Халык тәкъдимнәре үтәлә

Халык тәкъдимнәре үтәлә
Шәһәр башкарма комитеты җитәкчесе Рафил Исмәгыйлев сүзләренә караганда, Арча урамнарын төзекләндерү дәвам итә.
“Бердәм Россия” сәяси партиясе инициативасы белән Арча шәһәрендә үткәрелгән халык җыеннарында шәһәребездә яшәүчеләр урамнарны төзекләндерү буенча тәкъдимнәрен әйттеләр.
Бу аңлашыла да, чөнки шәһәрдә зур тизлек белән социаль объектлар, күп фатирлы йортлар төзелә, яңа микрорайоннар, урамнар барлыкка килә. Үзеннән–үзе урамнарны төзекләндерү мәсьәләсе алга килеп баса. Элеккеге урамнарны төзекләндерү, тузган юлларны яңарту мәсьәләләре дә даими рәвештә хәл итүне сорый. Арчада урамнарны төзекләндерү шәһәрнең иң төп проблемаларының берсе булып тора.
Арчада халык җыеннарында әйтелгән тәкъдимнәрне тормышка ашыру буенча нәрсәләр эшләнә соң? Казаннан килгән бер төркем телевидение журналистларын да шушы сорау кызыксындырды.
Без килгәндә Арчаның шәрыкъ өлешендәге Космонавтлар урамында тулы көчкә эш бара иде. Балтач районара юллар системасы эшчеләре урамга асфальт җәя.
— Юл бик нык тузган иде, — дип сөйли шушы урамда яшәүче Рәвис Сафин. — Җәяүлеләргә, машина белән йөрүчеләргә чокыр–чакырлы юлдан хәрәкәт итүе кыен булды. Бу юлны бик көттек инде без. Рәхмәт, район җитәкчелегенә, юлчыларга, күргәнегезчә, урамыбызга нинди тигез, нык асфальт түшәлә. Бик куанабыз без моңа.
Шәһәр башкарма комитеты җитәкчесе Рафил Исмәгыйлев журналистларның сорауларына җавап бирде.
— Халык җыеннарында әйтелгән тәкъдимнәр буенча Арча шәһәрендә урам-юл челтәрен төзекләндерү буенча иң мөһим эшләрнең планы төзелде. Ул тормышка ашырыла башлады, — дип сөйләде Рафил Исмәгыйлев. — Халык соравы, тәкъдим-нәрен истә тотып, аларның мәнфәгатьләрен кайгыртып, шәһәрне төзекләндерәбез. Быел шәрыкъ өлешендә Н. Сафин, ВЛКСМның 70 еллыгы урамнарына асфальт түшәдек. Космонавтлар урамына асфальт жәябез менә. Урамнар төзекләндерелгәч, яңа автобус маршрутлары ачу өчен дә мөмкинлекләр туа. Юллар дәүләт программалары нигезендә төзелә, яңартыла. Халыкны чиста су белән тәэмин итү юнәлешендә дә билгеле күләмдә эш алып барыла. Арча станциясендә яңа кое скважинасы эшләнде. 3–4 ел эчендә бу мәсьәләне тулысы белән хәл итеп бетерербез, дип уйлыйм. Балалар мәйданчыкларын, тротуарларны төзү дәвам итә. Шәһәргә зур, заманча мәдәният үзәге дә кирәк.
Румия НАДРШИНА