Хәерле яллар телим

Хәерле яллар телим
Әңгәмәдәшебез— район үзәк хастаханәсе баш табибының эпидемиология мәсьәләләре буенча урынбасары Миләүшә Сафиуллина.
— Миләүшә Хәбибрахмановна, редакциягә Эбола геморрагик бизгәк чире турында сөйләвебезне сорап шалтыраталар. Бу чир турында телевидение хәбәрләр әйтеп тора. Газета укучыларыбызга тулырак мәгълүмат бирсәгез иде.
— Эбола геморрагик бизгәк — куркыныч йогышлы чир. Үлем белән тәмамлану очрагы 90 процент тәшкил итә. Эбола — бик аз өйрәнелгән вирус. Әлегә аңа дәва һәм вакцина юк. Шулай да медицинада, авыруны төрле юнәлештә дәвалап, чирне жиңү очраклары бар. Әлбәттә, кешенең иммунитеты нык булуы әһәмиятле. Эболага каршы көрәшүче вакцина эшләү юнәлешендә уңышка ирешеп киләләр.
— Эбола вирусы кайчан билгеле булды? Исеме каян килеп чыккан?
— Эбола вирусы беренче тапкыр 1976 елда Конго республикасында Заирда Эбола елгасы янында ачыклана. Вируска елга исеме бирелә. Аның төрле кимерүчеләрдән һәм маймыллардан килеп чыгу ихтималын әйтәләр.
— Быел Эбола вирусы кайсы илләрдә теркәлде?
— Көнбатыш Африканың Гвинея, Либерия, Сьерра–Леоне ил-ләрендә Эбола бизгәге эпидемиясе күзәтелә. Африкада булып кайтучылар арасында Америка, Англия, Германия, Канада илләрендә дә Эбола вирусын йоктыручылар бар. Африка илләренә чыгудан тыелып торырга кирәк. Хәер, эпидемия вакытында бу илләргә кертмиләр һәм чыгармыйлар да.
—Эбола бизгәге билгеләрен әйтеп үтсәгез иде.
— Авыруның бик нык хәле китә, каты итеп башы, тәне, эче авырта башлый, эче китә, ангина барлыкка килә. Соңрак коры ютәл күзәтелә, күкрәк читлеге чәнчи башлый. Температура 39–40 градуска күтәрелә. Борыннан, аңкаулардан, колак, күзләрдән кан килә.
— Россиядә бу чирне йоктыручылар бармы?
— “Роспотребнадзор” мәгълүматларына караганда, Россиягә Эбола бизгәге янамый. Илнең барлык аэропортларында да Эбола чире котырган Африка илләре рейсларына карата мониторинг үткәрелә, ягъни, бу илләрдән самолетлар кертелми һәм аларга чыгарылмый. Шуңа күрә безнең илгә Эбола вирусы куркынычы янамый.
— Миләүшә Хәбибрахмановна, хәзер күпләр чит илләрдә диңгез, океан буенда ял итүне кулайрак күрә. Үзләре белән яшь балаларны да алалар. Сәяхәткә жыенучыларга сез нинди киңәш бирер идегез.
— Соңгы елларда төрле йогышлы чирләр баш калкыта башлады. Климаты эссе чит илләргә барып–кайтулар күбәйде. Сәяхәткә бару өчен сайлаган илне төрле йогышлы чирләргә карата башта өйрәнергә, табиб белән киңәшергә кирәк. Хәзер төрле йогышлы чирләрдән саклану өчен вакциналар, профилактика препаратлары бар. Мәсәлән, малярия чиреннән махсус профилактика препаратлары кабул итәргә мөмкин. Балаларны иммунитеты ныгып җиткәч кенә, 5 яшьтән сәяхәткә алып чыгарга киңәш итәр идем. Әгәр дә бала белән сәяхәткә җыенасың икән, һичшиксез, участок балалар табибына күренергә, аның киңәшләрен тыңларга кирәк. Балаларның һәм үз сәламәтлегебезгә игътибарлы булсак иде. Сәяхәткә җыенучыларга хәерле яллар телим.
Румия НАДРШИНА