камил Гобәйдуллин, балта остасы Илшат Муллаҗанов, шомартучы–буяучы Нурия Шакирова, Гөлнара Рәкыйпова бригадалары, ташчы–монтажчы Фәнил Ахунов, Ирек Вәлиев, Илнур Гыйниятов бригадалары кебек үз эшенең остасына әверелгән намуслы, булдыклы кешеләр барында, әлбәттә, эшләр гөрли, аларга һәрвакыт таянып була.
Соңгысына аерым тукталасым килә. Чөнки ташчылар төзелеш эшенең асылын тәшкил итә. Төзүче хезмәте борынгыдан килгән мактаулы һөнәр. Хезмәтләре күп тырышлык, сабырлык бәрабәренә башкарыла торган авыр булса да, бар күңелләрен биреп эшләгәч, кыенлыклар да җиңелә. Соңгы елларда коллективка яшьләрнең килүе дә куанычлы күренеш. Димәк, яңа көч, яңа идеяләр. Яшьләрнең тырышлыгы республика күләмендә дә бәяләнә: ширкәт республикакүләм бәйгеләрдә ел да катнаша. Быел Фәнил Ахунов белән Рамил Шәйхетдинов, “Татарстан Республикасының төзүчеләр бердәмлеге” конкурсында җиңүгә ирешеп, диплом белән бүләкләнгәннәр. Егетләр икесе дә Югары Атыдан килеп эшли. 2008 елда 120нче һөнәри училищены тәмамлаганнар. Укыганда биредә практика үткән һәм үзләрен уңай яктан күрсәткән егетләрне коллективка бик теләп кабул иткәннәр. Фәнил 7 кешелек бригаданы җитәкли. Елның теләсә кайсы фасылында: яңгырмы, кар–буранмы, эссеме я бик салкынмы, иртәдән кичкә кадәр кирпеч салу, биек урыннарда эшләве рәхәт булмаса да, үз хезмәтләрен яратуларын әйтә алар. Көнгә кулларыннан 1000-1200әр кирпеч уза, көндәлек планны да 120-130 процентка үтәп баралар.
Хезмәтләренә рәхмәт ишетү — алар өчен бүләк. Ал-ялны белми эшләүче төзүчеләргә сәламәтлек, тынычлык юлдаш булсын — аларның хезмәте өчен болар иң беренче чиратта кирәк.
Розалия ЗИННӘТОВА