Яңгыр да куркытмады

Яңгыр да куркытмады
Көне буе бер явып, бер туктап торган яңгыр да киртә була алмады Татарстан Республикасы көне уңаеннан уздырылган “Арча кичләре”нә. Рәхмәт төшкере, бәйрәм башланырга сәгать чамасы калганда яңгыры да туктады. Бәйрәмгә килүчеләр соры караңгы кичне яктыртырлык җырлар тыңлап хозурланса, килә алмаучылар көйсез һава торышын тиргәгәндер.
Бәйрәм Арча шәһәре башкарма комитеты җитәкчесе Рафил Исмәгыйлев фатыйхасы белән башланып китте. Ул арчалыларны бәйрәм белән котлап изге теләкләрен, Арчабызның данын еракларга танытуда күп көч куючы якташларыбызга рәхмәтен җиткерде.
Арчабыз төзеклеге, матурлыгы белән килгән кунакларда соклану хисе уята. Бәйрәмгә кунак булып кайткан ТР яшьләр эшләре һәм спорт министры Рөстәм Гарифуллин да үз чыгышында ассызыклады бу турыда.
Үзебезнекеләрнең — Арча педагогика көллияте студентлары, район мәдәният идарәсе учреждениеләре һәвәскәрләренең дәртле чыгышлары белән башланып киткән бәйрәм бүләкләргә дә юмарт булды. Шәһәребезне гүзәл гөлбакчага әйләндерүчеләр — гүзәллек тудыручылар бәйрәм сәхнәсендә зурланды. Шәһәрне экологик яктан яшелләндерү, чисталыкны һәм тәртипне саклау, тирә-якны төзекләндерү, күпкатлы йортларга хезмәт күрсәтүне яхшырту максатыннан игълан ителгән конкурс нәтиҗәләре буенча (ул 15 августта төгәлләнде) төрле номинацияләрдә диплом һәм истәлекле бүләкләр тапшырылды. “Иң төзек шәхси хуҗалык” номинациясендә Таҗи Гыйззәт урамыннан Гөлнар, Айрат Гариповлар, Банк урамыннан күп фатирлы 37нче йорт (җаваплысы Люция Ибраһимова) бүләкләнде. Кызыксындыру бүләгенә Күпер урамыннан Асия Шәрәфиева ия булды. “Иң яхшы торак милекчеләр ширкәте” исеменә “Өмет” ширкәте (рәисе Ибраһим Сабиров), “Иң яхшы предприятие” – Арчаның 5нче гимназиясе (директоры Фатыйх Хәкимуллин) һәм “АСПК” ширкәте (җитәкчесе Вазыйх Бикмуллин). “Иң төзек урам” исеменә Арчаның Зәйнуллин урамы (күп хезмәтләре кергәне һәм тәртип урнаштырылганы өчен “Идарәче компания” бүләкләнде) лаек булды. Бүген, әлбәттә, иң-иңнәре генә сәхнәгә күтәрелде. Игътибарга лаек һәм Арчаның гүзәллеге өчен хезмәтләре күп кергән оешма-учреждениеләрнең, шәхси хуҗалыкларның саны елдан–ел арта бара, аларның һәрберсе хөрмәткә лаек. Яшәгән җиребезнең гомуми чисталыгы, зәвыгы иң элек “Жилкомбытсервис” ширкәте хезмәткәрләренең тырышлыгы нәтиҗәсе.
Бәйрәмдә бүләкләнүчеләр арасында “ТАТМЕДИА” акционерлык җәмгыяте бүләгенә ия булучылар да бар иде. 12 майдан 30 июньгә кадәр газета-журналларга язылучылар арасында үткәрелгән конкурста 120 кеше арасында безнең районнан 11 якташыбыз катнашкан. Аларга — Данис Хәмидуллин (Урта Атыдан), Ләйсән Шакирова (Курса–Почмак), Ләйсән Вәлиева (Арча), Альбина Гарипова (Хәсәншәех), Гөлфия Фазылҗанова (Кышкар), Гүзәл Хәбибуллина (Хәсәншәех), Гөлгенә Вафина (Субаш Аты), Гөлчәчәк Хәйруллина (Иске Чүриле), Шәфигулла Гарипов (Арча), Госман Галиуллин (Наласа), Альбина Мөхәммәтгалиевага (Югары Аты) “Арча хәбәрләре” газетасының баш мөхәррире Исрафил Насыйбуллин “ТАТМЕДИА” җәмгыятенең махсус бүләген тапшырды һәм киләчәктә дә бергә булырга чакырды. Бүләкләнүчеләр, нигездә, укытучылар булганлыктан, алар газета-журналларны дәрескә өстәмә әсбап буларак куллануларын әйтә. “Газета-журнал килгән көн — өйдә бәйрәм, — ди Иске Чүриледән Гөлчәчәк Хәйруллина. — Укытучы булгач, балалар белән эшләгәндә вакытлы матбугатка таянмый булмый. Матбугат материалын куллану вакытны янга калдырырга да ярдәм итә”.
“Арча кичләре” бүләкләргә юмарт булды. Иң саллы бүләкне һәр килүчегә әзерләгән ул: татар эстрадасы йолдызларының күңелле рухтагы җырлары, “Казан” бию ансамбленең дәртле биюләре коеп яуган яңгырны, салкын җилне дә оныттырып, җанга сихри дулкын бүләк итте. Хәзер көтәргә генә калды: киләсе “Арча кичләре” кайчан булыр?
Розалия ЗИННӘТОВА