Алдан көйләгәннең эше бара

Алдан көйләгәннең эше бара
Урып–җыю алдыннан комбайннарның әзерлеген кабул итү вакытында әйбәт бәя алган хуҗалыклар уракта да алдагылар рәтендә.
“Северный” ширкәтендә быел да җаваплылык тоеп, бердәм эшлиләр. Комбайннар арыш теземнәрен суктыра. “КамАЗ” машинасы белән бункерлар тулганны көтеп торучы Дамир Мифтахов белән сөйләшәбез.
— Берьюлы биш бункерның ашлыгын алам, — ди ул. — Ике мең центнер ташыдым инде.
Шекә, Носыдагы ындыр табакларында кайткан ашлыкны эшкәртеп, киптереп, урнаштырып баралар.
Дамирның абыйсы Мид-хәт Мифтахов хуҗалыкның алдынгы комбайнчысы, һәр елны бүләкләр алып тора.
Арышның гектарыннан 40ар центнер уңыш биргән басулар булган. Рулоннар белән тулы басулар да уңышның ниндилеген күрсәтә. Рулоннарны фермалар янына ташып, эскертләргә өяләр.
“Ватан” ширкәтендә дә арыш урагы тәмамланып килә. 150 гектардагы борчакны әйбәт срокларда, югалтуларсыз суктырып алдылар. Бу культура гектардан 26,6 центнер чыкты.
Әлеге ике хуҗалыкта да 45 процент мәйдандагы игеннәр суктырылды. Чәчү өчен җир әзер-ләнгән, башка эшләрдә дә тоткарлык юк.
14 августка район хуҗалыкларында 38 процент мәйдандагы игеннәр җыйнап алынды. Иң югары күрсәткеч “Татарстан”да — 63 процент. 13 августта 1487 гектардагы игеннәр суктырылды. “Мәрҗани” ширкәтендә — 379, “Игенче”дә — 330, “Северный”да — 176, “Ватан”да 150 гектар. “Сафиуллин”, “Шиһабеддинов” хуҗалыкларында 10ар гектар гына.
Район буенча бер гектардан уртача уңыш — 23,5 центнер. “Ак барс” агрокомплексы”нда — 40,3, “Кырлай”да 30,7 центнер алалар. “Арча” ширкәтендә — 13, “Мәрҗани”дә 13,3 центнер.
“Арча” ширкәте быел яңа сортларга игътибарны арт-тырды. 100 гектардагы борчакның уртача уңышы 22,7 центнер булды.
“Акчишмә”, “Арча”, “Мәрҗани”, “Игенче”, “Нива” ширкәтләрендә көзге чәчү өчен җир әзерләнеп бетмәгән.
“Ак барс” агрокомплексы” ширкәтендә — 1000, “Игенче”дә 928 гектарда туфракны төп эшкәртү үткәрелде.
“Ватан”, “Игенче” ширкәт-ләре сабан культураларын орлыкка сала башлады.
Ильяс ФӘТТАХОВ