Уңыш туфрак эшкәртүдән башлана

Уңыш туфрак эшкәртүдән башлана
Табигатьтә төсләр үзгәргән чак. “Курса МТСы” ширкәте җитәкчесе Рәүф Гыйлаҗетдинов белән әле кайчан гына баш чыгарып килгән арпа, бодай, солы басуларына сокланып, “Исән–имин җыеп алырга язсын!” — дип теләп йөргән идек. Менә тагын шул юллар буенча үтәбез.
— Арпаны бер басуда суктырдык,— ди җитәкче. — Гектардан 37 центнердан артык чыкты.
Әле сугылмаган басулардагы арпа да дәү башакларын көчкә күтәреп утыра. Язгы бодай җиңел машинадан биек. Солы да “Без дә өлгердек”, — дигәндәй, диңгездәй чайкалып утыра. “Узган ел бик көчле корылыкка эләкте бу басулар, — ди Р.Гыйлаҗетдинов. — Гектардан 3 центнер гына чыккан иде”.
Быелгы уңышны җыеп алырга гына язсын. Хуҗалык механизаторлары ышанычлы. Комбайнчылар Фәрит Гайнетдинов, Радик Хәбибуллин, аталы–уллы Әхәт һәм Рәмис Шәрәфиевләр, тракторчылар Таһир һәм Мөдәрис Гыйбадуллиннар, Мансур Хуҗиәхмәтов һ.б. турында мактау сүзләре генә әйтә җитәкче.
— Таһир Гыйбадуллин, Мансур Хуҗиәхмәтов “Т–150” тракторлары белән бөтен җирне эшкәртеп чыга, — ди ул.
Көзге җир эшкәртүне монда сукалау дип аңлыйлар. Бер елны сукаларга каршы сугыш ачып алдылар бит әле. Аны уйлап табучы кешелек тарихында булган сугышлар китергән зыянга караганда да күбрәк зыян китергән, имеш. Бездә һәрвакыт дошман эзләргә яраталар. Күпләр сукаларны утильгә үк озаткан, диләр.
Сука артыннан күпереп калган басуларга карап торуы ук рәхәт! Ничә еллар өстән генә эшкәртелгән басуларны чүп басты, аскы катлам таш булып катты. Яуган яңгырлар да аска сеңә алмый, дым тиз арада парга очып бетә. Ә сукалаган җирләр бар дымны үзендә саклый.
“Ак барс” агрокомплексы” шир-кәтендә дә бетермәделәр суканы. Басуларда чит ил техникасы да, үзебезнең “ДТ”лар да рәхәтләнеп эшләп йөри.
19 августка районда игеннәрнең яртысы җыйнап алынды. “Татарстан” ширкәтендә — 69 процент. Бу хуҗалык беренче көннәрдән алган темпны югалтмый. “Игенче”, “Ватан”, “Аю”, “Курса МТСы”, “Северный”, “Кырлай”, “Аю”, “Ак барс” агрокомплексы” ширкәтләрендә урак өсте зур оешканлык белән бара.
Район буенча бер гектардан уртача уңыш — 23,4 центнер, “Игенче”дә — 40, “Ак барс” агрокомплексы”, “Кырлай”, “Курса МТСы”нда 30 центнердан артык.
“Арча”, “Мәрҗани” ширкәтләрендә 12–13,4 центнер чыга.
Арыштан иң югары уңыш “Ак барс” агрокомплексы”нда алынды — 40,3 центнер. Көзге бодай “Ак барс” агрокомплексы”нда — 41, “Игенче”дә — 40,8, борчак “Ак барс” агрокомплексы”нда — 32, арпа — 41,1, солы “Игенче”дә 40,3 центнер уңыш бирде.
“Мәрҗани” ширкәте — 879, “Курса МТСы” — 395, “Ак барс” агрокомплексы” 255 гектарда арыш чәчте.
“Ак барс” агрокомплексы” — 1480, “Игенче” — 1269, “Татарстан” шир-кәте 1226 гектарда туфракны төп эшкәртү үткәрде.
“Арча”, “Татарстан”, “Ватан”, “Игенче” ширкәтләре 200–120 тонна сабан орлыклары салды.
Ильяс СӘХӘПОВ