Проблема хәл ителә бара

Проблема хәл ителә бара
Район башкарма комитетының инфраструктура үсеше бүлеге Федераль Закон нигезендә 2013–2014 елларга күп фатирлы йортларда электр энергиясен саклау, аз сарыф итү максатыннан махсус программа эшләгән иде. Шул программа кысаларында районда билгеле бер күләмдә эш алып барыла.
2013 ел башыннан “Энергосервис” ширкәте бригадалары әлеге программа нигезендә подъездларга светодиодлы яктырткычларны урнаштыру эшенә ныклап торып кереште. Алар 220 вольтлы көчәнештәге электр челтәреннән ут алучы гади лампочкаларны 12–36 вольтлы электр энергиясе белән дә эшли ала торган светодиодлы лампаларга алмаштырды. Энергетиклар бу лампаларны үз цехларында җитештерә. Бүген инде “Энергосервис” ширкәте җитәкчесе Рамил Әхмәтгалиев:
— Узган ел ук күп фатирлы йорт подъездларындагы гади лампочкаларны светодиодлы яктырткычларга алмаштырып бетердек, — дип сөйли. — Тузган чыбыкларны, җиһазларны яңарту эше дәвам итә.
“Идарәче компания” ширкәте җи-тәкчесе Фәрит Зәйнуллин фикер-ләре белән дә кызыксындык.
— Хәзер электр энергиясенә түләү буенча тавыш чыкканы юк, – ди ул.
—Уңай якка үзгәрешләр байтак, — дип сөйли “Энергосбыт” предприятиесе Идел буе бүлекчәсенең Арча производство идарәсе җитәкчесе Алия Вәлиева. — Күп фатирлы йортларның уртак файдалану урыннарында, нигездә, светодиодлы яктырткычлар яна. Бу лампаларның өстенлеге шунда – аларда электр энергиясе гади лампочкалардагы кебек җылылыкка китми, ә, бәлки, тулысы белән яктылык бүлеп чыгаруга тотыла. Алар гади лампочкаларга караганда электр энергиясен 50–70 процентка азрак тота һәм озак хезмәт итә.
Банк урамындагы күп фатирлы 18нче йортта яшәүче Айрат Шәйхетдинов белән сөйләшәбез.
—Уртак файдалану урыннарына светодиодлы яктырткычларны урнаштыргач, электрга түләү күпкә кимеде, — ди ул. — Дөрес, һәр айның 25ендә “Идарәче компания” ширкәте белгечләренең исәпләү приборындагы күрсәткечләрне язып алуы да файдага булды. Ут урлау бетте. Элек айга 200–300 сум түләсәк, хәзер — 10 сумлап чыга. Киләчәктә светодиодлы лампаларны хәрәкәт буенча яна–сүнә торган итеп тә көйләячәкләр.
— Себер тракты урамындагы ике катлы 1 “В” йортына күчкәнгә берничә ел гына әле, — дип сөйли Мәдинә Мин-һаҗева. — Подъезддагы утка шундый күп түли идек, хәтта 1500 сумга җыела иде. Бу нинди тамаша, дип “Энергосбыт” юлын таптый башладым. Алар белән киңәшеп, йортта яшәүчеләр белән берләшеп, “Энергосервис” егетләренә электр чыбыкларын, исәпләү приборларын яңага алмаштырттык, һәр фатирның исәпләү приборы подъездда бик астына куелды. Хәзер теләсә ничек ут урлаулар, энергия югалулар бетте. Җәй айларында подъезд утына түләүләр 10 сумлап кына чыга.
Фатир хуҗаларының электр энергиясенә сакчыл карашы да кирәк. Әнә, Җиңүнең 40 еллыгы урамындагы 7 йортта яшәүче Нуридә Миңнуллина:
— Төнгә каршы подъезддагы утларны, урамда багана башындагы лампочкаларны сүндереп чыгам, — ди.
Күп фатирлы йортларның уртак файдалану урыннарында сарыф ителгән электр энергиясенә түләү проблемасын светодиодлы лампалар урнаштырып, тузган чыбыкларны, җиһазларны алмаштырып, һәр ай саен исәпләү приборларындагы күрсәткечләрне язып алып хәл итә баралар. Тик менә кайбер фатир эчендәге электр энергиясен исәпләү приборларын подъездга чыгару проблемасы әле һаман да хәл ителеп бетмәгән. Ул эшкә тоткарлык ясый.
Румия НАДРШИНА