Ганиуллиналар бер сәхнәдә

Ганиуллиналар бер сәхнәдә
Дистә еллар элек Шушмабашта бер гаилә яшәде. Биш бертуган кыз һәм әниләре икешәр сәгатьлек концерт куярга сәләтле иде. Аларның концертын авыл тамашачыларыннан тыш, арчалыларга да бер генә карау насыйп булмады. Иде дип әйтүем үткән заманга ишарәләвем. Алар бүген дә исән–сау, шөкер, бар куәтләренә иҗат итә.
Хәзер аларны мәркәзебез сәхнәләрендә, телеэкраннарда күреп, радиотапшырулардан тыңлап сөе-нәбез. Чөнки алар — безнеке! Арча җиреннән канат чыгарып киң җиһанның сәхнә киңлекләренә очкан кошлар. Кызларының сәләтен үстерү өчен ялгыз канат булса да, бар тырышлыгын куйган даими хәбәрчебез Зөлфия Ганиуллина да, кызлар педагогика көллиятен, мәктәпне тәмамлап сәнгать казаны Казанга китеп баргач, аларга терәк булырга дип башкалага күчеп китте. Әмма районыбыз белән элемтәсен өзми, туганнарының, дусларының хәлен белергә вакыт табарга тырыша. Шушмабаштагы йорты да көтеп тора Зөлфия апаны.
Мамадыш төбәгендә дөньяга килгән кызларга әдәбият, сәнгатьнең бишеге булган Арча җиренең шифалы суын эчү булышмый калмагандыр, әлбәттә. Әнә, Рәфинә дә, “Арча җирендә үсүебез белән горурланабыз, — ди. — Арча төбәгеннән чыккан күренекле шәхесләр исемлегендә исемнәребез булу безнең өчен зур бәхет. Сәхнәгә чыкканда һәрвакыт үз районымның йөзенә кызыллык китермәскә тырышам”. Тәүге чирканчык алган җир күңел түрендә матур истәлекләре белән яши.
4 сентябрьдә биш бертуган кыз балачак, үсмер еллар эзен саклаган район Мәдәният йорты сәхнәсенә кабат аяк басачак. Аларның әле һәммәсе бергә җыелып гаилә концертын тамашачыга тәкъдим ит-кәне булмаган. Тәүге башлангычны үзләренә газиз, әниләренең кендек каны тамган Арча җире фатыйхасы белән башлап, республика һәм Башкортстан районнары буйлап дәвам ит-мәкче булалар. “Сценарийның авторлары Илфак Шиһапов белән Шәмсия Җиһангирова, димәк, урындыктан егылып төшәрлек юмор да, үзәкне өзә торган лирика да булачак”, — ди продюсерлары.
Кызлы йорт. Концертның асылы да нәкъ менә кызлар яшәгән йортның яшәешен, балаларын ялгыз үстергән ананың авырлыклар алдында баш имәвенә нигезләнгән.
—Программа асылында гаиләбез язмышы ята, — ди эстрадада үз тамашачысын тапкан өлкән кыз Рәфинә Ганиуллина. — Әти исән булса да, әни 20 ел буе безне ялгызы үстерде. Концертыбызның максаты — тормыш дулкыннарын ярып, авырлыклар алдында тез чүкмичә яшәгән татар хатынына мәдхия, караңгылыктан чыгу юлы бар дигән идеяне ачып бирү. Әниебез безнең янда сәхнәдә булачак.
Әниләренең тырышлыгы күз алдында — кызларның сәхнәдә һәрберсенең үз урыны бар: Рәфинәсе —җырчы, Резедәсе— җырлый да, бии дә (аның еланнар белән биюен “тәлинкәләр” аша бөтен дөнья күрә хәзер), Люциясе, Гөлсуы— биюче, Илсөя-се эстрадада Аиша буларак танылды, үзенчәлекле җырлар башкаручы кызның да хәзер үз тамашачысы. Күптән түгел Зөлфия апа өчен тагын бер куанычлы вакыйга булды — Рәфинәсе музыкант, Башкортстан егете белән гаилә корып җибәрде. 4 сентябрьдә Арча халкы аны да күрә алачак.
Якташларыбыз тарафыннан яуланган уңышлар әледән–әле ишетелеп, куандырып тора. “Син кайсы яктан?” — дип сораучыларга алар да “Арчадан!” — дип горурланып җавап бирә. Республика буйлап таралган якташларыбыз хезмәтләре белән район данын еракларга таратып яшәсә, без аларны биредә һәрвакыт күрсәтерлек матур эш–гамәлләребез белән каршы алырга язсын.
Розалия ЗИННӘТОВА