Бала ныклы белем һәм тәрбия алсын

Бала ныклы белем һәм тәрбия алсын
Муниципаль район башлыгы Алмас Назиров быел да яңа уку елы алдыннан мәктәпләрнең әзерлеген карап, укытучылар коллективының хезмәтенә бәя бирде, үзләре белән очрашып сөйләште. Шулай ук урыннарда урып–җыю эшләренең барышы белән кызыксынды, өч һәм аннан күбрәк сыер асраучы шәхси хуҗалыкларга ташламалы бәяләрдә саву аппаратлары алу өчен сертификатлар тапшырды.
Район башлыгы 25 августта ундүрт мәктәптә булды. Иң беренче тукталыш — Түбән Мәтәскә урта мәктәбендә. Быелгы җәй бу уку йорты коллективы өчен бик мәшәкатьле. Ныклап төзекләндерү эшләреннән алар да читтә кала алмый. Әмма зарланучы юк, хәзер алар заманча шартлар тудырылган бинада эшләя-чәк. Моңа бик шатлар, рәхмәтлеләр.
—Мәктәбегез бик матур була, — диде Алмас Әминович. — Ялт итеп тора, мәшәкатьләргә карамастан, бакчадагы эшләргә дә вакыт тапкансыз. Зур рәхмәт барысы өчен дә!
Татарстан Республикасы Премьер-министры Илдар Халиков Арчада булганда “Бина үзе генә эшләми, аның эчтәлеген кадрлар хәл итә, һәр төзелгән объектның нәтиҗәсе булырга тиеш”,— дигән иде. Алмас Назиров та укытучылар белән очрашканда балаларны әйбәт мәктәпләрдә укытып тирән белем бирү төп максат булуына басым ясады. Бөтен шартлар тудырылган, баланы һәрьяклап үстерү мөмкинлеге булган мәктәпләребез ни өчен буш диярлек торырга тиеш? Кайсы ата-ана үз баласының белемле, тормышка әзер булып үсүен теләми? Дәүләт тә нәкъ менә шуны күздә тотып кечкенә авылларга да асфальт юллар салдыра, балаларны йөртү өчен автобуслар бирә. Берничә бала гына булган мәктәпләрдә ныклы белем алу, спорт белән шөгыльләнү, төрле яклап үсеш алу мөмкинлекләре дә чикле.
Тулы комплектлы мәктәпләрдә бер баланы бер ел укыту дәүләткә 70 мең сум чамасына, ә кечкенә мәктәпләрдә 520 мең сумга төшә.
Иске Кырлай мәктәбендә — 46, Урта Пошалымда нибары 27 бала укый. Төп мәктәпләр булып санала алар. Икесенең дә биналары яңа, спорт заллары яхшы. Урта Пошалым мәктәбе статусын югалту алдында тора, бу турыда укытучылар да, өч Пошалымдагы ата–аналар да уйланырга тиештер.
Казанбаш мәктәбенең бакчасы шәп! Әмма авыл урамнарын әрем, шайтан таяклары баскан. Мәктәп территориясе бер матур утрау кебек. Район башлыгы киләсе елда бу мәктәпнең ныклап төзекләндереләчәген әйтеп сөендерде, укытучыларга хезмәтләре өчен рәхмәт әйтте, шулай ук балалар санын арттыру турында уйларга киңәш итте.
Лесхоз урта мәктәбендә бер сыйныфта 25әр бала. Әлеге мәктәпкә балалар агылып килә, укытучылар коллективы көчле, укучылар арасында ил күләмендәге олимпиадаларда җиңүчеләр дә бар.
— Яңа уку елына бик әйбәт әзерләнгән-сез!— дип бәя бирде район башлыгы.
Пөшәңгәр мәктәбе һәрвакыттагыча соклану тудыра, тырыш коллективына, булдыклы җитәкчесенә рәхмәттән башка сүз юк.
— Сез әйткән матур теләкләр безгә ел буе эшләргә рух биреп тора, — диде җитәкче Раушан Котдусов район башлыгына.
Носы мәктәбе һәрвакыттагыча үз югарылыгында. Шушмабаш мәктәбе шәп! Ныклап төзекләндерелгәннән соң бинасы үзе чәчәк кебек. Ә чәчәкләр... Урамдагы багана төпләренә кадәр чәчәк эчендә. Ул бакчасы! 3 мең төп кәбестә генә бар икән. Икенче урында Яңа Кенәр мәктәбе — аларда мең ярым. Карбыз, кавын да үстерәләр хәтта. Укучыларның укудагы уңышлары да сокланырлык. Физика буенча Бердәм дәүләт имтиханында районда беренчеләр, химия, биология буенча икенче урында.
— Шундый яхшы мәктәбегез!— район башлыгының бәясе бу.
Ашытбаш урамнары да Казанбашныкына охшаган. Юл буйлары чабылмаган, бакчалардагы ызаннар бик күңелсез булып утыра, чүп үләннәрне бик яраталар булса кирәк бу авылда да.
Ашытбашның мәктәбенә килеп кергәч, үзеңне өйдәге кебек хис итәсең. Идәнгә палас җәелгән, кабинетлар заманча җиһазланган, һәркайда гөлләр. Рәхәтлек бөркелеп тора! Бакчалары матур, орлыклар белән бөтен район мәктәпләрен тәэмин итеп торачаклар икән.
Яңа Кенәр мәктәбе һәрвакыттагыча аерылып тора. Коллективның хезмәт нәтиҗәләре матур, бакчалары бай, менә дигән технология кабинеты бар.
Ильяс ФӘТТАХОВ