Кызыксынып эшләрлек

Кызыксынып эшләрлек
Әле дә хәтердә, йортның дүрт як стенасын өеп, түбә астына керткәч, бер танышыбыз: “Булдыргансыз, эшегезнең 15 проценты беткән инде”,—диде.
Бу сүзләрнең мәгънәсен соңыннан гына аңладык. Монысы баласы гына, соңыннан башлана икән әле аның төп эше. Менә шул калган 85 процент эченә керә дә инде шомартучы–буяучының хезмәте. “Арча КСМ”ы ширкәте җитәкчесе урынбасары Азат Җәлә-летдинов юкка гына очрашкан саен аларны мактап телгә алмый, ул төзелеш өлкәсендә “поты белән тоз ашаган” кеше.
—Бу оешмага килгәнемә быел 35нче ел китте. Әти вафат булганнан соң, Буа ягыннан әни туган төбәккә кайтып, Арчада төплән-гәннән бирле эшлим. Хезмәт юлымны пилорамда башлаган идем, гараж мөдире итеп куйдылар, аннан механик булдым. Хәзер күптәннән җитәкче урынбасары,—ди ул.
Әйе, чыннан да, җитәкченең уң кулы. Тәвәккәл, һәр хезмәтне җиренә җиткереп башкарырга ярата, башкалардан да шуны таләп итә, тырышканны күрә белә. Димәк, шомартучы–буяучы кызлар да мактау сүзләренә лаек.
Алар белән без Арчаның җиденче мәктәбендә очраштык. Биредә тулы көченә ныклап төзекләндерү эшләре бара. Шушы ширкәтнең тырыш, уңган егетләре һәм кызлары кулы тигән мәктәп бинасы танымаслык булып үзгәрә. Кызлар спортзалның стеналарын буйый иде.
—Кызларыбыз (алар барысы җидәү) шуның кадәр уңган. Вакыт белән исәп-ләшүне белмиләр. Иртәнге сигездән кичке алтыга кадәр аяк өстендә алар. Мәктәптә бүген өч кызыбыз эшләсә, калганнары Арча станциясендәге яңа төзелеп килүче балалар бакчасында,—ди җитәкче урынбасары.
Буяучылар белән якыннанрак танышабыз. Күбесе яшьләр. Алинә Вафина шомартучы–буяучылар династиясеннән. Әтисе Илгиз, әнисе Зөлфиягә ияреп шабашкага йөргән. “Арча КСМ”ына да чакыргала-ганнар үзләрен. Берсен-дә Алинәгә оешмада бөтенләйгә эшкә калырга тәкъдим ясаганнар. Аңа да ике ел үтеп киткән инде.
Әнисә Җәләева — Күкчә Бирәзәдән. Башта мәктәптә техничка булып йөргән, бирегә килгәч, тиз арада шомартырга, буярга өйрәнгән. Килене Ләйлә белән бергә эшли.
—Алсу Мөхәммәдиева белән Рәсимә Габдуллаҗанованың безнең оешмага килгәненә 15 ел ти-рәсе бардыр,—ди Азат Җәләлетдинов.—Алар тәмам остарып бетте. Тырыш хезмәтләре өчен бирелгән мактау кәгазь-ләре генә дә утызлап бардыр инде кызларның. Алсу Казан педагогика–төзелеш көллиятендә белем алган. Эш стажы күпкә ким булуга карамастан, Гөлүсә Шакирова да алардан калышмый.
Ә менә Айсылу Мангуткина өчен мәктәп —беренче объект. Корайван кызы, Айван килене ул. Җиденче балалар бакчасында пешекче булган, аннан соң шомарту–буяу эшен башкарырга теләк белдергән. Эшче көчләр иң кирәк чорда аны дүрт кул белән алырга риза булганнар.
—Миңа өйрәнеп торырга да туры килмәде,—ди Айсылу.—Балалар бакчасына килгәнче бер оешмада 10 елдан артык шомартучы–буяучы хезмәтен башкарган идем.
—Кызларның хезмәт хаклары яхшы,—ди җи-тәкче урынбасары.—25 мең сум чыгып бара. Кулга 22–23 мең сум алалар. Кызыксынып эшләр-лек.
Гөлсинә ЗӘКИЕВА