Сөенечләр белән тулы көн

Сөенечләр белән тулы көн
4 сентябрьдә районда игътибарга лаеклы өч вакыйга булды. Алар барысы да республикада гамәлдә булган программаларга бәйле.
Наласа авылында үткән тантананы муниципаль район башлыгы Алмас Назиров тарихи дип атады. Чөнки авылда мондый медпунктлар һаман ачылып тормый. Авыруларны әйткән дә юк, сәламәт кеше өчен дә кирәк бу бинаның булуы һәм эшләп торуы. Күңелдә ул ышаныч тудыра, безнең турында да кайгырталар дигән фикер уята. Район хастаханәсенең баш табибы Тәлгать Баһаветдинов бу фельдшер–акушерлык пунктының шушы авылга гына хезмәт күрсәтүен билгеләп үтте. Ә мондый бәхет һәр авылга тәтеми.
Алмас Әминович Наласа халкының, хуҗалыкның тырыш хезмәт белән яшәвен әйтте, районда башкарыла торган эшләр турында сөйләде. Районыбыз үсеше өчен республика җитәкчелеге зур ярдәм күрсәтә. Сәламәтлек иң кирәк әйбер, районыбызда бу мәсьә-ләгә дә җитди игътибар бирелә.
— Авылга ямь биреп, нур өстәп тора бу бина, — диде ул. — Монда авырып түгел, ә профилактика өчен генә килергә язсын.
Мөдир Равия Зарипова моңа кадәр дә авыл халкына озак еллар игелекле хезмәт күрсәткән. Ул да шатлыгы белән уртаклашты, рәхмәт сүзләре җиткерде.
Быел Айван, Төбәк–Чокырча авылларында яшәүчеләр өчен дә шатлыклы вакыйгалар булып тора. Арчаның 7нче урта мәктәбе бинасы ныклап төзекләндерелгәннән соң танымаслык булып үзгәрде. Ерак та түгел спорт мәйданчыгы төзе-лә, аның янәшәсендә яңа фельдшер–акушерлык пункты калкып чыкты. Әле болар гына түгел.
— Шәһәр көньякка таба үсә, — диде яңа пунктны ачу тантанасында муниципаль район башлыгы Алмас Назиров. — Бу якта бер мең гаиләгә йорт урыны бирелде. 260 урынлы балалар бакчасы төзелеп бетеп килә.
Район хастаханәсенең баш табибы Тәлгать Баһаветдинов, яңа пункт игелекле хезмәт итсен, дип теләде. Авыл халкы исеменнән җитәкче-ләргә, төзүчеләргә Гөл-зилә Миңнуллина рәхмәт җиткерде.
Әлеге ике пунктны да “Водоканал–Сервис” ширкәте җиренә җиткереп урнаштырган.
Бу көнне шәһәрнең Пушкин урамында 15 фатирлы йортны тапшыру тантанасы булды. Муниципаль район башлыгы Алмас Назиров ике ветеранга һәм социаль ипотека программасы буенча бәхет елмайган гаиләләргә фатир ачкычлары тапшырды.
— Әлеге йортны төзегән “Энергосервис” ширкәтенә (җитәкчесе Рамил Әхмәтгалиев), өлешләре кергән башка оешмаларга зур рәхмәт! — диде ул. — Эшләнгән эшләр күп, башкарасылары тагын да күбрәк, безнең район халкы тырыш. Без киләчәктә дә күрсәтелгән ышанычны акларга сәләтле.
— Шәһәребез көннән–көн матурлана, — диде яңа фатир ачкычы алган Эльвира Хәкимҗанова. — Килгән кунакларга горурланып күрсәтеп йөрибез Арчабызны. Без анда яшәвебез белән бәхетле!
Ильяс ФӘТТАХОВ