Агитбригадалар юлда

Агитбригадалар юлда
Халыкта еш кулланыла торган, “Икмәк булса, җыр да була” гыйбарәсе хак әйтелгән. Район буйлап йөрүче агитбригадаларның үзешчән сәнгать осталары ашлык суктыручылар, аны эшкәртүчеләргә багышлап дәртле җырларын бүләк иткән минутларда тамашачы булсаң, бу сүзләргә тагын бер инанасың.
Иске Чүриле ындыр табагында кызу эш кайный. Ашлык эшкәртү машиналары гөрелтесеннән ындыр табагы шаулап тора. Әледән–әле комбайннардан ашлык алып кайтучы “КамАЗ”лар гәрәбәдәй бөртекләр-не тиз генә бушата да, тагын кырга ашыга. Тау–тау өелгән икмәк көшелләрен апа–кызлар чистарту машиналарында чүптән арындыра.
Шулай кызып эшләгәндә ындыр табагына кунаклар килеп төште. Район мәдәният бүлеге шоферы Харис Гакашин район Мәдәният йортының үзешчән сәнгать осталарын авыл хезмәтчәннәрен ял иттерергә алып килгән.
Рафис Сәлахетдинов, Расих Галимҗанов, Арча педагогика көллияте студенты Рамилә Сабирҗанова, баянчы Рәдис Харисов, тавыш операторы Илфат Шаһисламов хезмәтчәннәргә концерт куйды. Сәхнә дә, махсус тамашачы кәнәфие дә кирәк түгел, җыр тыңлау өчен гадәти шартлар да комачауламый. Көшел өстенә утырып җыр тыңлавы үзе бер күңелле мизгел.
— Агитбригадаларның килүен хезмәтчәннәр көтеп ала. Башка елларда да кыр эшләре вакытында берничә тапкыр киләләр,— ди ындыр табагы мөдире Резидә Сафиуллина. — Әле кичә генә кайчан килерләр икән, дип сөйләшкән идек. Авыр хезмәттән соң бераз ял да итәсе килә. Агитбригада әгъзаларына зур рәхмәт.
Резидә апа үзе дә мәдәният кешесе булгач (ул Ашабаш клубы мөдире, ел саен урып–җыю чорында ширкәткә булыша), җыр–моңның кешегә ничек тәэсир итүен, күңелгә рухи көч бирүен яхшы аңлый.
Агитбригада әгъзалары шактый еллар хезмәт ияләрен ял иттерсә, заманында үзләре дә кайсы комбайнчы ярдәмчесе, кайсы ындыр табагында эшләгән, урып–җыюны нинди кыенлыкларны җиңеп, тырышлыклар белән башкарылганын белә. Икмәк үстерүчеләргә, аны түкми–чәчми җыеп алучыларга, вакытында бөртеген дә югалтмый амбарларга урнаштыручыларга аз булса да күңелле мизгелләр бүләк итәләр.
Бу атнада агитбригадаларның чыгышын Сеҗе, Наласа, Урта Курса, Яңа Кырлай авыл җирлекләрендә хезмәт куючы авыл хуҗалыгы хезмәт-чәннәре дә күрә алачак.
Розалия ЗИННӘТОВА