Шатлыгы да, кайгысы да — бер йөрәктә

Шатлыгы да, кайгысы да — бер йөрәктә
Күптән түгел файдалануга тапшырылган Кызыл Бистә урамындагы йорттан Яңа Иябашта яшәүче Минзиннар гаиләсе яңа фатирлар алды.
4 фатир! Күп балалы гаилә бер йортның ике подъездыннан берәр бүлмәле шулкадәр фатирның хуҗасы булып әйтеп бетерә алмаслык олы куанычка ия булды. Шатлыгыннан балкыган Резидә апа: “Ике улым өйләнеп башка чыкса, кызларыма да тормыш башлаганда яшәү урыны булсын өчен берәр бүлмәлене алырга уйладык. Бу шатлыкны Салаватым гына күрә алмады... Бик көткән иде...” — дип күз яшьләрен сөртте.
Мин аны башкача күз алдына китергән идем — олы яшьтә, язмышына үпкәләүчән итеп. Каршымдагы мөлаем ханым уйларымның киресе булып чыкты, аның сөйкемле йөзенә караган саен карыйсы килә, үзе белән аралашуы шундый рәхәт. Иңнәрен никадәр авыр йөк басып торса да, күргән–кичергәннәрен Аллаһы Тәгалә тарафыннан җибәрелгән сынау итеп сабырлык белән күтәрә алуы көчле рухлылыгының әҗере.
9 балага гомер бирә Резидә апа. Тик бүген күз карасы — йөрәк парәләре сигезәү генә. Ни турында гына сүз башласаң да, телләр үзеннән–үзе Салаватны искә төшерә. Аның юл фаҗигасенә эләгеп фани дөньяны калдырып китүенә ноябрьдә ел тула инде... Олы кызы Чулпан белән Резидә апаның йөрәген иң әрнеткәне — һәлакәтнең сәбәпчесе — машина белән бәрдергән егетнең бер тапкыр хәлләрен дә белмәве. Юкса, ана кеше аны жәлләп, бу бала да кемнеңдер газизе бит, тоткын шулпаларын эчмәсен дип хөкем итәргә гариза да язмаган. Ул егетнең “В контакте”дагы битенә Чулпанның үпкәләү сүзләре белдереп язган хатына мондый җавап килгән: “Нәрсә, мин гомерем буе сезгә бурычлымы әллә?” И, дөнья, нинди генә фикер ияләрең юк та, гыйбрәт алырлык нинди генә күренешләргә тап итмисең син...
43 яшьлек Резидә апаның өлкән улына — 25, төпчек кызына 5 яшь. Яшь күңелле булуының сәбәбе бердән, башта гаилә балалар бакчасы мөдире, соң-гы елда клуб мөдире булып эшләп, мәдәни чараларның үзәгендә кайнавында булса, икенчедән, балаларының дуслары белән аралашып, һәр баласының яше белән яшәп картаерга вакыты юк икән. Юкса, кичергән кайгылары...
Тәкъдиреңә язылгач, язмыш сынауларын узмый чараң юк. Сынаулардан торган йөк алар ишеген 4 ел ярым элек шакый башлаган. Беркөн иртән йорт башы — ире 40 яше дә тулмаган Резидәсен 9 бала белән тол калдырып, күзләрен ачмаган. Йөрәк, дигән табиблар... Балаларының исәнлегенә сөенеп, шул кайгыны алар белән бергә күтәреп яшәгән бер мәлне Фирзәр улы юл һәлакәтенә очрый. Ул чакларны бүген дә күз яшьләрсез генә искә төшерә алмый ул. Берничә тәүлек аңсыз, аппаратлар ярдәмендә генә сулыш алып яткан егет янына улын күреп калсын, дип (моны анага соңыннан гына белдерәләр) табиблар аны улы янына кертә. Йөрәк парәсенең шул хәлдә ятуын күргәч өзгәләнеп еламый ул, сабыр гына, татар хатыннарына хас булганча эчтән сызып, Аллаһы Тәгаләдән ярдәм сорап ялвара: “Улым, ташлап китә күрмә, синнән башка нишләрмен? Син минем өметем, терәгем бит...” Берәр көннән могҗиза — инде терелүенә өмет өзгән табиблар егеттә уңай якка үзгәреш күреп гаҗәпләнә. Ана хакы ниләргә сәләтле ул! Улы терелеп аякка баскач, Чулпанының сукыр эчәгесенә операция була. Саксызлыкмы, ялгышлык сәбәпчеме, ике атна үлем белән көрәшеп ята кыз. “Балаларымның икесен дә табиб Фәнис Гайфетдинов аякка бастырды. Мин аны хәзер изге фәрештә сыман күрәм. Нинди генә рәхмәтләр әйтсәм дә аз, үзе, гаиләсе гомере буе сәламәт булып яшәсен”, — ди ана.
Болар — узганнарда калсын, ә бүгеннән — яңа фатирлы булудан — тормышлары якты юлдан гына китсен Минзиннарның. Фатирларны ана Чулпаны, төпчек кызы һәм ике ай элек гаилә корган Фирзәренең кәләше Алисә белән күңелләре ышанмыйча карап йөри, әле берсенә, әле икенчесенә керә, куанычының чиге юк. “Бездән дә бигрәк әни шатланды, мин дә барып күрер идем, дип калды. Мохтаҗ кешеләр өчен шушындый программа кабул итеп тормышка ашырганнары өчен хөкүмәт, район җитәкчеләренә зур рәхмәт”, — ди күп балалы Резидә Минзина.
Розалия ЗИННӘТОВА