Ул һаман эзләнүдә

Ул һаман эзләнүдә
“Бүгенге көн укытучысы тирән белемле, киң мәгълүматлы булганда гына замана белән янәшә атлый ала”, — ди Рәмлә Нуриева.
Сүзем — Шушмабаш мәктәбенең 2012 елда “Иң яхшы укытучы” грантына ия булган югары квалификацион категорияле физика һәм математика укытучысы хакында. Быел ул, педагогик эшчәнлектә югары нәтиҗәләргә ирешеп, “Мәгариф” өстенлекле илкүләм проектында җиңү яулады һәм 60 мең сум премия белән бүләкләнде.
Укытучының бәхете, әлбәттә, укучыларының уңышларында. Әмма ул уңышларга ирешү өчен иң элек укучы күңелендә үз фәнеңә карата кызыксыну уяту өчен никадәр көч сарыф итәргә кирәк. Хезмәтенә нык бирелгәннәр генә киртәләрне җиңәргә сәләтле.
— Укучыларым фәнни–практик конференцияләрдә, төрле дәрәҗәдәге олимпиадаларда теләп катнаша. Республика күләмендәге “Яшь программист”, “Эколидер” конкурсларында яулаган уңышларыбыз бар. Укучыларны техник иҗатка тарту максатыннан республикабызның “Уйлап табучылар һәм рационализаторлар җәмгыяте” оештырган “Яшь уйлап табучы” конкурсында 2 ел рәттән укучыларым призлы урынга лаек булды.
Укучылары турында горурланып сөйли мөгаллимә. Аның тырыш хезмәте нәтиҗәсе бу. Намуслы хезмәте быел тагын да зуррак шатлыгы белән куандырган: физика фәненнән БДИ нәтиҗәләре буенча район күләмендә Шушмабаш мәктәбе беренче урында тора.
Бердәм дәүләт имтиханнары дигәннән, укучылар физиканы еш сайлый икән. “Физика фәне белән кызыксынучы, гадәттә, булачак һөнәрен дә шуның белән бәйли, — дип аңлата моның сәбәбен Рәмлә Равил кызы. —Физика тормыштан аерылгысыз, табигать белән бәйле фән. Иртән чык төшү, салават күпере кебек күренешләрдән башлап, катлаулы техника төзелешенә кадәр, һәммәсе физика законнарына буйсына. Дәрестә күрсәтелгән гади генә тәҗрибәдән дә укучының күзендә очкын кабына, ә аны үз куллары белән эшләсә, кызыксынуы тагын да арта, нәтиҗәдә, дәресне дә яхшырак үзләштерә. Шунлыктан, укучыларны иҗади–тикшеренү эшенә тартуны үз практикамда еш кулланам”.
Үзенең дә әлеге фән белән кызыксынуына укытучысы Флера Дәүләтшина сәбәпче. Физика фәненең серен укучыларга төшендерә башлаганчы шактый урау юллар аша килергә кирәк була аңа. 1993 елда Казан дәүләт педагогика институтын тәмамлап, Ашытбаш мәктәбенә кайта кыз. Язмышы аны озакламый Шекә килене булырга насыйп итә. Һәм Рәмлә ханым 17 ел Шекә мәктәбендә укыта. Соңгы еллары Шушмабаш мәктәбендә.
Төгәл фәннәр укытса да, күңеле иҗади, эзләнүчән Рәмлә ханымның. Тормышның һәр өлкәсе белән кызыксынып яшәсә дә, тарихи ядкәрләрне барлау аеруча якын үзенә. Укытучы буларак, тәрбия өлкәсендә дә ярдәмче ул шөгыле. Мисал өчен “Шекә авылының электрон хәтер китабын” гына алыйк. Бу гамәле белән ул укучыларның гына түгел, һәрбер авылдашының күңеленә миһербанлык орлыгы сибеп, әйтеп бетергесез изгелек эшләгән. Быел ул китап 9 Май көнне Бөек Җиңүгә багышланган митинг вакытында тәкъдир ителгән. Ветераннарның саны елдан–ел кимегәнгә, яшь буынга аларның батырлыгын оныттырмау, туган җиргә мәхәббәт тәрбияләү максатыннан тотына ул бу хезмәткә. Буш вакытын эзләнүләргә багышлап биш ел материал туплый. Китапта Шекәнең яу кырына киткән 158 авылдашы турында мәгълүмат бар. Аларның 96сы исән кайт-кан, 62 кеше мәңгелеккә яу кырында ятып калган. “Хәтер китабындагы һәрбер исем — үзе бер аерым тарих кебек, аларның язмышын ачыклау дәвам итә”, — ди Рәмлә ханым. Бу хезмәте дә республика күләмендә бәяләнгән — тарихи–мәдәни информацион проектлар конкурсында хәтер китабы 1 урынга лаек булган. Хезмәтең тиешле бәя алса күңелең үсә, мөгаллимә тарихи эзләнүләр буенча да тукталып калырга җыенмый, күңелендә яңа хыяллар бөреләнеп килә аның. Укытучының хезмәте бердән, белемле, җаваплы, иҗади, бар яктан камил Россия гражданины тәрбияләү булса, икенче яктан, ул укучылары белән, әйләнә–тирәдәге мохиттән үзенә һәрвакыт ниндидер тәҗрибә ала, гел эзләнүдә, ирешкәннәре белән генә канәгатьләнмичә алга омтыла. Рәмлә Нуриеваның да иҗади юлы дәвам итә...
Розалия ЗИННӘТОВА