Урынсыз геройлык

Урынсыз геройлык
ЮХИДИ идарәсе 20 августтан 20 сентябрьгә кадәр “Игътибар, балалар!” акциясе үткәрә. Бу көннәрдә юлларда, бигрәк тә балалар күп йөргән урыннарда контроль аеруча каты. Моннан тыш ЮХИДИнең Арча бүлекчәсе хезмәткәрләре тарафыннан белем бирү учреждениеләрендә төрле профилактик чаралар оештырыла.
— Җәйге каникул вакытында юл хәрәкәте кагыйдәләрен исләренә төшерү өчен кирәк ул. Балалар гына түгел, ата–аналар да кайчак бу хакта онытып җибәрә, — ди ЮХИДИ идарәсенең Арча бүлекчәсе җи-тәкчесе Илдар Нотфуллин. — Соңгы бер ай эчендә генә дә балаларны йөртү өчен махсус кресло кулланмаган 31 кешегә беркетмә төзелеп, 3әр мең сум штраф салынды. Ә өлкәннәр үзләре нинди үрнәк күрсәтә? 6 августтан бүгенге көнгә кадәр 155 транспорт белән идарә итүче куркынычсызлык каешы такмаган өчен 1000әр сум штрафка тартылды. Балалар катнашында 2 юл–транспорт һәлакәте булды.
23 августта көндез Сеҗе ягыннан кызу тизлек белән килгән “Ока” машинасы идарәне югалта һәм Сарай–Чокырча күпере янында каршы як полосага чыгып юл кырыена ава. Нәтиҗәдә, рульдәге хатын–кыз һәм баласы тән җәрәхәтләре ала. 10 сентябрьдә Арча–Яңа Кенәр юлында (Югары Бирәзә белән Өчиле арасында) “Калина” машинасы трактор арбасы артына килеп керә. Анда да рульдә хатын–кыз була. Үзенә дә, яшь баласына да зыян килә. Баланы утыртып юлга чыккансың икән, сак һәм игътибарлы булырга кирәк.
Россия Эчке эшләр министрлыгының Арча районы буенча бүлеге хезмәткәрләре тарафыннан август башыннан алып 5 рейд үткәрелгән. Шуларда барлыгы 972 юл хәрәкәте кагыйдәләрен бозу очраклары, 103 вак юл–транспорт һәлакәте теркәлгән, 5 авария кешеләр зыян күрү белән тәмамланган. Шунысы кызык, бу юлы җәяүлеләргә юл бирмәүчеләргә караганда кагыйдә бозган җәяүлеләр күбрәк. Монысы светофорга күнегеп бетә алмау нәтиҗәсе, күрәсең. Кызыл утка чыгучы 41 җәяүлегә 500әр сум штраф салынган инде. Машинаның алгы ян тәрәзәләрен каралту очраклары да ешаеп киткән. Алар күз күремен киметә, димәк, транспорт белән идарә итүченең үзенә генә начар. Шул хакта онытмасыннар иде. Аннан яшьләр арасында хәзер завод эшләп чыгарган конструкцияне бозып, машинаны түбәнәйтү модага кереп китте. Бу юлларда аварияләргә китерергә мөмкин.
— Сентябрь башында кергән яңалык буенча, юлда түбәнәйтелгән машиналар туктатылып, автостоянкага куела, теркәлү талоны да гамәлдән чыгарыла. ГОСТ таләпләренә килерлек итеп эшләп бетергәнче машина техник теркәлү үтә алмаячак, — ди Илдар Нотфуллин.
Бу чорда исерек килеш руль артына утырган 27 кеше тоткарланган.12 августта машина йөртү таныклыгы булмый торып та исерек килеш юлга чыккан берсе юл һаләкәтенә тарыган. Машинасы да үзенеке булмаган. Рөхсәт биргән хуҗасына хәзер зур суммада штраф түләргә туры киләчәк. Исерек килеш руль артына утырмаска кирәклеге турында күпме сүз алып барылса да, аларның саны кимеми. Бу очракта геройлыкның юньлегә илтмәячәге көн кебек ачык.
Гөлсинә ЗӘКИЕВА