Безнең газета белән сәяхәт ит!

Безнең газета белән сәяхәт ит!
Үткән җомгада редакциягә “ТАТМЕДИА” ачык акционерлык җәмгыяте филиалы “Арча хәбәрләре” (“Арский вестник”) газетасы редакциясе” һәм “SAMINA TOUR” туристлык агентлыгы белән берлектә үткәрелгән “Безнең газета белән сәяхәт ит!” бәйгесенең беренче этабында җиңүчеләр чакырылган иде.
Исегезгә төшерәбез, бәйгедә “Арча хәбәрләре” газетасына язылучылар катнашты. Алар үзләре сәяхәт иткән илдән бер кочак хис-тойгылар, әйтеп бетергесез кичерешләр белән бергә шул илнең истәлекле урыннарында газета белән төшкән фоторәсемнәр дә алып кайтты. Ул фотолар безнең газетаның сайтына урнаштырылып барылды. Һәр теләгән кеше үзенә ошаган катнашучы өчен тавыш бирә ала иде. Онлайн-тавыш бирү 17 августта тәмамланды һәм шул көнне җиңүчеләр билгеләнде.
Шулай итеп, нәтиҗәләр нинди соң? Бәйгедә барлыгы 20гә якын кеше катнашты. Алар арасында иң күп тавышны Арчадан Альбина Вафина җыйды. Аның Шарм-эль-Шейх курорт шәһәрендә төшерелгән фотосы 170 тавыш җыйды. Аңа “Арча хәбәрләре” газетасы баш мөхәррире Исрафил Насыйбуллин истәлекле бүләк тапшырды. Шулай ук, алдан вәгъдә ителгәнчә, бу көнне ул «SAMINA TOUR» туристлык агентлыгыннан киләсе сәяхәт өчен 5 мең сумлык сертификатка ия булды.
Бәйгедә шулай ук Балтачтан Фәния Гомәрова зур активлык күрсәтте. Ул, 133 тавыш җыеп, икенче урынга лаек булды һәм партнерлар бүләкләре белән бергә икенче сәяхәт өчен 4 мең сумлык сертификат белән бүләкләнде. Бәйгедә катнашучылар Айрат Габделхаков һәм Рөстәм Абдрахманов, 3 һәм 4 урыннарны яулап (81 һәм 74 тавыш), шулай ук истәлекле бүләкләр белән бергә 3 һәм 2 мең сумга сертификатларга ия булдылар.
Фәния Гомәрова, Балтач: «SAMINA TOUR»дан юллама алуыбыз беренче тапкыр түгел. Аларның хезмәтләреннән канәгать. Бәйге турында ишеткәч, шунда ук катнашабыз, дидек. Сезнең газетага да язылдык: күрше район хәбәрләре белән дә кызыксынып торырга кирәк. Мөгаен, “Арча хәбәрләре” газетасы сайтына фоторәсемнәр урнаштыручылар арасында без иң соңгылары булганбыздыр. Төркиядән бәйгенең беренче этабы тәмамланырга берничә көн кала гына кайтып кердек. Шуңа да карамастан, күпме тавыш җыя алдык! Безнең өчен Арча, Балтач, Казан тавыш бирде! Бер тапкыр кая да булса ял итәргә барганнан соң башка илләрне дә күрәсе килә башлый. Шуңа сертификатның кирәге чыгачак. Оештыручыларга зур рәхмәт. Безгә бик ошады”.
Ләйсән Исхакова, «SAMINA TOUR» туристлык агентлыгы директоры: “Без үзебезнең клиентларыбыз арасында бәйгеләрне еш оештырабыз. Тик әлегесе аеруча кызыклы булды. Моның өчен, партнерларыбыз — “Арча хәбәрләре” газетасы редакциясенә зур рәхмәт. Бу башлангыч дәвамлы булыр дип ышанабыз”.
Исрафил Насыйбуллин, “Арча хәбәрләре” газетасы баш мөхәррире: “Беренче коймагыбыз бер дә төерле булмады, нәтиҗәләр куанычлы. Газета укучыларыбыз һәм хез-мәткәрләребез сүзләренә караганда, бәйге бик кызыклы килеп чыкты. Моңарчы без “Арча хәбәрләре” газетасы шуның кадәр илдә булыр, дип күз алдына да китерә алмадык. Нәкъ менә шуңа күрә без бәйгене озайтып, аның икенче этабын игълан итәргә булдык. Барыгызны да анда катнашырга чакырабыз!”

Бәйге дәвам итә. Аның икенче этабы 18 августта башланды һәм ул 31 декабрьгә кадәр дәвам итәчәк. Ял итегез, ялыгыз кызыклы гына түгел, файдалы да булсын! Ә район газетасы һәм «SAMINA TOUR» туристлык агентлыгы сезгә ярдәмгә килер!

Искәрмә: үзегезгә ошаган катнашучыга “Арча хәбәрләре” газетасының татар һәм рус сайтларында тавыш бирә аласыз. Барыгызны да бәйгедә катнашырга чакырабыз!
Гөлназ ГЫЙНИАТУЛЛИНА