Мәгарифтә лидер булырга

Мәгарифтә лидер булырга
Район мәгариф хезмәткәрләре август киңәшмәләренең пленар утырышы булды. Анда район башлыгы Алмас Назиров, Татарстан Республикасы мәгариф һәм фән министры урынбасары, министрлыкның мәгариф өлкәсендә күзәтчелек һәм контроль департаменты җитәкчесе Гөлнара Габдрахманова катнашты.
Мәгариф учреждениесе хезмәткәрләре иҗат күргәзмәләре оештырган иде. Районның татар теле һәм әдәбияты укытучылары милли мәгарифне үстерү буенча аерым күргәзмә туплаган. Ул “Туган тел” шигыре, курай моңы белән, чыннан да, без Тукай якташлары икәнне хәтерләтте.
Пленар утырышта район мәгариф идарәсе җитәкчесе Руслан Низамов “Район мәгариф системасы үсешенең заманча юнәлешләре” дигән доклад белән чыкты.
Балалар бакчалары — мәктәп белеменең беренче баскычы. Министр урынбасары Гөлнара Габдрахманова, 2016 елда һәр 3 яше тулган баланы бакча белән тәэмин итү каралган, дигән сөенечле хәбәр җиткерде. Арча станциясендә 260 урынлы балалар бакчасы төзелүе райондагы чиратны киметәчәк.
Мәктәпкәчә учреждениеләрдә ике теллелекне үстерү мәгариф сәясәтендә төп юнәлешләрнең берсе булып тора. Ике телдә сөйләшүне балалар бакчасыннан башларга кирәк. Менә икенче ел инде “Берничә телне үстерүче иң яхшы балалар бакчасы” дигән республика бәйгесе оештырыла. Бу бәйгедә быел Арчаның 8нче балалар бакчасы җиңеп, 1млн. сумлык грант отты. 2011 елда, бәйгедә катнашып, 1 млн. сум грант алган 5нче балалар бакчасы мөдире Лилия Шәйхетдинова:
— Бездә балалар буяу карандашлары, пумала кулланмыйча компьютерда рәсем ясарга өйрәнә, — дип сөйләде.
Киләсе елда балалар бакчаларының бәйгеләрдә катнашу шартлары үзгәрәчәк. Алар бәйгеләрдә жирәбә буенча катнашачак.
Агымдагы елның 1 гыйнварыннан Интернет аша “Ана теле” дигән онлайн-мәктәптә рус телле тәр-биячеләргә бушлай татар теленә өйрәнү мөмкинлеге тудырылды. Арча педагогика көллиятенең милли рухтагы кадрларны әзерләве туган телне саклауда мөһим адым булып тора.
— Мәктәпләрне бүгенге таләп-ләргә яраклаштырып ныклап төзекләндерү, аларны заманча техника, җиһазлар белән тәэмин итү, педагогларның хезмәт хакын арттыру, грант программалары укытучы хезмәтенең дәрәҗәсен күтәрде. Без хәзер эшкә сәләтле, белемле белгечләрне сайлап ала алабыз, — дип сөйләде Руслан Низамов.
— Арчаның педагоглар коллективы бик көчле, — диде министр урынбасары. — Әлегә укытучы хезмәтенә бәя бирүче иң нәтиҗәле чара — Бердәм дәүләт имтиханнары. Быел ул чагыштырмача гадел үтте. Ниһаять, үз–үзебезне алдаудан туктадык.
Гөлнара Габдрахманова Арча районының БДИ буенча кайбер фәннәрдән республика дәрәҗә-сеннән түбән булуын, укытучыларның белемле, чын кешеләр тәр- бияләргә тиешлеген әйтеп үтте.
Республиканың “Мәктәпләрне ныклап төзекләндерү” программасы нигезендә узган ел 3 мәктәп, быел 4 мәктәп ныклап төзекләндерелде. Районда Боз сарае төзелүе яшьләр бәхетенә булачак.
Сәрдәбаш — Носы, Югары Курса—Урта Курса — Түбән Курса, Сеҗе —Ташкич участокларында юлларны төзү мәктәп автобусларына яңа маршрутлар ачарга мөмкинлек бирә.
Район башлыгы Алмас Назиров 14 августта Сабада август киңәш-мәсе үтүен, Татарстан Республикасы Президенты Рөстәм Миңнехановның үз чыгышында “Татарстан мәгарифне камилләштерү системасында илдәге һәм халыкара тәҗрибәне актив үзләштерә, әмма безгә мәгарифтә лидерлар булырга кирәк”, дигән сүзләрен утырышта катнашучыларга җиткерде.
— Районда мәгариф эшчәнлеге өчен барлык шартлар тудырылган, әмма күп кенә күрсәткечләр буенча без күршеләрдән калышабыз, — дип сөйләде Алмас Назиров. — Район мәгариф идарәсенә күрсәткечләрне лаеклы дәрәҗәгә җиткерү өчен хәлиткеч чаралар күрергә кирәк.
Соңыннан белем һәм тәрбия өлкәсендә уңышка ирешкән хезмәт коллективлары, мәгариф хезмәткәр-ләре төрле дәрәҗәдәге Мактау грамоталары, Рәхмәт хатлары һәм күкрәк билгеләре белән бүләкләнде.