Булат бездә кунакта

Булат бездә кунакта
Һәр ата-ана үз баласы белән горурлана. Шушмабаштан Флера белән Тәлгать Низамовлар да уллары Булатның уңышларына сөенеп бетә алмый. Без дә Булатның жиңүләре турында ишетеп торабыз. Менә бит, нинди яшьләребез бар, дип үзара сөйләшеп алабыз. Булатның үзен күреп сөйләшү теләге күптән туса да, эш көннәрендә студентның Казаннан Арчага кайтырга җае чыкмады. Ниһаять, Булат әтисе Тәлгать Низамов белән редакциядә кунакта.
Булат озын буйлы егет. Кечкенәдән биеп, көрәшеп үскәнгәдер инде, хәер, буй дигәнең нәселдән килә, диләр.
— 11нче сыйныфка кадәр көрәштем, — ди Булат.
Көрәш буенча бүләкләрне алып кына тора ул. Телевизор, микродулкынлы мич, тузан суырткыч... Республика күләмендәге татар-башкорт көрәшендә дә егет үзен таныта, призлы урыннарны ала.
— Медальләре бер кочак, — ди әнисе Флера ханым. — Барлык бүләкләрен җыеп куйдык. Улым, югалтма, балаларыңа күрсәтерсең, дим. И-и, бакчадан ук шундый булды инде ул безнең, биергә дисеңме, шигырь сөйләргәме — ул беренче, мәктәптә укыганда француз теленнән халыкара “Иң яхшы актер” бәйгесендә катнашып, Рәхмәт хатына кадәр алды. Үзе инде ул, үзе шундый тиктормас, эзләнүчән...
Флера ханым “Северный” хуҗалыгында хисапчы булып эшли, Тәлгать әфәнде шушында ук озак еллар баш хисапчы хезмәтен башкарган белгеч.
Булат компьютерга утыргач та, мәгънәсез, буш шөгыльләр белән мавыкмый. Аның сәләтен күреп алган информатика укытучысы Илнар Нуриҗанов “Яшь программачы” проектларында катнашырга тәкъдим ясый. Теләсә кайсы темага алынырга мөмкинлек бар. Булат 2012 елда мәктәптә укыту буенча проект эшләсә, 2013 елда авыл хуҗалыгында чәчү әйләнеше буенча проект иҗат итә. Эзләнүләр, түземлек, тырыш хезмәт үзенең җимешләрен бирә — 2013 елда егеткә җиңү килә! Ул гынамы, “Мәгариф” өстенлекле илкүләм проекты кысаларында оештырылган “Сәләтле яшьләр” бәйгесендә катнашып, җиңү яулый. Россия Федерациясе Мәгариф һәм фән министрлыгының Дипломы һәм премия белән бүләкләнә.
— Булат шикелле сәләтле балалар сирәк була, — ди информатика укытучысы Илнар Нуриҗанов. — Мөстәкыйль эшли белә торган, эзләнүчән егет. Үзе Интернет аша кызыксынган сорауларына җаваплар эзләп таба иде. Лекцияләрне табып укый, сораулар бирә. Кешенең үзеннән һәм өйдәгеләрдән дә тора бу.
2013 елда Шушмабаш мәктәбен тәмамлап, бүген Казан дәүләт энергетика университетында программачы белгечлегенә укый. “Relax” яшьләр бию ансамбленә йөри башлый.
— Бик җитди ансамбль, — ди Булат. — Анда сайлап кына алалар. Буй да булсын, көч тә, түземлек, җитезлек, тырышлык та кирәк. Татарстанның 9 Май, Сабантуй һәм башка шундый зур бәйрәмнәрендә чыгыш ясыйбыз. Өчәр сәгать шөгыльләнәбез.
Быел җәйге студентлар форумында да катнашу теләге белән яна ул. Интернет аша гариза яза. Сөйләшүгә чакыралар һәм студентлар форумына юллама бирәләр. Вакыйгалар эчендә кайнарга яраткан егет форумнан күп нәрсә ала. Яңа дуслар таба, алда бару, әйдәп бару, үз фикереңне әйтә белү, башкалардан үзеңдә булмаган кыйммәтләрне алу, камилләштерү сыйфатларын үзләштерә. Яшьләр шундый булырга тиеш.
Булат кечкенәдән бик хәрәкәтчән бала була. Тиктормасларның ми эшчәнлеге әйбәт үсә, ди медиклар. Әнә шул кызыксынучанлыгы нәни вакыттан тик тотмаган аны! Булатка уңышлар телибез!
Румия НАДРШИНА