Без синең белән, Ясминә

Без синең белән, Ясминә
Беркөн көтмәгәндә өйгә якын туганым килеп керде. Күренеп тора, бик борчулы. Ни булганы белән кызыксынырга да өлгермәдем, елап җибәрде.
— Ике яшьлек оныгыбызда яман чир таптылар. Аны я Германиядә, я Израильдә генә дәвалап була, диделәр. Моның өчен 16 миллионнан артыграк акча кирәк. Фатир, машиналарны сатып та яртысын гына туплый алдык. Газета аша халыкка мөрәҗәгать итсәк, ярдәм кулы сузмаслар микән, — диде ул уңайсызланып кына.
Розалия һәм Рафаэль Мөхәммәтҗановларны мин яхшы беләм. Туган буларак кына түгел, кеше буларак та. Алар үз көчләре белән мал табып, читләр байлыгына кызыкмыйча, булганның кадерен белеп яшәргә күнеккән. Юк икән—юк. Башка юлын табалар, әмма бервакытта да соранып йөрмиләр. Димәк, бу юлы, чыннан да, хәл мөшкел.
— Борчылма, тынычлан әле. Хәзер кеше үзгәрде, кырысланды, дисәк тә, изгелеген югалтмады. Һичшиксез, ярдәм кулы сузачаклар. Гомере бетмәгән булса, оныгың да сәламәтләнер, Алла боерса, — дип тынычландырырга тырыштым.
Шулай дисәм дә, икеләнеп куйдым. Андыйлар күп бит хәзер, барысына булышырга берәүнең дә төпсез сандыгы юк. Тик юкка борчылган булып чыктым. “Арча” радиосы аша хәбәр бирү белән ярдәм кулы сузарга теләүчеләр шалтырата башлаган. Газета битендә белдерү чыккач, аларның саны тагын да арткан.
— Оныгыбызның авырып китүе ураза вакытына туры килде. Шунлыктан фитыр сәдакаларын бик күп кеше безгә китерде. Капкабыз ул көннәрдә ябылып та тормады. Бу кече күңелле, сабыйны сәламәтләндерү өчен соң-гы акчаларын да бирергә әзер торган кешеләргә нинди рәхмәтләр әйтсәм дә, аз булыр кебек. Тирәбездә яхшы кешеләр нинди күп икән бит! — диде Розалия ханым аларга тойгыларын, хисләрен ничек җиткерергә белмичә.— Оешмалар да бик зур ярдәм күрсәтте. Арча педагогика көллияте, “АСПК” акционерлык җәмгыяте, Арча сөт комбинаты, “Арча МСОсы” шир-кәте, “Гарәфиева” шәхси предприятиесе, “Бәләкәч” балалар бакчасы, икенче урта мәктәпнең тугызынчы кадетлар сыйныфы, “Арча хәбәрләре” газетасы редакциясе, “Арча” телерадиокомпаниясе, хәрби комиссариат, хәрби хезмәт ветераннарына һәм башка оешмалар җи-тәкчеләре, коллективлары-на, туганнарга, дусларга, күршеләргә, сабыйның язмышына битараф калмаган барлык киң күңелле кешеләргә чын күңелдән олы рәхмәтебезне белдерәбез.
Әйе, ул көннәрдә бар кеше шул бала өчен янып яшәде, диярсең. Минем кызыма ошаган дип бер белмәгән ханым зур суммада акча күчергән, икенчесе Мәскәүдә арзан гына бәядән фатирга керткән, Татарстанның танылган эстрада артистлары хәйрия концерты оештырган. Һәркем үзеннән кечкенә генә булса да өлеш кертергә тырышкан. Менә шуннан соң заман халыкны кырысландырды, кеше кайгысына ваемсызландырды, диген. Шундый пакь күңелле, саф йөрәкле асыл затлар белән тормыш ямьле дә инде. Рәхмәт сезгә, кешеләр.
Ә Ясминә хәзерге вакытта Мәскәүдә дәвалану курслары — химиотерапиянең беренче этабын уза. Чит илгә үк чыгып китә алмадылар. “Вакыт тар, соңга калуыгыз бар”, — диделәр. Сабый янында көн–төн әти–әнисе. Йөрәкләре күңел парәләре өчен әрнесә дә, тешне кысып түзәләр, төшенкелеккә бирелмиләр. Аллаһы Тәгалә аларга бетмәс–төкәнмәс сабырлыклар биргәндер, күрәсең. Хәзер бар өмет табибларда. Эшләре уңышлы барсын да, тырышлыклары бушка гына булмасын иде. Ясминәбез дә сәламәтләнеп чыксын. Бу якты, матур дөньяда әле ике ел гына яшәргә өлгергән нәни кызчыкка озын гомер насыйп булсын.
Гөлсинә ЗӘКИЕВА