Бүген аларда Сабантуй

Бүген аларда Сабантуй
Балаларның җәйге каникул вакытында район мәчетләре каршында мөселман лагерьлары эшләде. Арча станциясе мәчете каршында оештырылган мөселман лагерена барысы 48 бала йөрде. Тәрбиячеләре һәм укытучылары Рая Фәтхуллина белән Дамир Галиев булды.
— Матди яктан мөмкинлек булмау сәбәпле, лагерь ике ел эш-ләмәде, —дип сөйли районда дини гыйлем бирү буенча уку–укыту эшләре мөдире Рая Фәтхуллина. — Быел иганәчеләр ярдәме белән балаларның мөселман лагерен оештыра алдык.
Арча районы мөхтәсибе Раил хәзрәт тә килгән иде. Ул болай дип сөйләде:
— Шушы мөселман лагеренда сез үзегезгә киләчәк тормышыгызны яктыртып торучы фонарь, ут алдыгыз. Ислам дине буенча дөрес итеп яшәргә тырышыгыз.
Арча станциясендәге мөселман лагереның эше милли бәйрәмебез Сабантуй белән тәмамланды. Сабантуйны имам Хәлил хәзрәт Коръән сүрәләре укып башлады. Мәчет коймаларына эленгән шарлар әллә каян үзенә дәшеп тора. Балаларның шат авазы бәй- рәмгә тагын да күңеллелек төсмерләре өсти. Бәйрәмдә теләге булган һәркем катнаша ала. Мөгаллимә Әлфия Рәхимова җи-тәкчелегендәге жюри уеннарга бәя биреп, бүләкләр өләште. Койма буендагы өстәлләргә шешәләр белән су, пешкән йомыркалар куелган иде. Бар да бушлай. Уйнап аргач, аларны балалар сыпыртты гына. Ә уеннарның ниндиләре генә юк иде.
Балаларның ничек бер–берсен уздыра–уздыра капчык киеп йөгерүе, аркан тартышуы, туп уйнавы, боҗра әйләндерүе турында сөйләп тормыйм. Ә менә шул уеннарны оештыручы 70 яшьтән узган педагог Рая Фәтхуллинаның һаман да балаларга белем, тәрбия бирү юнәлешендә эшләве сокланырлык. Сабантуен карарга килгән тамашачы да:
— Күрче, Рая апаны, ничек очып йөри, — дип тел шартлатты.
Мин аның Арча элеваторы балалар бакчасында әкият геройлары булып уйнаганын күреп хәйраннар калган идем. Пенсиягә чыккач та өендә дүрт дивар арасына биклән-ми ул. Рая ханым Мөхәммәдия мәдрәсәсен тәмамлый, мәдрә-сәдә башкаларга гыйлем бирә, дини эчтәлектәге төрле чаралар оештыра. Бүген дә ул кызлар шикелле очынып, көч–куәт биреп балаларны ярыштырды. Алар белән бала була белде.
—Үтә хәрәкәтчән кеше мин, — ди үзе дә. — Өйдә дә кызым Флера, әни, кая йөгерәсең, дип аптырый.
— Арча мәдрәсәсендә белем алдым, — дип сөйли Арча станция-сендә яшәүче Наилә Хәкимова. — Рая апа Фәтхуллина укытты. Шулкадәр аңлаешлы итеп дини белем бирде ул. Быел шаһәдәтнамә алдым. Дин юлына басуның шулкадәр файдасы зур. Җанга рәхәт. Тынычлык кичерәсең. Начар гадәтләрдән тыеласың. Оныкларым Дияз белән Инсаф та быел мөселман лагерена йөрде.
Әнә, үзләре дә, Дияз белән Инсаф.
— Миңа 10 яшь, — дип сөйли Дияз. — Мин лагерьда яңа сүзләр, исәнләшергә, ашар алдыннан бисмилла әйтергә, догалар өйрәндем. Иртәбез физкультура ясаудан башланды. Төрле кызыклы уеннар уйнадык. Намаз хәрәкәтләрен үзләштердек.
Дияз “Фатиха”, “Әл–Ихләс” сүрәләрен яттан сөйләп күрсәтте.
Румия НАДРШИНА