Йөриләр күккә карап

Йөриләр күккә карап
Калган эшкә кар ява, ди халык мәкале. Кар төшәргә ераграк булса да, яңгырлар шактый яуды инде. Калган эшләр дә җитәрлек, августның матур көннәрендә урып–җыюны тиешенчә оештыра алмаганнарга бүген күккә карап аяз һава көтәргә туры килә.
4 сентябрьгә булган мәгълүматларга караганда, район буенча игеннәрнең 73 проценты җыйнап алынды. “Акчишмә”дә — 90, “Татарстан”да — 87, “Ватан”да — 86, “Кырлай”да — 83, “Курса МТСы”нда — 82, “Северный”да — 81 процент.
Хөсәенов хуҗалыгында — 55, Сафиуллинда — 58, Шиһабеддиновта — 60, “Арча” ширкәтендә 61 процент мәйданнарда суктырылган.
3 сентябрьдә “Ак барс” агрокомплексы” кырларында 10 комбайн ашлык суктырды, бер комбайнга уртача — 302,7 центнер бөртек туры килде. Башка хуҗалыкларда бу көнне комбайннар кырга чыкмады.
Район буенча бер гектардан 24,9 центнер уңыш чыга. “Ак барс” агрокомплексы”нда — 43,7, “Игенче”дә — 43,6, “Кырлай”да — 37,7 центнер. Иң аз уңыш “Арча” ширкәтендә — 12,6 центнер гына. “Мәрҗани” ширкәтендә 15,7 центнер.
— Район буенча 14540 тонна орлык әзерләргә кирәк, — ди авыл хуҗалыгы һәм азык–төлек идарәсенең үсемлекчелек бүлеге җитәкчесе Миннәхмәт Сәгыйтьҗанов. — Шуның 11264 тоннасы сабан культураларыныкы. Тагын 3276 тонна иминият фонды саласы бар. Орлык әзерләүгә һава торышы да комачау-лый алмый, бу мөһим эш игътибар үзәгендә булырга тиеш.
Бүгенге көнгә 9786 тонна орлык әзерләнгән. “Ватан”, “Игенче”, Хөсәенов хуҗалыкларында кирәк кадәр орлык салып куелган инде. “Ак барс” агрокомплексы”нда ул 204 процент тәшкил итә. Бу хуҗалык мөрәҗәгать итүчеләрне дә орлык белән тәэмин итәргә әзер. Ә андыйлар булачак. Шиһабеддинов, Сафиуллин хуҗалыкларында салынган орлыклар бөтенләй юк. “Арча” ширкәтендә 29 процент күләмендә генә.
Көзге чәчүнең иң әйбәт сроклары узып бара. 25400 гектарның 10041 гектары чәчелгән килеш. Алдан чәчкәннәрнең басулары яшел хәтфә инде. “Мәрҗани” — 2626, “Ак барс” агрокомплексы” — 1400, “Татарстан” — 1019, “Северный” хуҗалыгы 910 гектарда чәчте инде.
“Нива”, Сафиуллин, Шиһабеддинов хуҗалыкларында бер гектар да чәчү юк әле. “Арча” ширкәтендә 4000 гектарның 368 гектары гына чәчелгән.
“Кырлай” ширкәтендә 30 гектар (барысы 600 гектар) бәрәңге алынды. Әлегә бер гектардан уртача уңыш — 405 центнер.
14043 гектарда (барысы 67137 гектар эшкәртәсе бар) туфракны төп эшкәртү үткәрелде. “Ак барс” агрокомплексы”, “Мәрҗани”, “Игенче”, “Татарстан”, “Северный”да шактый мәйданнар эшкәртелде инде. “Мәрҗани” ширкәтендә 12 агрегат җир эшкәртә.
Ильяс ФӘТТАХОВ