Эшмәкәрләргә — дәүләт ярдәме

Эшмәкәрләргә — дәүләт ярдәме
Район башкарма комитеты эшмәкәрлеккә дәүләт ярдәме мәсьәләләре буенча киңәшмә үткәрде. Аны район башкарма комитеты җитәкчесенең беренче урынбасары Эльмира Хәстиева алып барды.
Район эшмәкәрләре әледән–әле җыелып тора. Җыелган саен эшмәкәрлекне алга таба тагын да ничек үстереп булуы, нинди сораулар борчуы, аларны хәл итү юллары, дәүләт ярдәме турында эшлекле сөйләшү үткәрелә.
Киңәшмәгә Казаннан төрле министрлык һәм ведомство вәкилләре кайткан иде. Эшмәкәрләргә үзләрен кызыксындырган сорауларга җавап алу мөмкинлеге булды. Кунакларга сүз бирер алдыннан Эльмира Хәстиева чыгыш ясады.
— Районда эшмәкәрлекнең роле зур, — дип сөйләде ул. — Эшмәкәрләр кешене эш белән тәэмин итә, бюджетка салым кертә, нәтиҗәдә халыкның тормыш дәрәҗәсе яхшыра. Районда барысы 879 шәхси эшмәкәр, 29 крестьян-фермер хуҗалыгы бар. Соңгы вакытта кече һәм урта бизнеста бераз үсеш күзәтелә. Район хакимияте алга таба да бизнес үсеше өчен барлык мөмкинлекләрне һәм шартларны тудырачак.
Районда бүген уртача хезмәт хакы 18600 сум тәшкил итә. Ә менә кече һәм урта бизнеста 10 мең сумнан артмый.
Конверт белән “соры хезмәт хакы” бирүне тормыштан тулысы белән сызып ташлыйсы бар. Кешене киләчәксез итү, пенсиясез калдыру, дигән сүз бу.
Рәсми рәвештә теркәлмичә эшмәкәрлек итү — шулай ук җитди проблема. Кызганычка каршы, мондый очраклар бар. Бердән алар бюджетка салым кертүдән качса, икенчедән, бу аларның үзләре өчен зыянга, чөнки Пенсия фондына взнослары керми, димәк, стажлары да бармаячак һәм пенсияләре дә булмаячак.
Районда халыкның тормышын яхшырту максатыннан Россия һәм республика күләмендәге 26 программа эшли. Соңгы ике елда районда 850 млн. сумлык социаль һәм инфраструктура проектлары тормышка ашырылды. Шәхси эшмәкәрләргә дәүләт программаларыннан файдаланып калырга кирәк.
Киңәшмәдә Татарстан Республикасы Авыл хуҗалыгы һәм азык-төлек министрлыгының агробизнесны үстерү бүлеге җитәкчесе урынбасары Фәнис Рәфыйков, төрле программаларда катнашып, грант оту мөмкинлекләре турында сөйләде. Моның өчен документларны тиешенчә әзерләп тапшырырга һәм аларның язмышы белән кызыксынып торырга киңәш итте. Чөнки акча белән бәйле һәр эш төгәллек сорый. Фәнис Рәфыйков “2014 елда Татарстан Республикасында гаилә фермаларын үстерү” программасы буенча грант откан дүрт гаиләгә сертификатлар тапшырды. Сертификат алган Тәлгать Шиһабиев проектны Иске Йортта тормышка ашыра, Айгөл Хәкимуллина — Субаш Атыда, Ринат Минһаҗев — Өчиледә, Мансур Хөснетдинов — Шушмабашта.
“Татарстан Республикасы эшмәкәрлеккә ярдәм итү үзәге” идарәсе баш белгече Эвелина Федянина:
— 2 сентябрьдән “Лизинг Грант” программасының икенче өлешендә катнашу өчен гаризалар кабул ителә башлады, — дип хәбәр итте. — Конкурс гаризалары 2 октябрьгә кадәр каралачак. Программа кече һәм урта эшмәкәрлеккә дәүләт ярдәме күрсәтүгә юнәлдерелгән.
Программада шулай ук эшмәкәрлекне яңа башлаучылар да катнаша ала. Сәнәгать мәйданчыкларында эшләүчеләр һәм авыл хуҗалыгы белән шөгыльләнүче эшмәкәрләргә субсидия алу шартлары үзгәргән. Эшмәкәрлекне яңа башлаучыларга 1 млн. сумга кадәр субсидия каралган, бизнес белән шөгыльләнүчеләргә, ТРның Авыл хуҗалыгы министрлыгы программасы кысаларында проектны тормышка ашыручы гаилә фермаларына 3 млн. сумга кадәр.
Киңәшмәдә клиентлар белән эшләү механизмы көйләнгән лизинг компанияләре, банк вәкилләре эшмәкәрләргә үз хезмәтләрен тәкъдим итте.
Районның «Алгарыш» эшмәкәрләр берлеге җитәкчесе Назыйм Сибагатов эшмәкәрләргә:
— Бары тик үзара эшлекле мөнәсәбәт кенә мәсьәләләрне уңай хәл итәргә ярдәм итәчәк, — диде.
Соңыннан кече һәм урта бизнесны үстерүгә зур өлеш керткән эшмәкәрләр Мактау грамоталары һәм Рәхмәт хатлары белән бүләкләнде.
Румия НАДРШИНА