Монда чын сәнгать

Монда чын сәнгать
5 сентябрьдә Арчада “Балкыш” үзешчән башкаручы ветераннарның зона фестиваленә сайлап алу туры узды.
Арча, Биектау, Әтнә, Лаеш районнары һәвәскәрләренең чыгышын карарга район башлыгы урынбасары Любовь Осина һәм Татарстан Республикасы ветераннар советы рәисе Хәбир Иштирәков килгән иде. Ветераннарның шатлыгын уртаклашып, уңышлар теләп, рәхмәтләрен җиткереп чыгыш ясаганда соклануларын да яшермәде алар.
“Авыр вакытта да, җиңел чакта да халкыбыз моңланып, эчтән генә булса да көйләп яшәгән. Сәхнәдә ул шул моңын дөньяга чыгара, башкалар белән уртаклаша. Бүген биредә гүзәллек хөкем сөрә: һәр катнашучы шул гүзәллекнең бер өлеше. Фестивальнең киләчәге дәвамлы булсын иде”,— дигән фикер-ләрен әйтте жюри рәисе, Курса–Почмак чишмәләренең шифалы суларын эчеп үскән якташыбыз, Татарстанның халык артисты Шамил Әхмәтҗанов. Якташлары турында горурлануын да яшермәде: “Туган ягыма, туган туфрагыма кайту миңа бигрәк тә рәхәт. Монда кайту безгә — жюридагыларга сөенеч. Өченче тапкыр шушы эш белән мәшгульмен. Халкымның киң күңелле булуы, сәнгатькә бирелгәнлеге үзе горурлык”.
Горурланмаслык мени!? Инде гомер көзенең капкасын ачып керергә әзерләнү-че һәм шул капкадан узган өлкәннәребез арасында (буген алар 80 кеше катнашты) сәхнә тотучы нинди талант ияләре бар! Аланнан Ләюзә Низамиева, Мөрә-ледән Халидә Газизованың (Халидә апа ул “Балкыш”ның лауреаты инде) үзәк өзгеч моң белән халык җырларын башкаруларын, җирле шагыйрә Факия Шәрәфетдинованың үзе иҗат иткән шигырен күңелләргә үтеп керерлек итеп укуын тыңлау өчен генә дә килерлек шул Арчага. Ә ансамбльләр ни тора! Берсеннән-берсе талантлы кешеләр ярдәмендә оешып, ничә еллар сәхнә тотып яши питомник клубының “Яшь йөрәкләр”, Арчаның көньяк өлешендәге мәдәни-спорт үзәге каршындагы вокаль, район ветераннар советы каршында эшләп килүче “Кубызчылар” инструменталь ансамб-льләре. Район ветераннар советының татар хоры һәм район Мәдәният йорты ветераннарының хор, мәдәни-спорт үзәге каршындагы фольклор коллективларының чыгышлары ветераннарның сәләтен тагын да ача сыман. Чөнки берничә тавыш белән җырлау өчен сәләт тә, тырышлык та күп сорала. Сәхнә тәмен яшьтән татып үскән Илфат Әскәровның рус халык биюен башкаруы (өлкән яшькә таба барса да) аңарда никадәр дәрман барлыгын күпләргә үрнәк итеп куя.
— Сайлап алуга килгәндә, жюрига эш бик күп. Мондый халыкчан чаралар яшьләр өчен үрнәк. Алар урынында булсам, бер дә калдырмыйча карап барыр идем. Монда чын сәнгать! — ди Шамил абый.
Октябрь аенда Казанда узачак “Балкыш” фестиваленә кемнәрнең барачагы соңрак билгеле була. Чөнки жюриның әле тагын берничә зона районында булып талантлыларны барлап бетерәсе бар.
Розалия ЗИННӘТОВА