Премьер–министр Арчада

Премьер–министр Арчада
Татарстан Республикасы Премьер–министры Илдар Халиков 22 августта Арча районында булды. Аны муниципаль район башлыгы Алмас Назиров каршы алды һәм озатып йөрде.
Мөхтәрәм кунак эш визитын Арчаның 7нче урта мәктәбе белән танышудан башлады. Әлеге уку йорты бинасын узган елдан бирле күрмәгән кеше танымаска да мөмкин. Ныклап төзекләндерелгәннән соң нинди мәһабәт бина барлыкка килгән! Керү юлыннан башлап бар да үзгәргән биредә. Арчаның 2нче урта мәктәбе дә ныклап төзекләндерелгәннән соң Республика Президенты Рөстәм Миңнехановның югары бәясен алган иде. 7нче мәктәпне Премьер–министр “искиткеч!” дип бәяләде.
— Монда кемнәр эшләде? — дип тә сорады әле.
— “Арча КСМы” ширкәте шундый югарылыкта эшли, — диде Алмас Назиров. — Директоры да менә биредә.
Премьер–министр “Арча КСМы” директоры Рафаэль Муллагалиевка рәхмәт әйтеп кулын кысты.
Директор Альмира Гатауллина мәктәптәге үзгәрешләр белән таныштыра–таныштыра арып беткәндер. Уку кабинетлары, спорт залы, ашханә — бар да заман таләпләре югарылыгында. Укучыларга тырышып уку, укытучыларга тирән белем бирү өчен бөтен шартлар тудырылган.
Премьер–министр шәһәрнең көньяк өлешендә төзелә торган 260 урынлы балалар бакчасын карады. Аннан соң күп функцияле мәдәни–спорт үзәгендә район җәмәгатьчелеге вәкилләре белән очрашты.
— Бүген безнең өчен аеруча истәлекле көн, — диде муниципаль район башлыгы Алмас Назиров үзенең чыгышында. — Районыбызда тулы канлы тормыш бара. —Республика җитәкчеләренә районыбызга җылы карашлары өчен зур рәхмәт. Республикада гамәлдә булган программалар буенча районда башкарылган эшләрне санап бетергесез. Халкыбыз бик тырыш. Без киләчәктә дә күрсәтелгән ышанычны аклау өчен көчебезне кызганмабыз.
— Арчаның яшәү рәвеше, үзенә генә хас яңалыклары бар, — диде Илдар Халиков. —Республика программалары шәһәрләрнең, авылларның йөзен үзгәртте. Менә бу мәһабәт бинаны клуб, күп функцияле үзәк дип әйтү дә аз кебек. Барлык районнарда да төзелә алар. Республика игътисадының көчле булуы төрле тармакларны үстерергә ярдәм итә.
Узган ел республика авыл хуҗалыгына 17 миллиард сум ярдәм күрсәтелде. Татарстан сөт, ит, бәрәңге җитештерү буенча лидерлар арасында. Республикада авыл хуҗалыгын техника белән тәэмин итү, фермалар, силос, сенаж траншеяларын ремонтлау, гаилә фермалары прог-раммалары эшли.
— Мин бүген Арчадагы мәктәпне күреп гаҗәпкә калдым, — диде Премьер–министр. — Күңелле бит! Арчада әйбәт әйберләр бик күп. Афәрин! Быел беренче яртыеллыкта демографик хәлнең уңай якка булуы да әйбәт күренеш. Урып–җыю да быел гади түгел, сездә игеннәр дә соңрак өлгерә. Шулай да сынатмыйсыз.
Илдар Халиков проблемаларның күп булуын әйтеп үтте. Юллар, төзекләндерү, су, урамнарны яктырту һ.б. программаларның 2015 елда да эш-ләячәге турында белдерүе киләчәккә ышанычны тагын да арттыра.
Премьер–министр арчалылар киләчәктә дә уңышлары белән куандырыр, дигән ышаныч белдерде.
Илдар Халиков шәһәр-нең Кызыл Бистә урамындагы яңа йортларны тапшыру тантанасында катнашты.
Ильяс ФӘТТАХОВ