“Мәхәббәт утында янган йөрәкләр”

Мәхәббәт утында янган йөрәкләр
Узган атнада районыбызның үрнәк гаиләләре бер сәхнәгә җыелып, үзләренең мәхәббәт тарихын, бәхетле гаилә серләрен башкаларга да бәян итте.
Өлкән буын гаиләләре бүгенге замандагыча ак ефәк күлмәкләр белән кәттә машиналарда кыз төшерү, затлы рестораннарда туй мәҗлесе уздыру белән башланмаса да, киленнәр “төшкән җирләрендә таш булып”, ир белән хатын бер–берсен хөрмәт итеп, яратып, кадерләп гомер итә, үзләренең тату гаилә үрнәгендә балаларын, оныкларын, тирә–юньдәге яшь буынны тәрбияли.
Мендельсон маршы астында сәхнәгә үрнәк гаиләләр күтәрелә. Иске Кырлайдан Ханна һәм Минсабир Әкбәровлар 1949 елның мартында кавыша. Берничә айдан Минсабир абый армиягә алына. Ул кайтканда хатыны белән өч яшьлек улы да каршы ала. Сабырлыклар белән сыналган гаилә, 6 балага гомер биреп, 65 ел пар канат булып гомер итә.
Югары Курсадан Мөкәр-рәмә апа белән Рәфхат абыйның гаилә коруларына октябрьдә 61 ел тула. 12 бала үстерү мәшәкате алар өчен янәшә атлаганга авыр тоелмый. Бүген әнә шул балаларының, оныкларының кадерлесе булып гомер кичерә Галиәхмәтовлар.
Ишнаратта яшәүче Кави абый белән Роза апа 1960 елның декабрендә кавыша. Бүгенге көндә инде үзләре үрнәк тормышлы балалары Әсәтовларның горурлыгы.
Субаш Атыда гына түгел, якын–тирәдә күпләр тарафыннан ихтирам казанган Фоадия белән Әмин Әхмәдуллиннар да узган ел балалары, якыннары белән бергәләп алтын туйларын билгеләп үткән.
Халыкта “Изге хатын кыз таба”, дигән әйтем бар. 1963 елның октябрендә Илсур атлы егет белән гаилә корып, 6 кыз балага гомер биргән Наҗия апага да кагыла бу сүзләр. Бүгенге көндә Маликовлар Түбән Атыда гомер кичә.
Үзбәкстан егете Мәхмүт белән Башкортстан кызы Фәнирә Мәхмүт абыйның туган ягында гаилә кора. Язмыш юллары аларны Урта Бирәзәгә алып кайта. 6 бала үстереп, һәммәсенә югары белем биреп, олы тормыш юлына очырган гаилә быел алтын туен бәйрәм иткән.
Руза белән Раиф Әхмәтшиннарның гаиләсе дә туган якларыннан читтә — Казахстан җирендә туа. Өч балалары да шунда дөньяга килә. Әмма җирсү хисе гаиләне Яңа Кишеткә алып кайта.
1967 елның август ае. Кәчедә яшәүче Канифә белән Фиргать Хәйруллиннар өчен ул кавыштырган ай буларак кадерле. Алар өч бала тәрбияләп үстерә.
Шатлыгын да, кайгысын да күтәрергә Фәрхәт абыйның янәшәсендә Мәрьяме бар. Менә 45 ел бергә инде Зыятовлар. Ике улларына бәһасез тәрбия биреп, олы тормыш юлына озатканнар.
1973 елның августы Эльмира һәм Газиз Маликовлар өчен кавышкан айлары буларак кадерле булса, быел Иске Чүриледән Наилә һәм Мансур Галиевларның, Иске Мудан Галия һәм Рифкать Хисаметдиновларның гаилә коруларына шушы айда 30 ел тулган. Һәр гаиләнең олы куанычлары — ата–ананы олылап яшәүче балалары.
Хәсәншәехтан Рәмзия һәм Илһам Закировлар, Арча станциясеннән Гөлира һәм Фидаил Шәяхмәтовлар гаиләсе 1988 елда туа. Закировлар гаиләсе теплицаларында үскән кыярлары белән район халкын кыштан тәэмин итүчеләр, 4 бала тәрбияләп үстерергә дә өлгерәләр. Ә Шәяхмәтовлар аерым игътибарга лаек: үзләренең ике баласы балигъ булгач, олы йөрәкләре Камил белән Камиләне тәрбиягә алырга карар кылган. Бу балалар хәзер гаиләнең үз кешеләре, өлкәннәрнең назын, күңел җылысын тоеп үсә.
Янәшә–тирәдәге күркәм, нык гаиләләр үрнәгендә 3 бала үстерүче Югары Пошалымнан Лилия һәм Фәнис Саттаровлар киләсе елга гаиләләренең 20 еллыгын билгеләп үтәчәк.
Һәр гаилә үзенчә бәхетле. Әмма һәр бәхетнең асылында мәхәббәт, хөрмәт, тугрылык, сабырлык. Гаилә бәхетен аларның һәрберсе намуслы тырыш хезмәт нәтиҗәсендә булуын да искәртә. Чөнки гаилә әгъзаларының һәрберсе хөрмәткә лаек хезмәт кешесе: игенчеләр, терлекчеләр, җитәкче урыннарда эшләүче, шәфкать туташы, укытучы, авыл хуҗалыгы хезмәткәре, хезмәт ветераннары һ.б.
—Сез безгә тормыш мәктәбе, яшәү үрнәге бирүчеләр, җәмгыятебезнең ныклыгы. Безгә мондый очрашулар бик кирәк, — диде үрнәк гаиләләрне котлап, алар белән бәйрәм итүче район башлыгы Алмас Назиров. —Районыбызның уңышларга, яхшы күрсәт-кечләргә ирешүендә сезнең һәм сезнең кебек үрнәк гаиләләрнең өлеше зур. Ватаныбызга үзегездәй күркәм алмаш әзерләгәнегез өчен рәхмәт сезгә. Бер–берегезгә кирәк, терәк булып гомер итегез.
Күпләрнең күңелен үткәндәге якты хатирәләренә кайтарып, яшьлек иленә, йолдызлы, айлы кичләргә, беренче кавышкан вакытларына, тәүге баланы кулга алып сөйгән көннәргә кайтарды бу җырлы–моңлы кичә. Чакырылган кунаклар гына түгел, тамашачы да оештыручыларга һәм алып баручыларга: җитәкчеләргә, мәдәният, ЗАГС бүлеге хезмәткәрләренә рәхмәтле иде.
Матур башлангычның киләчәге дәвамлы булыр. Киләсе елларда мондый кичәләр безне районның ихтирамга лаек гаиләләре белән таныштырыр әле.
Розалия ЗИННӘТОВА