Караш төрлечә

Караш төрлечә
11 сентябрьгә район хуҗалыкларында бер шартлы терлеккә 25 центнердан артык азык берәмлеге әзерләнде. “Кырлай”да — 33,6, “Ак барс” агрокомплексы”нда — 32,2, “Игенче”дә 29 центнер.
Иң аз азык Шиһабеддинов хуҗалыгында — 14,8, Сафиуллинда — 14,9, “Акчишмә”дә — 16,3, “Арча”да — 21,4 центнер туры килә.
Ныклы азык базасыннан башка торып терлекчелекне алга җибәреп булмый. Әмма бу тармакта вак–төякләр юк. Фермаларны ныклап төзекләндерү, сенаж траншеялары төзү буенча республика программалары эшли. Быел безнең районда шул программалар кысаларында “Ватан”, “Северный”, “Ак барс” агрокомлексы”, “Курса МТСы” ширкәтләрендә терлек тораклары ныклап төзекләндерелә, “Татарстан”, “Курса МТСы”, “Северный”, Сафиуллин, Әсхәдуллин хуҗалыкларында сенаж траншеялары төзелә.
Терлекләрне җәйге лагерьларга вакытында чыгару, кайтару, терлекчеләр, белгечләр хезмәтенә тиешенчә түләү кебек мөһим мәсьәләләрне дә игътибардан ычкындырырга ярамый. Район авыл хуҗалыгы һәм азык–төлек идарәсе белгечләре ел саен көзге салкыннар башлангач малларыгызны лагерьдан кайтарыгыз дип, хуҗалык җитәкчеләрен үгетләп йөри. Юньле хуҗа үз малын салкын яңгыр астында ачык һавада тота мени?
Авыл хуҗалыгы һәм азык–төлек идарәсенең терлекчелек бүлеге консультанты Роберт Хәйретдинов әйтүенчә, 10 сентябрьгә “Арча” ширкәтенең “Арча” бүлекчәсендә генә сыерлар лагерьдан кайтарылмый калган. Без моның сәбәпләрен Божа фермасыннан ачыклый башларга булдык. Заманында бер мең баштан артык терлек асралган, бөтен республикага нәселле үгезләр һәм сыерлар сатып яткан ферма бу. Терлекчеләре алдынгылар исемлегенең иң башында иде. Бүген болар матур әкият кебек кенә тоела.
2–3 метрлы алабуталар арасыннан түбәләре генә ялтырап торган торакларга үтү җиңел булмады. Берничә ел элек кенә ныклап төзекләндерелгән иде алар. Өр–яңа тәрәзәләрнең кайберләрен салдырып алганнар. Сөт агарга тиешле торбалар да “аяклана” башлаган.
Бер торакта төзәтү эшләре бара. Шул әзер булгач, кайтачак икән сыерлар.
Җәйләүдә дә булдык. “283 сыер бар, — ди көтүче Илһам Гаскәров. — Айга 13 мең сум түлибез дигәннәр иде. Июньдә 3 мең сум бирделәр. Майдан бирле башка акча алган юк”.
Бүлекчә җитәкчесе Надир Мөхәммәдиевнең сүзе кыска булды: “Ферма мөдире дә, зоотехник та, агроном да, бригадир да, ындыр табагы мөдире дә — мин”.
Ильяс ФӘТТАХОВ