Хуш киләсең, яңа уку елы!

Хуш киләсең, яңа уку елы!
Хәтерлим мин әле бүгенгедәй
Сентябрьнең 1е җиткәнен...
Әнә шулай, хәтерләргә уелып кала ул 1 сентябрь, Белем көне. Һәр мәктәптә укытучылар аны укучылар, ветеран педагоглар, әти-әниләр катнашында чәчәкләр, җыр-музыка, котлаулар, теләкләр, ачык дәресләр белән матур итеп үткәрергә тырыша.
Укулар башланды. Быел 11 сыйныфны 272 кыз һәм егет тәмамлады. 1 сыйныфка 551 бала укырга керде. 9 сыйныфны 621 тәмамласа, шуның 351е төрле һөнәр уку йортларын сайлады. Мәктәпләрдә барысы 5425 бала укый.
Быел ныклап төзекләндергәннән соң Арчаның 7нче мәктәбе, Түбән Мәтәскә, Урта Курса, Шурабаш мәктәпләрен беренче тапкыр күргән укучылар һәм әти-әниләрнең соклану һәм куануларының чик– чамасы юк иде. Укытучылар җәй буе әлеге уңайлыкларны һәм матурлыкны тудыручылар янәшәсендә булдылар дисәк тә, һич арттыру булмас.
Иртәдән Арчаның 7нче мәктәбенә укучылар, бәйләм-бәйләм чәчәкләр тотып, матур мәктәпкә барам, дип ашкынып атлады. Барысы 200 бала. 23 бала 1нче сыйныфка килде. Быел башлангычта яңа укытучы да бар, ул — Ләйсән Абдуллина. Мәктәп җитәкчесе Альмира Гатауллина укытучыларны зурлый белә. Ул аларның һәркайсы турында сөйләп, түргә чакырды, лаеклы ялдагы ветеран укытучыларны да: “Укытучы пенсионер булмый, сез һәрвакыт тәрбияче”, — дип олылады.
Район үзәгеннән иң ерак авыл мәктәпләренең берсе — Шурабаш мәктәбендә укучы 90 бала Белем көнендә өр-яңа бинага килгәндәй сөенеп туя алмады. Күрче син бу тәрәзәләрне, идәннәрне, бүлмәләрне, җылы бәдрәф-ләрне — бар да заманча, зәвыклы. Укырга да, укырга гына!
Иске Чүриле мәктәбенә укырга килгән балаларның күзләре яңа спорт мәйданчыгында гына иде. Мәктәп янәшәсенә урамга эшләнгән заманча универсаль спорт мәйданчыгы ул. Балаларны бәхет басты, урамда рәхәтләнеп волейбол, баскетбол, футбол һ.б. уйнаячаклар. Ә быел мәктәпне тәмамлаган 13 егет һәм кызның 8енә югары уку йортына керергә насыйп булды. Алар арасында Бердәм дәүләт имтиханнарын иң югары баллга тапшырган медальче Ралина Җәләева да бар.
Шушмабаш мәктәбендә 1 сентябрьне аеруча көтеп алган балалар бар. Алар — җәйге каникул вакытында “Северный” хуҗалыгында эшләгән яшүсмерләр. Хуҗалык җитәкчесе Рөстәм Хәйруллин мәктәптә тантаналы шартларда тырыш балаларның һәркайсына тукталып, мактап, рәхмәт әйтеп, акчалата бүләк тапшыра.
Мәктәпләр гадәттә укучылары белән горурлана. Сеҗе мәктәбе коллективы да быел татар теле һәм әдәбияты олимпиадасында республикада җиңү яулаган Гөлүсә Мортазина уңышларына сөенә. Быел ул 10нчы сыйныфны Курса– Почмак мәктәбендә дәвам итә. Укытучысы — татар теле һәм әдәбияты белгече Гөлүсә Җәләлиева үзе дә быел “Иң яхшы укытучы” бәйгесендә җиңү яулады. Сеҗе мәктәбе җитәкчесе, математика укытучысы Марс Абдуллин, “Ел укытучысы—2014” бәйгесендә җиңеп, математика бүлмәсен җиһазларга сертификат алды. Узган уку елында район спартакиадасында 1нче урынны алган коллективның (физкультура укытучысы Фәрит Нәгыймов) спорт җиһазлары алу өчен 100 мең сумлык сертификат белән бүләкләнүе дә балалар бәхетенә. “Үз мәктәбеңә ярдәм ит” акциясе кысаларында “Ак барс” агрокомплексы” ширкәте җитәкчесе Шәйдулла Сәлаховның мәктәпнең капка, коймаларын яңартуда булышуына, эшмәкәр Шамил Хаҗиевның төрле җиһазлар белән тәэмин итүгә ярдәм кулы сузуына рәхмәт әйтеп бетерә алмыйлар. Әнә шундый уңышлар, күңелле хәбәрләр белән Сеҗе мәктәбе коллективы яңа уку елын башлап җибәрде.
...Күңелләрне җилкендереп кыңгырау тавышы яңгырады. Балалар, укытучылар, ветераннар дәррәү “Минем кече Ватаным” дигән ачык дәрескә юнәлде. Носы мәктәбенең биология укытучысы Гөлүсә Мостафина дәреснең кереш өлешеннән соң балалар белән авыл буйлап сәяхәткә чыгып китте. Укучылар ташчы, калай остасы Марсель Зарипов, балта остасы, умартачы Бари Мортазин, һәвәскәр бакчачы, умартачы Флера Сафиуллинада булдылар, аларның һөнәрләре белән таныштылар, Бөек Ватан сугышында һәлак булганнар истәлегенә куелган обелиск янында батыр авылдашларын искә алдылар, чишмәләрне карап торучы игелекле кешеләр, чишмәләр тарихы турында сөйләштеләр. Һәркемнең кече Ватаны туган җирдән, туган туфрактан башлануына инандылар.
Румия НАДРШИНА