Яклаучы профсоюз

Яклаучы профсоюз
Район мәгариф учреждениеләре профсоюз оешмалары советының хисап–сайлау конференциясе булды. Анда Татарстан Республикасы халык мәгарифе һәм фән хезмәткәрләре Профсоюзы комитетының хезмәт хокуклары буенча баш инспекторы Диләрә Бургуева катнашты.
Совет җитәкчесе Вакыйф Харисов 2009 елның октябреннән 2014 елның сентябренә кадәрге чорда эшләнгәннәр турында хисап тотты. Ә эшләнгәннәр миллионнарча сумнар белән исәпләнә. Бер санга тукталып, профсоюз лидерының үзе турында әйтеп үтәсе килә. Педагогларның мәгариф өлкәсендә хезмәт иткән елларына карап пенсия билгеләү буенча суд аша 106 эшне отып, 24 млн. сумнан артык файда эшләнгән!
Вакыйф Вагыйз улы 10 ел инде менә район мәгариф учреждениеләре профсоюз оешмалары советын җитәкли. 50 яшьлек юбилее белән дә котлыйбыз үзен. 2009 елда икенче югары белем алуын да әйтеп үтәсе килә. Хокук фәннәре белгечлеген ала. Профсоюз әгъзаларының хезмәт һәм социаль–икътисад хокукларын яклау буенча диплом эшен яклый. Хәтта дәүләт комиссия-се аны аспирантурага тәкъдим итә. Сүз уңаеннан шуны да әйтим, Вакыйф Харисов Россия Федерациясенең халык мәгарифе һәм фән хезмәткәрләре профсоюзының Татарстан Республикасы комитеты хокуклар Советы әгъзасы, төньяк–көнбатыштагы 10 район кергән Арча төбәге җитәкчесе. 2010 елда республиканың “Хокуклар эшен иң яхшы оештыручы һәм яктыртучы” бәйгесендә җиңүче. Юриспруденция белгечлеге аңа профсоюз әгъзаларының хокукларын белеп, дөрес итеп аңлату һәм яклау өчен кирәк була.
Профсоюз нәкъ менә гади хезмәт кешесенең эш бирүче алдында үз проблемасы белән ялгыз калмавы өчен кирәк тә. Профсоюз лидерына нинди генә мәсьәләләрне ачыкларга һәм якларга туры килми, күбесе аларның стажга бәйле.
— Профсоюз әгъзаларының үзләренә дә хокукларны белергә кирәк, — ди Вакыйф Харисов. — Моның өчен төрле чаралар оештырыла: семинарлар, киңәшмә, җыелышлар үткәрәбез, очрашуга район Пенсия фонды идарәсе, социаль яклау бүлеге, иминиятләү, халыкны эш белән тәэмин итү, прокуратура хезмәткәрләрен чакырабыз.
Педагогларның хезмәт хакы артуында шулай ук профсоюзларның роле зур. Укытучыларның уртача хезмәт хакы 2010 елда 11401 сум булса, 2014 елда ул 29758 сумга күтәрелде.
— Хезмәт шартлары күпкә яхшырды, — дип сөйләде докладчы. — Соңгы 5 елда 11 мәктәп ныклап төзекләндерелде. Заманча 4нче балалар бакчасы төзелде, өр–яңа 9нчы бакча ачылу алдында. Педагогларның, коллективларның, дәүләт программалары нигезендә төрле бәйгеләрдә катнашып, грант отулары, шул акчага мәктәпләргә, бакчаларга төрле заманча җиһазлар сатып алынуы хезмәт шартларын камилләштерде.
Профсоюз оешмалары советы хезмәт-кәрләрнең сәламәтлеген кайгыртуга зур әһәмият бирә. Ташламалы бәяләр белән шифаханәләрдә дәваланалар. Коллективлар арасында төрле спорт ярышлары үткәрү һәм җиңүчеләргә бүләкләр тапшыру матур бер гадәткә кереп китте. Спартакиада нәтиҗәләре буенча 1нче урынны алган Яңа Кенәр лицее, 2нче урынны яулаган Арча агросәнәгать көллияте, 3нче урынга ия булган Арчаның 7нче мәктәбе һәм Лесхоз мәктәбе коллективларына Мактау грамоталары һәм кирәкле спорт җиһазлары алу өчен акчалата бүләк тапшырылды.
Казаннан кайткан хезмәт хокуклары буенча баш инспектор Диләрә Бургуева Арча районы профсоюз оешмалары советы җитәкчесе Вакыйф Харисов эшенә уңай бәя бирде һәм аңа үзәк Советның күкрәк билгесен тапшырды. Тыйнак профсоюз лидеры, дип атады ул аны.
— Безгә хезмәт хокуклары буенча сораулар күп керә, — дип сөйләде баш инспектор. — Соңгы вакытта Арчадан нинди мәсьәлә белән мөрәҗәгать иттеләр соң әле, дип хәтерләргә тырыштым, хәтерли алмадым. Димәк, сораулар булмаган. Аларны совет җитәкчесе урында хәл итеп барырга тырыша.
Конференциядә мәгариф хезмәткәр-ләре үзләренең профсоюз оешмалары Советы житәкчесе итеп бертавыштан Вакыйф Харисовны сайлады. Котлыйбыз сезне, Вакыйф Вагыйзович, эшегездә уңышлар телибез!
Румия НАДРШИНА