Аңлашып, ярдәмләшеп эшләргә

Аңлашып, ярдәмләшеп эшләргә
Муниципаль район башлыгы Алмас Назиров 26 августта мәктәпләрнең яңа уку елына әзерлеге белән танышуны дәвам итте. Бу көнне ул 21 уку йортында булды.
— Болай йөреп чыгу ел буена җи-тәрлек мәгълүмат бирә, — диде ул Яңа Кишет мәктәбендә булганда. — Кайсы коллективның хезмәткә карашы ничеклеген бәялисең, халәтен ачыклыйсың, мәктәп яны участогының торышын күзаллыйсың.
Яңа Кишет мәктәбенең киләсе елда ныклап төзекләндерү прог-раммасына кертелүе ихтимал. Әмма балалар саны кимү ягында. Дөрес, мондый хәл башка кайбер мәктәпләрдә дә күзәтелә. Шуңа күрә бу мәсьәлә укытучыларны да, ата–аналарны да борчырга тиеш. Иң мөһиме — балаларга ныклы белем һәм тәрбия бирә алырлык мәктәпләрне саклап калу.
Район башлыгы укытучыларның башка мәсьәләләрдә дә үрнәк булып торырга тиешлеген әйтеп үтте. Авылларның чисталыгы борчый, урамнар күңелсез хәлдә.
—Һәркем үз капка төбен тәртиптә тотсын, — диде Алмас Әминович. — Элек көтү кугач капка төпләрен себереп кую гадәти хәл иде. Хәзер моңа нәрсә комачаулый? Тигәнәкле, әремле урамнар берәүне дә бизәми.
Яңа Кишет мәктәбе бакчасы быел уңай якка үзгәргән дип бәяләнде.
Район башлыгы мәктәпләрдә булганда котельный хуҗалыкларын да игътибарда тотты. Быел мәктәпләргә экономияле 52 казан куелды.
Алмас Назиров урыннарда булгада өч һәм аннан күбрәк сыер асраган хуҗалыкларга саву аппаратлары алу өчен сертификатлар тапшырды. Моңа кадәр шундый 300 хуҗалыкка бирелгән иде инде. Менә тагын 50 хуҗалык шундый уңайлыкка иреште.
— Авылда яшәгән кеше мал асрарга, кош–корт тотарга, бәрәңге, яшелчә үстерергә тиеш инде, — диде Алмас Әминович. — Быел иген уңышы да ярыйсы, халыкка җитәрлек ашлык бирү мөмкинлеге бар.
Ныклап төзекләндерелгән мәк-тәпләр ерактан ук балкып утыра. Алдагы көнне Шурабаш, Шушмабаш, Лесхоз мәктәпләрен күреп сокланган идек. Шурабаш мәктәбе турында бер кунак хәтта: “Яңа мәктәп салдыгызмы әллә?” — дип тә сораган.
Урта Курса мәктәбе шулар рәтендә. Бу җирлектә яңалыклар күп. Өч Курса арасына асфальт юл салынды, күперләр яңарды. Мәктәпкә карап туймаслык. Бакчасындагы гүзәллеккә карап ял итәрлек. Хәзер балаларны күбрәк туплап, аларга яхшы белем бирәсе.
Курса–Почмак, Сикертән, Сеҗе мәктәпләрендә яңа уку елына һәрвакыт зур җаваплылык белән әзерләнәләр.
— Хуҗалык җитәкчесе, авыл җирлеге башлыгы, мәктәп директорлары аңлашып эшлисез, — диде район башлыгы. — Бернинди проблема тудырганыгыз юк.
Сикертән мәктәбе турында аерым әйтмичә булмый. Шундый уңайлылык бу уку йортында, эченә керсәң чыгасың килмәс, үз өеңдәге кебек рәхәтлек. Күпме хезмәт, көч куелган!
Курса разъезды мәктәбенә урманчылыкның ярдәме зур. Гомумән, соңгы елларда урыннардагы күп җитәкчеләр мәктәпләргә йөз белән борылды.
— Үзара ярдәмләшеп, бер–береңә булышып яшәргә кирәк, дип киңәш итте Алмас Әминович укытучылар коллективлары белән очрашуларда. — Хәзер урып–җыю вакыты, булышуны сорап мөрәҗәгать иткәндә каршы килмәскә. Икмәк бар кешегә дә кирәк.
“Татарстан” ширкәте җитәкчесе Рүзәл Мәрдәнов Иске Чүриле мәктәбе коллективына рәхмәт укый. Бу хуҗалыкның урып–җыюны оешкан төстә алып баруында укытучылар һәм укучыларның да өлеше зур. “Ак барс” агрокомплексы” ширкәтендә дә мондый элемтә нык.
Соңгы елларда Арча шәһәрендәге уку йортлары танымаслык булып үзгәрде.
Г.Тукай исемендәге Арча педагогика көллияте тәмам сүнеп, сеңеп бетеп бара иде. Җиһазлану буенча да мәктәпләр узып киткән иде үзен. Узган ел ныклап төзекләндерелгәннән соң искиткеч бина барлыкка килде, милли кадрлар әзерләү үзәгенә әверелде.
— Быел беренче курска 180 укучы кабул иттек, — дип сөйләде директор Гөлнара Гарипова. — Барысы 620 укучыбыз бар, республикабызның бик күп районнарыннан киләләр. Музыка бүлеген ачабыз, “Егетләр” ансамблен дә терелтеп җибәрәбез.
Арчаның В.Ежков исемендәге беренче, икенче мәктәпләре дә зур яңарыш кичерде. 5нче гимназиядә төпле белем һәм тәрбия бирү өчен шартлар яхшы. Арча мәктәпләре республика күләмендәге олимпиадаларда, төрле бәйгеләрдә җиңүләр яулап, район данын күтәрә.
Арчаның 7нче урта мәктәбе турында аерым әйтү урынлы булыр. Бу мәктәп тә быел ныклап төзекләндерелде. ТР Премьер–министры Илдар Халиков та бик ошатып китте. Алмас Әминович коллективка зур рәхмәт әйтте.
—Матурлыкны үз кулларыгыз белән тудырасыз. Бу үзе зур бәхет, — диде.
Ильяс ФӘТТАХОВ