Өметләр бирегә алып килә

Өметләр бирегә алып килә
“Өмет чаткысы” балалар тернәкләндерү үзәгендә “Йөрәктән–йөрәккә” район хәйрия фонды вәкилләре кунак булды. Үзәк тарафыннан районыбызның мәрхәмәтле кешеләре — “Арча КСМ”ы җитәкчесе Рафаэль Муллагалиевка, шәхси эшмәкәр Лилия Гарәфиевага, район инвалидлар җәмгыяте рәисе Альберт Җамалиевка рәхмәт хатлары тапшырылды.
Тантанада катнашучы район башлыгы урынбасары Любовь Осинага балалар ясаган картина бүләк иттеләр, алар тарафыннан яңгыраган җыр–биюләр дә мәрхәмәтле абый–апалары өчен булды. Булат Гатауллинның җырлавын, Аделина Шакированың инвалидлар арбасында чегән биюен башкаруын, балаларның кул хәрәкәте белән төрле музыкаль авазлар чыгара торган инструментта уйнавын тыңлап һәм үзләре дә уйнап караганнан соң, өлкәннәр үзәктәге балалар шөгыльләнү өчен махсуслашкан бүлмәләргә юнәлде.
Тернәкләндерү үзәге эшли башлаганга быел 15 ел. Шул вакыт эчендә үзәктә никадәр балага сәламәтлек шөгыльләре үткәрелмәгәндер дә, күңелләрендә киләчәккә өмет чаткысы кабынмагандыр! Биредә чын күңелдән изгелек теләүче олы йөрәкле кешеләр генә эшли ала, балаларның һәр көнен бәйрәмчә матур мизгелләр белән тулыландырырга тырышалар, һәр хезмәткәрнең йөзендә ихлас кайгырту, ярату хисләре сизелә. Хезмәт һәм музыкаль белем бирү, бию дәресләреннән тыш, кызларны тегү, чигү, бәйләү, бисер белән чигү серләренә төшендерәләр. Сәләте булганнар сувенирлар ясый, картиналарга сүрәтләр төшерә. Ул хезмәтләр аерым бер бүлмәдә урын алган. Тагын бер бүлмәгә махсус шөгыльләнү өчен тренажер урнаштырылган. Гросс тренажеры хәрәкәтләнүе авыр, йөри алмаучы балалар өчен эшләнгән, балаларның мускулларын язып, хәрәкәтләрен яхшы якка үзгәртергә ярдәм итә. Әлеге тренажер һәм киеп куйгач әкият геройларына әйләнә торган курчак киемнәре – фонд бүләге, ә музыкаль авазлар чыгара торган инструмент һәм йорт кошлары – район инвалидлар җәмгыятеннән. Бу бүләкләр ТР Министрлар Кабинеты оештырган социаль проектлар конкурсында “Тренажер Гросс” һәм “Тылсымлы нур” проектлары белән катнашып откан грант акчасына алынган. Бу урында үзәк белән кулга–кул тотышып эшләүче “Йөрәктән–йөрәккә” хәйрия фонды турында әйтеп китми булмый.
Фондның эшчәнлеге турында район хәйрия фонды рәисе Альберт Җамалиев түбәндәгеләрне сөйләде:
— “Йөрәктән–йөрәккә” хәйрия фонды 2007 елда район хакимияте тырышлыгы белән оешты һәм еллар дәвамында үз эшчәнлеген аклады. Фонд тарафыннан ел саен авыр хәлле гаиләләргә, матди хәле авыр булган өлкәннәргә ярдәм күрсәтелә. Шулай ук фонд хисабыннан ветераннар өчен Казаннан концертлар, спектакльләр чакырыла. Фондка акча күчерүче оешма җитәкчеләренә, һәммә кешегә ихлас рәхмәтемне җиткерәсем килә. Тернәкләндерү үзәгенә килгәндә, без, нигездә, үзәк җитәкчелеге белән бергәләп грант оту өчен документлар әзерләп юллыйбыз. Киләчәктә дә грантларны алу өчен тырышачакбыз. Мөмкинлек булганда төрле юллар белән үзәккә ярдәм итәргә тырышабыз. Фондның Попечительләр советы рәисе Алмас Назиров та безнең мөрәҗәгатьләргә каршы килми, тернәкләндерү үзәге белән бергә алып бара торган эшебезне хуплый һәм ярдәм итә.
Башка проектларга әйләнеп кайтсак, берсе “Курчаклар өйдә дәвалый” — мөмкинлекләре чикләнү сәбәпле, тернәк-ләндерү үзәгенә йөри алмаган балалар өчен. “Аларның өйләренә барып кечкенә генә спектакль сыман тамашалар күрсәтәбез, — ди социаль педагог Ләйлә Нуриәхмәтова. — Моңа балалар шулкадәр шатлана! Мондый тамашалар аларга шатлык кына өстәп калмый, яшәү рухын да арттыра. Чөнки алар театрларга йөри алмый, ә монда курчаклар өйгә килә!
Ишегалдындагы зур бер урынны читлек белән әйләндереп алганнар, эчтә инде шактый үскән чебиләр җим чүпли. Балаларның тәрбияче апалары белән үзләре карап үстергән хезмәте икән. Чебиләрне “Безнең нәни дусларыбыз” проекты белән җиңеп чыкканнан соң булдырганнар. “Язын бакчага керамик сыннардан (анда тавык, чеби сыннары да бар) мәйданчык ясап куйдык, балалар үзләре дә булышты. Шул чакта кайберләренең тере тавык күргәне булмавы да ачыкланды. Менә шушы почмакны булдырырга уйладык. Ашатырга, җыештырырга булышу, чеби-ләрнең үсүен күзәтү балаларга әйтеп бетергесез шатлык бирә. Бу балалар күңелендә кош–кортка, хайваннарга мәхәббәт тәрбияләү өчен эшләнде”, — ди үзәк директоры Наилә Сәмиева. Киләсе елга куяннар үрчетү ниятләре дә бар икән.
Тәкъдиреңә язылганны күрми хәлең юк. Әмма янәшәңдә шундый мәрхәмәтле, күңел халәтеңне аңларга тырышучылар барында авырлыклар да җиңелрәк кичерелә, иң мөһиме — рухи көч барлыкка килә.
Розалия ЗИННӘТОВА