Рәхмәт – иң зур бәя

Рәхмәт – иң зур бәя
“Энергосервис” ширкәте коллективы төзелеш һәм ныклап төзекләндерү эшләрен дә башкара. 90лап кеше шушы авыр һәм мактаулы хезмәт белән мәшгуль. Төзүчегә бәяне йорт хуҗалары бирә. Алардан әлегә рәхмәт сүзләре генә ишетелә. Иң зур бәя шушы.
— Быел барысы күп фатирлы 7 йортта эш бара, — дип сөйли “Энергосервис” ширкәте җитәкчесе Рамил Әхмәтгалиев. — Ике йортта ныклап төзекләндерү эшләрен тәмамлап киләбез. Ике сәүдә йорты төзелеше тәмамлану алдында. Шулай ук быел социаль ипотека, тузган торак, коммерция программалары нигезендә төзелүче өч йортны файдалануга тапшырабыз.
Төзүчеләр көне уңаеннан, ширкәт җитәкчесе белән яхшы эшләгән осталар турында сөйләштек. Алар турында озак сөйләп булыр иде. Сүзебез кран машинасында эшләүче Илфат Шакиров турында булыр.
Бүген Югары Оры егете Илфат Арчаның Бакча урамында төзелүче күп фатирлы йортта кранда эшли. Без килгәндә төзелештә тулы көчкә эш бара иде. 26 яшьлек Илфат коллективта ышаныч яулап өлгергән.
— Үз эшенә җитди карый торган егет, кирәк икән – “КамАЗ”га да утыра, —ди аның турында ширкәт җитәкчесе.
Безнең килүне тыныч кабул итте Илфат. Аның белән сөйләшүе җайлы булды. Кавказда кайнар нокталарда армия хезмәтен үтеп кайткан.
— Армиядә өч ел хезмәт иттем, — дип сөйли. — Командир армиядә калырга үгетләгән иде. Инженер–сапер ротасында өр–яңа кран да бирделәр. Үзем дә калырга уйлаган идем, өйдәгеләр риза булмады.
Үз эшенә җитди караган, һәрнәрсәне акыл белән кабул итә белгән яшьләр кайда да кирәк шул. Казанда 58нче һөнәр училищесында кранчы һәм шоферлыкка укый ул.
— Ничек кранчы һөнәрен сайладың? —дип сорыйм.
— Әти (Илһам) киңәш итте, — дип җавап бирде Илфат. — Ул тракторда эшләде, хәзер кортчылык белән шөгыльләнә. Әни (Гөлфинә) — укытучы, хәзер пенсиядә.
Гаиләдә өч бала алар. Олысы Илфат. Ике бүлмәле фатир сатып алган.
— Безнең оешма әйбәт, төзелеш материалларына өзеклек юк, кышын да эш туктап тормый, — ди ул.
Быел гыйнварда гына өйләнгән Илфатка гаилә бәхете, эшендә уңышлар юлдаш булсын.
Барлык “Энергосервис” ширкәте төзүчеләрен һөнәри бәйрәмнәре белән котлыйбыз! Аларга сәла-мәтлек, бәхет–сөенечләр һәм үзләре төзегән, төзекләндергән йорт хуҗаларыннан бары тик рәхмәт сүзләре генә ишетүләрен телибез.
Румия
НАДРШИНА