Һәркемгә дә җитәрлек

Һәркемгә дә җитәрлек
Татарстан Республикасы Премьер–министры урынбасары, авыл хужалыгы һәм азык–төлек министры Марат Әхмәтов көн саен игеннәрнең кимендә дүрт процентын жыйнап алу бурычын куйган иде. 20 августта безнең район буенча шушы күрсәткечкә ирешелде.
“Ватан”, “Курса МТСы”, “Арча”, “Аю”, “Северный” хуҗалыклары 5–6 процент күләмендәге мәйданнарны суктырып алдылар. “Хөсәенов”, “Шиһабеддинов”, “Нива” хуҗалыкларында бу көнне урып–җыю эшләре бармады.
Билгеле, хәзер эшләргә кыенлаша бара. Яңгырлар явып үтә, чык төшә, көннәр дә кыскару ягында. Уңышы яхшы хуҗалыкларда да төрле маневрлар ясарга туры килә.
—Бер басудагы арпа гектардан 45 центнердан артык чыга, — ди “Кырлай” ширкәте баш агрономы Данил Шәяхмәтов.
Без барында ул комбайнчыларга бер яклап кына урыгыз, дигән күрсәтмә бирде. Чөнки теземнәр болай да бик калын.
“Ак барс” агрокомплексы”нда баш агроном Рөстәм Мөхәммәдиев тә комбайннар яныннан китми. Чөнки хәл сәгате белән үзгәрә, яңгыр явып үтте дип басудан комбайн алып кайту юк. Берничә сәгатьтән җилли теземнәр, эш дәвам итә.
21 августка районда игеннәрнең 54 проценты суктырып алынды. “Татарстан” ширкәтендә — 70, “Ватан”да — 65, “Кырлай”, “Аю”да — 63әр, “Акчишмә”дә 62 процент.
Район буенча уртача уңыш 23,3 центнер. “Ак барс” агрокомплексы”нда 40,3 центнер чыга.
20 августта басуларда 150 комбайнның 62се эшләде. “Татарстан” ширкәтендә 11 комбайнның барысы да эштә.
Барысы 14541 тонна сабан культуралары орлыгы салырга кирәк. Шуның 1396 тоннасы салынды. “Татарстан” ширкәте — 325, “Арча” ширкәте 310 тонна салды.
25400 гектарда көзге культуралар чәчәсе бар. Шуның 2957 гектары чәчелде. “Мәрҗани” ширкәте —1294, “Курса МТСы” — 450, “Ак барс” агро-комплексы” 374 гектарда чәчте.
Быел халыкка да җитәрлек ашлык бирү мөмкинлеге бар. Бу турыда муниципаль район башлыгы Алмас Назиров киңәш-мәләрдә дә искәртеп тора. “Татарстан” ширкәте халыкка 5795 центнер ашлык бирде инде. “Аю”, “Северный”, “Арча”, “Курса МТСы” җитәкчеләре дә үз кешеләре турында кайгыртып яши.
Ильяс СӘХӘПОВ