Шәһәр үсә торган якта

Шәһәр үсә торган якта
14 августта Арча шәһәренең көньяк өлешендәге күп функцияле мәдәни–спорт үзәгендә гражданнар җыены булды. Аны шәһәр башкарма комитеты җитәкчесе Рафил Исмәгыйлев ачты.
Җыенда шушы төбәктә яшәүчеләрне борчыган мәсьәләләр турында сөйләшү булды. Шәһәрнең бу өлеше соңгы елларда нык үсте, халык саны арту ягында. Гамәлдәге республика программалары ярдәмендә әлеге төбәктә дә матур үзгәрешләр бара. Шуларның берсе — күп функцияле мәдәни–спорт үзәге. Быел шулай ук 260 урынлы балалар бакчасы сафка басачак.
Әлеге җыенда катнашкан бишенче чакырылыш Татарстан Республикасы Дәүләт Советына депутатлыкка кандидатлар Рөстәм Сабиров һәм Ринат Закиров республикада эшли торган башка программалар турында да сөйләделәр. Ринат Закиров соңгы биш елда Арча районына 2,5 млрд. сум акча бирелүен, моның район үсешендә зур өлеш булуын әйтте.
Муниципаль район башлыгы Алмас Назиров ТР Дәүләт Советына депутатлыкка кандидатлар катнашында үткән җыенның бик дәрәҗәле булуын билгеләп үтте.
— Республика программаларының 12се безнең районда да гамәлдә, — диде ул. — Алар кысаларында башкарыла торган эшләрдә финанс проблемасы юк. Бары тик кыска срокта, югары сыйфатлы итеп үтәргә генә кирәк.
Соңгы елларда районыбызда республика җитәкчелеге күрсәткән кайгыртучанлык нәтиҗәсендә матур эшләр башкарыла. Төзелешләр киң колач белән алып барыла. Без моны шәһәрнең көньяк өлешендә дә ачык күрәбез. Айван авылында яңа медпункт сафка баса, спорт мәйданчыгы төзелә, урта мәктәп ныклап төзекләндерелде. Шәһәр тарихындагы иң зур балалар бакчасы да биредә булачак. Киләчәктә “Алма бакчасы” дип аталган микрорайон барлыкка киләчәк. Су белән тәэмин итүне яхшырту чаралары күрелә.
Быел шәһәрдә 18 урам рәткә китерелде, районда юлларны төзекләндерү дәвам итәчәк.
Үзара аңлашу шартларында узган җыенда сорау-ларга да тулы җавап бирелде.
Ильяс ФӘТТАХОВ