Бәхетле гаиләдә

Бәхетле гаиләдә
Яңа Кенәрдә яшәүче Гөлзәйнәп апа белән Тәлгать абый Шәриповлар үзләрен иң бәхетле кешеләр дип саный. Моңа аларның тулы хаклары бар. Тәлгать абыйга бүген 92 яшь тулды, Гөлзәйнәп апага киләсе елда туксан яшь тулачак. Шул елларның 67сен алар бергә уздырган, дүрт балалары, 13 онык һәм оныкчыклары — бүгенге көндә иң зур куанычлары.
— Без 1947 елда туй үткәреп, бергә яши башладык, — ди Гөлзәйнәп апа. — 1951 елда авыл Советына паспорт алыштырырга дип килгән идем. Секретарь: “Абау, сез язылышмаган ич!” — ди. Шуннан язып куйды инде.
Эш кайчан язылышуда мени! Аларның тормыш юллары турында бер матур китап язарлык.
Тәлгать абый 1922 елда Зирекле (хәзер инде ул юк, Түбән Оры авылы тирәсендә булган) авылында туган. Белемгә омтылыш аны Морки педучилищесына алып килә. 1942 елда тәмамлый.
— 20–25ләп егетне иртә яздан имтихан бирдереп фронтка алдылар, — дип сөйли ул.
Көнбатыш фронтта атлы разведка ротасында хезмәт итә. Чигенү авырлыкларын кичерергә туры килә. Кавказ фронтында да сугыша, Кече җир өчен барган канкоешта катнаша.
—Җиңүне Одер елгасы буенда каршыладык, — дип хатирәләрен яңарта. — Зур күперне саклый идек.
Авыр яраланса да, исән–имин орден һәм медальләр тагып кайту насыйп була аңа.
Тыныч тормышта да намус белән хезмәт итә. Кызыл Яр, Иске Ашыт мәктәпләрендә директор, Яңа Кенәр урта мәктәбендә хәрби хәзерлек дәресләре укыта.
Гөлзәйнәп апа да гомерен балаларга белем бирүгә багышлый. 1943 елда Яңа Кенәр урта мәктәбен тәмамлаган 18 яшьлек кызны Пөшәңгәргә укытучы итеп җибәрәләр. Аннан соң Носыда 7 ел татар теле һәм әдәбиятын укыта. 1945 елда педагогика институтына укырга керә, аны уңышлы тәмамлый. Мари Илендә дә укыта әле ул, соңга таба аның педагогик эшчәнлеге Яңа Кенәр интернат мәктәбе белән бәйле.
— Сугыш һәм аннан соңгы елларда бик авыр булды, — ди ветеран. — Өйләр суык, балалар ач, ялангач. Аларга кием җыябыз, оекбашлар бәйлибез, мәктәптә берәр бәрәңге пешереп өләшәбез. Шундый кыен елларда да мәктәпләрдә уку тукталмады.
— Әле дә укучыларым хәлне белеп тора, — дип дәвам итә ул. — Анысына да бик куанам.
Кызлары Рулә Мари Иленең атказанган табибы. Тагын ике оныклары медицина өлкәсен сайлаган. Рудия Яңа Кенәрдә яши, Радик Себердә очучы, Раидә Яңа Кенәрдә кибет мөдире. Радик гаиләсе белән төп йорт-та яши, вахта ысулы белән барып–кайтып йөри.
— Бик кадердә яшибез, — диләр хөрмәтле ветераннарыбыз.
Әле шушы йортта Тәлгать абыйның әнисе Галия апа да 98 яшькә кадәр яшәп дөнья куйган. Бертуган сеңлесе дә 20 ел шушында яшәп, бакый дөньяга күчкән. Барын да сыендырган, хөрмәт итә торган, киң күңелле кешеләр яши торган йорт бу.
—Районда үрнәк, матур гаиләләр күп, — диде муниципаль район башлыгы Алмас Назиров Тәлгать абый белән Гөлзәйнәп апага Рәхмәт хаты һәм бүләкләр тапшырып. — Шулар арасында сез аерылып торасыз, озак еллар бер–берегезгә таяныч, яшьләргә үрнәк булып гомер итәсез. Балаларыгыз, оныкларыгыз янәшәгездә булу үзе зур бәхет. Шулай матур, тигез гомер итәргә язсын. Барысы өчен дә зур рәхмәт сезгә!
Ильяс ФӘТТАХОВ