Сәрдәбаш якынайды

Сәрдәбаш якынайды
Юлсызлык ата–бабаларыбызның үзәгенә үткән. Юл газабы — гүр газабы, дип әйтеп калдырган алар.
Район үзәгеннән 55 километрда урнашкан Сәр-дәбаш авылы халкының бу көннәрдәге халәтен аңлатып бирүе дә кыен. Моның өчен гомере буе шушы авылда яшәп, шул юллар газабын кичергән кеше булу кирәк. Укытучы Венера Бариеваның 29 август-та, ниһаять, авылга килеп җиткән асфальт юлны ачу тантанасында сөйләгән сүзләре әле дә колакта яңгырап тора кебек.
— Мин бу юлда иң күп йөргән кеше буларак бүгенге хисләремне тыныч кына әйтеп тә бетерә алмыйм, — диде ул. — Ниләр генә күрмәдек без бу юлларда! Мондый бәхеткә ирешә алырбыз, Сәрдәбашка асфальт юл килер дип беребезнең дә төшенә кермә-гәндер. Мең–мең рәхмәт җитәкчеләребезгә!
Татарстанның иң төньяк ноктасында яшибез без. Бүген көн болытлы булса да, йөзләрегез балкый. Безнең авыл иң бай тарихлы, иң гүзәл авыл. Сәрдәбаш кебек авылны күргәнем юк минем. Бик кунакчыл, бердәм, тырыш кешеләр яши бездә. Кая гына барсаң да, “Гөсләчеләр авылы, тик юлы гына юк”, — диләр иде. Менә юлыбыз да булды!
— Сабырлыгыгыз өчен рәхмәт! — диде авыл халкының шатлыгын уртаклашырга килгән муниципаль район башлыгы Алмас Назиров. — Бик тырыш кешеләр яши бу авылда. Без “Северный” хуҗалыгы дигәч, иң беренче Сәрдәбаш авылын, аның уңган, булган кешеләрен күз алдына китерәбез. Бу көн авыл тарихы битләренә алтын хәрефләр белән язылыр. Асфальт юллар килгән авылларыбыз яшәреп китәр, йортлар, балалар артыр. Табигатьнең шундый матур урынында урнашкан сезнең авыл, экологик яктан иң чиста җирдә яшисез. Бәхетле булыгыз!
Алмас Әминович әлеге юлны төзеткән, районга һәрвакыт булышырга әзер торган ТР юл хуҗалыгы министры Ленар Сафинга, “Главтатдортранс” директоры Эдуард Даниловка, районара юллар системасы җитәкчесе Рәшит Ильясовка, “Дортранспроект” оешмасы җитәкчесе Рәшит Хәбибуллинга рәхмәт белдерде, уңышлар теләде.
— Алмас Әминович Сәрдәбашка юл кирәк дип бик сорап йөрде, — диде Эдуард Данилов. — Кадерен белегез, имин йөрегез!
— Без эшкә керешкәндә юл 100 метрга җәелгән иде, — диде Рәшит Ильясов. — Шәп булды, озак хезмәт итсен!
— 18 ел элек җиде авыл арасында иң беренче булып газ Сәрдәбашка керде, — диде “Северный” ширкәте җитәкчесе Рөстәм Хәйруллин. — Авыл таркалмады, йортлар төзек. Әле менә яшьләр программасы буенча дүрт йорт төзелде. Бик күп терлек асрыйсыз, хуҗалыкның да терәге сез. Инде менә юллы да булдыгыз, сезнең белән без дә куанабыз.
Сәрдәбаш — гөсләчеләр авылы да. Моннан 50 ел элек алар, Мәскәү сәхнәсендә чыгыш ясап, авылны бөтен илгә таныткан.
Ильяс ФӘТТАХОВ