Бәхет сере

Бәхет сере
Арчада яшәүче Гүзәл һәм Рөстәм Фәйзрахмановлар гаиләсе 27 август көнне Татарстан Республикасы Президенты Рөстәм Миңнеханов һәм аның җәмәгате Гөлсинә ханым белән очрашуга барачак.
Мәхәббәт дигән тылсымлы сер 15 ел элек аларның чәчләрен чәчкә бәйли дә, бәхет тулы гаиләгә нигез сала. Бәхетле гаиләнең олы куанычлары булып өч ир бала үсеп килә. Рөстәмнең аларга үзенчә мәхәббәте: “Азаматым — күңелем, Тимерханым — йөрәгем, Рамзаным — тәмлем”,— дип сөя ул нәсел дәвамчыларын.
Фәйзрахмановлар гаиләсендә әти дәрәҗәсе мөһим урын тота. Әти сүзе — балалар өчен закон. Ир балаларны тәрбияләүнең иң яхшы ысулы. Үзе үскән йорт-тагы яшәешне күреп, Гүзәл бу хакыйкатьне балачактан күңеленә сеңдерә. Шуңа улларының һәр адымын үзенчә бәяләсә дә, соңгы сүзен әтиләренә калдыра: “Әтиегезгә ошар микән?” Малайлар, әлбәттә, әтиләрен ачуландырмас өчен тәртипле булырга тырыша да, ләкин һәрвакыт килеп чыкмый. Таңнан төнгә кадәр эшләүче әтинең кайтуын зарыгып көтеп ала малайлар. Ә арып кайткан әтинең кәефен кыру егетләргә килешә торган эш түгел. Әтиләре болай да алар өчен вакыт табып яннарында булырга, назларга да, тиргәргә дә, эшкә өйрәтергә дә тырыша.
Гаилә башлыгы Рөстәм Казанда эшли, күпкатлы йортларга автоном ягу казаннары кую буенча оешма җитәкчесе. Төп эше өстенә хәйриячелек белән шөгыльләнергә дә җай таба. Гаилә учагының җылысын саклаучы, улларына әни назының бар кадерен биреп яшәүче Гүзәл ханым Арчаның 1нче мәктәбендә укучыларга белем серләрен чишә.
Аларның тәүге тапкыр очрашып танышуларына Казан дәүләт педагогика университетының диварлары шаһит. Тиздән дипломлы белгеч булам, дип диплом яклау көннәрен санап көткән Рөстәм беренче курста укучы Гүзәлне университет коридорында күреп ала да, күңеленең түр почмагына салып куя. Күңелендә кинәт бер уй бөреләнә егетнең: әллә гашыйк булдым инде, бу кыз минеке булмагае. Ә уйлар әкренләп бөреләнә башласамы?! Тиздән чынбарлыкка әвереләсен көт тә тор! Берникадәр вакыттан дөньяга яңа гаилә туа. Һәм ул гаилә тарихы якыннары, дуслары күз алдында әкренләп тулылана бара, үзләренә генә хас бәхет дигән сихри сукмак салына.
Гүзәл балаларында әти-ләренә карата ихтирам тәрбияләсә, Рөстәм кечкенәдән улларына “Ир кеше хатын–кызны хөрмәт итәргә тиеш. Әниегез безнең йортның алиһәсе”, — дигән фикерне сеңдереп үстерә. Гаилә бәхетенең сере нәкъ менә шундадыр да. “Йортыбыздагы уңайлылык, тынычлык өчен мин хатыныма рәхмәтле”, — ди Рөстәм.
Бәхет баскычларын һәр гаилә үзенчә төзи. Рөстәм өчен бәхетле булып яшәргә әти–әнисенең исән–сау булуы, шатлык–борчуларны бүлешүче якын дусты, яраткан хатыны Гүзәлнең янәшәсеннән баруы, Аллаһы Тәгалә биргән иң зур байлыгы — өч улының әти дип гел янында мәш килеп йөрүләре һәм якыннарының сәламәтлеге мөһим. “Бәхетле булуның сере — мәхәббәттә”, — ди Гүзәл. Шушы тылсымлы бер сүз артында никадәр мәгънә ята. Моңа бар тормыш: ирешелгән уңышлар да, ике як әти–әнигә карата хөрмәт тә, аларның тормыш рәвешен үрнәк итеп алу да, нәселдәшләр, кардәшләр белән туганлык җепләрен өзми тату булып гомер итү дә, эшләп тапкан малга шөкер кылып яши белү дә һ.б. сыя. Шушы илаһи мәгънәгә ия сүз генә санап кителгән-нәрнең барысын да авырсынмыйча башкарырга сәләтле.
Президент белән очрашуны алар дулкынланып көтә. Ил җитәкчесенә, район башлыгына күңелләрендә бары тик хөрмәт хисе генә. “Кайларда гына йөрсәм дә (кайчак республикадан читкә дә чыгып китәргә туры килә), Арчабызны сагынып кайтам, чөнки аннан да гүзәл җир дөньяда юк, — ди Рөстәм Фәйзрахманов. — Халыкның яшәү шартларын гел уңай якка алып баруы өчен Президентыбызны хөрмәт итәм. Республика өчен кайгыртып эшләүче шундый Президентыбыз булуы татар халкы өчен горурлык”.
Гомер үтәр, Фәйзрахмановларның да гаилә тарихын яшьлек елларындагы сагынып сөйләрлек истәлекләр баетыр. Ул истәлекләрне аларга бәхетле булып, оныклары гына түгел, оныкчыклары белән дә уртаклашып яшәргә язсын!
Розалия САФИНА