Чиратта — бәрәңге алу

Чиратта — бәрәңге алу
5 сентябрьдә ТР Президенты Рөстәм Миңнеханов катнашында видеоконференция режимында үткән киңәшмәдә авыл хуҗалыгы һәм азык–төлек министры Марат Әхмәтов соңгы көннәрдә яңгырлы һава торуын, моның урып–җыю эшләренә комачаулык итүен әйтеп үтте.
“Урып–җыюны һәм көзге культуралар чәчүне төгәлләргә өлгергәннәр өчен бик шәп һава. Уҗымнар тишелә, туфрак дым белән туена, — диде ул. — Ә игеннәр тамырда утырганнарга шартлар, билгеле, урып–җыю өчен түгел”.
Марат Әхмәтов чагыштырмача әйбәт һава көтелгән якындагы 5–6 көндә эш темпын көчәйтергә кирәклеген искәртте.
Рөстәм Миңнеханов урып–җыюны алып бару өчен һәр мөмкинлекне файдаланырга чакырды.
Муниципаль район башлыгы Алмас Назиров, киңәшмәне дәвам итеп, техника начар файдаланыла, диде. Комбайннар басуда булырга тиеш. Хәзер бөртекләрнең дымлылыгы кимүгә исәп тотып булмый. Хуҗалыкларда сүлпәнлек сизелә, чәчү сроклары үтә, бу эшне дә кызулатырга кирәк. Соңга калып чәчелгән басуларда уңыш булмаячак.
Терлекләрне лагерьлардан кайтарып бетерергә, продукциянең кимүенә юл куймаска.
Авыл җирлекләре чисталык буенча начар эшли, урамнар күңелсез хәлдә. Зур Бирәзә авылын чүп үләннәр басып киткән, андый авыллар тагын бар.
Ярминкәләр сезоны башланды. Аларда актив катнашырга.
Район башкарма комитеты бәрәңге алуны оешкан төстә үткәрү максатында карар кабул итте. Авыл хуҗалыгы оешмаларына бәрәңге алуга килешү нигезендә эшкә яраклы халыкны, студентларны, укучыларны тарту тәкъдим ителә. Эшләүчеләргә кызыксындыру чаралары кулланырга, хезмәтне саклау һәм техника куркынычсызлыгы кагыйдәләрен төгәл үтәргә.
Бәрәңге уңышын җыйнап алу барышына оператив җитәкчелек итү өчен район штабы төзелде.
Кыр эшләренә килгәндә, 9 сентябрьгә игеннәрнең 81 проценты җыйнап алынды. “Ватан”да — 96, “Татарстан”да — 94, “Курса МТСы”нда, “Акчишмә”дә — 93әр, “Северный”, “Ак барс агрокомплексы”, “Кырлай”да 91 процент.
Урып–җыясы иң күп мәйданнар “Арча” һәм “Мәрҗани” ширкәтләрендә.
Бер гектардан иң югары уңыш “Ак барс агрокомплексы”нда — 45, “Игенче”дә — 44,6, “Кырлай”да — 38,3, “Курса МТСы”нда 37,6 центнер. “Арча” ширкәтендә 12,7 центнер гына.
14498 гектарда көзге культуралар чәчелде. “Нива” белән Шиһабеддинов хуҗалыкларында гына чәчмиләр. “Арча” ширкәтендә чәчелгән мәйданнар бик аз.
Ширкәтләрдә һәм крестьян–фермер хуҗалыкларында 1200 гектарга якын бәрәңге үстерелде. Аларны алу өчен 12 комбайн бар. “Кырлай” ширкәтенә быел сәгатенә 2–3 гектар бәрәңге ала торган комбайн кайтты. Сабагын да үзе урып бара, тәүлек буе эшли.
Һава торышы әйбәт булганда хәзер кул көченә мохтаҗлык юк. “Кырлай”дагы яңа комбайнда бер генә кеше эшли.
Ильяс ФӘТТАХОВ