“Йолдызлык” районнарда балкый

“Йолдызлык” районнарда балкый
1 сентябрь киче Арча халкын шәһәрнең үзәк стадионына бәйрәм концертына җыйды.
Быел 1 сентябрь арчалылар күңеленә Белем көне буларак кына түгел, икеләтә бәйрәм буларак кереп калыр. Көндез укучылар яңа уку елы башлануын билгеләп үтсә, кичен арчалылар стадионга бәйрәмгә җыйналды. Тарихта беренче тапкыр “Йолдызлык” фестиваль– хәрәкәте быел республика районнары буенча концерт турлары белән чыкты. Аларның Арча районына килүе нәкъ менә Белем көненә туры килде.
Сәхнәдә ачык һавада иң яхшы чыгышлары белән 200дән артык яшь артист — фестиваль җиңүчеләре һәм призерлары — чыгыш ясады, хореография, вокал һәм конферанс буенча үз осталыкларын күрсәтте. Алар арасында безнең якташларыбызның да булуы икеләтә күңелле. Бу фестивальне алып баручы әйткәнчә, “Мөгаен, шәһәребезнең иң мөһим бию коллективына әверелгән” “Ар-и-Эль” бию коллективы, җырчы Мөнир Мәрданов, конферансье егетләребез Марат Мәгъсүмов һәм Инсаф Гаптелбәров. Шулай ук концертта Казан дәүләт консерваториясе һәм РУТИ (ГИТИС) студентлары, тәмамлаучылары чыгыш ясады.
“Республика шәһәр һәм районнары буенча концертлар быелның гыйнвар аеннан бирле үткәрелә, — ди проектның генераль продюсеры Дмитрий Туманов. — Кыш көне без Татарстан шәһәрләрендә һәм район үзәкләрендә 17 концерт белән чыгыш ясадык. Август–сентябрь айларына шуның кадәр үк планлаштырылган. Проектның төп максаты — барлык Татарстан кешеләренә тере сәнгатьне тоярга мөмкинлек бирү, югары дәрәҗәдәге мәдәнияткә юл ачу. Балалар дөньяви опера классикасын, Россия һәм чит ил эстрадасының танылган композицияләрен, заманча биюләр һәм дөнья халыклары биюләрен башкара. Мондый программалар бик кирәк һәм тамашачылар тарафыннан бик яратып кабул ителә”.
Эчтәлеге һәм техник бизәлеше буенча концерт елга бер тапкыр Казан шәһәрендә “Пирамида” мәдәни-күңел ачу комплексында уза торган гала-концерт форматына туры килеп торды. Тик бу юлы аны карау бәхетенә чакырылган кунаклар гына түгел, ә барлык тамашачылар да иреште. “Йолдызлык”та яңадан очрашканчыга кадәр!
Гөлназ ГЫЙНИАТУЛЛИНА