Сәламәтлекне акчага алыштырып булмый

Сәламәтлекне акчага алыштырып булмый
Безнең районда ташламалардан файдаланучы 8686 инвалид бар, шуларның 3 меңгә якыны бушлай дару ала, калганнар социаль пакеттан, төгәлрәге бушлай дару алудан баш тартып акчалата алуны кулай күрә. Ләкин авыруың көчәеп китеп кыйммәтле дару таләп ителсә, 671 сум акча нәрсәгә генә җитә соң?
Район хастаханәсенең поликлиника эшләре буенча баш табиб урынбасары Лилия Фәйзрахманованың борчылуы юкка түгел. “Быел Федераль программа буенча елга 27 млн. сумга якын һәм тагын берничә төр диагнозлыларга махсус программа буенча 9 млн. сумлык дару кайтарту каралган. Федераль программа иминиятләү принцибы белән эшли. Гомуми кассага бар акча җыела, шул авыруларга бүленә: кемгә нинди дару кирәк, нинди бәядән. Берәүләргә ул сумма күп кирәк булса, кемдер арзанрак дару кулланырга мөмкин. Һәр авыруга дару җитсен өчен эшләнгән ул программа. Әгәр 5000ләп авыру социаль пакеттан баш тартмаса, районга дарулар да күп кайтыр иде”, — ди ул.
Социаль пакеттан баш тартуның сәбәбен өлкәннәрдән еш ишетергә туры килә —дару алырга дип язылган рецепт дарулар булмыйча кулда кала да, озакламый вакыты чыга. Авылларда яшәүчеләрнең гел Арчага килеп йөрергә җае чыкмый. Күп авылларда хәзер даруны фельдшерлар алып кайтып бирүгә көйләсәләр дә, авырулар барыбер акча алуны өстен күрә.
—Бүленгән акча исәбе буенча район республикада бишенче урында тора. Акча әйләнешенең күләме зур, шунлыктан, без кыйммәтле даруларны ала алабыз. Даруханәгә хәзер дару айга ике тапкыр кайта, бу кешегә җайлы булсын өчен эшләнә, — ди Лилия Фәйзрахманова. — Әмма кайчак наркотик матдәләр кушылган дарулар кулланучы яки шикәр диабеты белән авыручылар арасында да баш тартучылар очрый. Ә диабет белән авыручыларга елга 35683 сумлык дару кирәк. Авырулар акчага алдана, ләкин сәламәтлекне акчага алыштырып булмый. 1нче төркем инвалид социаль пакеттан берничек баш тарта алмый, ул һәркөнне дәвага мохтаҗ. Шулай булуга карамастан, районда алар арасында да баш тартып акча алырга гариза язучылар бар. Авыручылар арасында елга берничә йөз мең сумлык дару белән даими дәваланып яшәүчеләр бар. Бер ханым хәтта даими рәвештә дәвалану курслары узып, кыйм-мәтле дарулар кабул итеп бала таба алды, аның дәвалану курсы хәзер бала тапканнан соң да дәвам итә. Авыручылар арасында зур гаиләнең җылысын саклап яшәүче ханымнар бар, алар һәрдаим кыйммәтле дарулар кабул итеп тормышларын да алып бара.
Сәламәтлекне акчага сатып алып булмый, дибез, тик нык авырып китсәң, дарусыз да дәваланып булмый. Дарулардан баш тартырга ният кылганчы иң элек ныклап уйлап эш итегез, ялгышмыйсызмы? Әгәр ел буена ташламалы дару кулланып яшәргә уйласагыз, 1 октябрьдән дә соңга калмыйча Арча һәм Әтнә районнары буенча Пенсия фонды идарәсенә килеп социаль пакеттан баш тартмавыгыз турында гариза язып китәргә кирәк. Кыйммәтле дарулар кулланып яшисез икән, дарудан баш тартмавыгыз хәерле.
Розалия ЗИННӘТОВА