Алар зур спортка омтыла

Алар зур спортка омтыла
«Заман» ширкәте җитәкчесе Илнур Яруллин редакциягә күңелле хәбәрләр алып килде.
— Менә бит, биатлончы яшьләребез җиңү яулый башлады! — диде ул һәм уңышларны санап чыкты. Аннан сүзен дәвам итте:
— Биатлончыларны бик хөрмәт итәм, аларга хәлемнән килгәнчә булышам, ярышлар оештырабыз. Ә нинди кыен спорт төре белән шөгыльләнә алар?! Районда без башладык инде аны...
Искә төшерик, Кышкы Олимпия Уеннарына Татарстаннан 8 спортчы барып, берсе дә медаль белән кайта алмады. Республика күләмендә кышкы спорт уеннарын үстерү максат итеп куелды.
Районда биатлончылар әзерләү буенча безнең Арчада да боз кузгалды дисәк була. Район башлыгы Алмас Назиров үзәк стадионда яңа чаңгы базасында булды, спортчылар, тренерлар белән очрашты. Биатлончылар командасына Олимпиадада 7нче урынны алган Биектау кызы Анастасия Жукованың 6 пар чаңгысын сатып алдылар. Ижевскидан кыйммәтле дүрт биатлон винтовкасы алып кайттылар. Якын–тирә районнарда андый винтовкалар юк, диләр.
Чаңгычы, биатлончыларның кичке күнегүләре вакытында стадионга төш-тем. Эшмәкәр Илнур Яруллин анда тәмам үз кеше булып беткән.
Тренер Рәис Камалов чаңгы спортына булышучыларга бик рәхмәтле. Район башлыгы Алмас Назировка зур рәхмәт әйтә ул. Иганәчеләр “Заман” ширкәте җитәкчесе Илнур Яруллин, “Арча КСМы” ширкәте җитәкчесе Рафаэль Муллагалиев, “Татавтодор”ның Арча филиалы җитәкчесе Альберт Сафиев, “Жилкомбытсервис” ширкәте җитәкчесе Альберт Хәкимов, “Энергосервис” ширкәте җитәкчесе Рамил Әхмәтгалиев та кышкы спорт уеннарын үстерүгә үз өлешләрен кертәләр.
— Моннан 5-6 ел элек чаңгы секциясен эшмәкәр Фәнил Гарәфиев (мәрхүм) белән башлап җибәрдек, — дип сөйли Рәис Камалов. — Менә хәзер әкренләп биатлонга кереп барабыз. Зур чыгымнар сорый торган кыйммәтле спорт төре бу. Иганәчеләр ярдәменнән башка булмый. Бер биатлончыга уртача 200 мең сумлык кием, чаңгы, винтовка һәм башка кирәк–ярак кирәк. Зур ярышларда катнашырлык чын спортчы әзерлим дисәң, барысы да тиешле дәрәҗәдә булырга тиеш: кием, туклану, күнегүләр, спорт җиһазлары, шөгыльләнү урыны...
Рәис Камаловны үз эшенә фанатларча бирелгән тренер, диләр. Ә андыйлар гадәттә, юмарт була, кесәсендәге акчаны санап тормый, нәкъ Рәис кебек. Ул үзе дә кечкенәдән спорт белән шөгыльләнгән. Җиңүләре дә бар. Башка өлкәдә хезмәт итсә дә, эшмәкәр дә әле ул, сәләтле яшьләрне зур спортка чыгару өчен тырыша. Авыл мәктәпләреннән дә спортчыларны җәлеп итә. Ярышларда да көчле чаңгычыларны күреп ала.
Җәен үзәк стадионда чаңгы урынына роликлар белән шуу өчен трасса яңартылган. Арчаның шәрыкъ өлешендәге тауны кисеп, кышка чаңгы трассасы эшләнгән. Менә дигән чаңгы базасы булдырылган. Кыскасы, яшьләргә шөгыльләнү өчен барлык мөмкинлекләр дә тудырылган.
— Атнага 6 тапкыр 2шәр–3әр сәгать шөгыльләнәбез, — дип сөйли Түбән Курса мәктәбенең 9 сыйныф укучысы Фәнүзә Сәләхова. — Көн саен йөгерүләр 30–40 километрга туладыр. Шимбә, якшәмбе көннәрендә иртән һәм кичен шөгыльләнәбез. Әти машина белән стадионга китерә, алып кайта. 12 яшьтән чаңгыда. 2012 елда Татарстанда чаңгы ярышында 2нче урынны, 2013 елда 3нче, 2нче урыннарны алдым. Максат — Олимпия Уеннарында җиңү!
Түбән Мәтәскә мәктәбенең 10 сыйныф укучысы Лилия Рәхмәтуллина:
— 2 ел чаңгы, биатлон белән шөгыльләнәм, — ди. — 28 августта Ижевскида үткән биатлон ярышында 1нче урынны алдым! Смоленскига ярышка барырга әзерләнәм. Максатым, әлбәттә, спортта карьера ясау!
Диләрә Фассалова Арчаның 1нче мәктәбендә 8 сыйныфта укый. 2нче сыйныфтан чаңгыда. Республика күләмендә чаңгы буенча призлы урыннар алган өметле спортчы. 1нче мәктәптән Илназ Ибәтуллин республикада биатлон буенча җыелма команда составында, 2нче мәктәптән Ренат Зиатдинов шулай ук республикада көчле чаңгычылар исәбендә.
Зур спортка омтылган яшьләр, тренерлар соклану уята. Олимпия уеннарында катнашып, җиңәргә насыйп булса иде!
Румия САТТАРОВА