ГТОның кайтуына сөенүчеләр бар

ГТОның кайтуына сөенүчеләр бар
2014 елның мартында Президент Владимир Путинның ГТОны (“Хезмәткә һәм оборонага әзер бул”) гамәлгә кертү турында фәрманы чыкты. Мәктәпләргә һәм башка уку йортларына яңадан ГТО Бөтенроссия физкультура-спорт комплексы кире кайтты.
ГТО комплексын тормышка ашыру буенча Россиянең 12 төбәгендә, шул исәптән Татарстанда тәҗрибә бара. Шул уңайдан безнең район мәгариф идарәсенә дә Татарстан Республикасының Мәгариф һәм фән министрлыгыннан хат килде.
— Район мәктәпләрендә Россия күләмендәге ГТО комплексы 2014 елның 1 сентябрендә тормышка ашырыла башлады, — дип сөйли район мәгариф идарәсенең физик тәрбия буенча методисты Илшат Хәбибуллин. — Аны гамәлгә кертү буенча эш планы нигезендә 1–7 сентябрьдә ГТОны пропагандалау максатыннан төрле чаралар үткәрелде. Мәсәлән, мәктәпләрдә ГТО турында сыйныф сәгатьләрендә сөйләштеләр, төрле ярышлар, уеннар үткәрделәр һ.б.
Нәрсә өчен ГТО комплексы кире кайтарылды? Җавап гади: физик әзерлек белән халыкны сәламәтләндерү, аның гомерен озынайту. Идеясе бик әйбәт, ә менә аны барлык буын вәкилләре өчен тормышка ашыруны күзаллавы кыен. Чөнки ул һәрдаим хәрәкәтне, әзерлекне таләп итә, 2017 елдан ГТО 70 яшькә кадәрле барлык россиялеләр өчен кертелә. Мәктәпләрдә һәм һөнәр алу йортларында ГТОны аңлап була, ә менә өлкән буын өчен ГТО комп-лексы — монысы кызыклы. Хәер, вакыт күрсәтер.
Арчаның 5нче гимназиясе тәҗрибәле физкультура укытучысы Зөфәр Ильясов менә нәрсәләр сөйли:
— Балаларга физик тәрбия бирү буенча стажым 35 елдан артып китте. ГТО Совет чорында бар иде. Союз белән бетте. Узган уку елында район күләмендә балалар ГТО нормаларын тапшырды. Бу үзенә күрә тәҗрибә иде. Соңгы кыңгырау көнне укучыларга норматив нәти-җәләре буенча значоклар бирдек. Күңелле булды. Быел менә Россия күләмендәгесе гамәлгә керде. Нормативлар кайтмады әле.
— Сентябрь башыннан ГТО комплексы белән укучыларны һәм әти–әниләр-не таныштырдык, — дип сөйли Курса–Почмак мәктәбе җитәкчесенең тәрбия эшләре буенча урынбасары Ләйсән Шакирова. — Мәктәп буенча эшлекле план төзелде, җаваплы кешеләр билге-ләнде.
Курса–Почмак мәктәбендә 2 сентябрьдә көзге кросс үткәрелде. 3 сентябрьдә укытучы Ләйлә Хәсәнова 9–11 сыйныф укучылары белән эчтәлекле сыйныф сәгате үткәрде. 4 сентябрьдә Фәния Рәхимова 5–9 сыйныфлар өчен ГТОга багышланган тәкъдир итү чарасы уздырды. 5 сентябрьдә Хәлил Хәсәнов күңелле стартлар оештырды.
Физкультура укытучысы Хәлил Хәсәнов белән сөйләшәбез.
— Мин ГТОның кире кайтуына бик сөендем, — дип сөйли ул. — Физкультура дәресләренең бәясен, дәрәҗәсен күтәрә ул. Гомумән алганда, балалар, ата–аналар арасында, әй, физкультура дәресе генә ич ул, дигән җиңел караш бар, ул бетәр, дип уйлыйм. Элек физик тәрбия сәгатьләре атнага ике сәгать кенә иде. Хәзер — 3 сәгать. ГТО барлык балаларны да тигезли. Чөнки һәркайсына ГТО нормаларын тапшырырга туры киләчәк. Узган ел ГТОны тапшырган 28 баланың яртысына алтын значок, 16сына көмеш значок бирелде. Бу балаларны спортка тарта.
Арчаның 7нче мәктәбе укытучысы Булат Гәрәев ГТО комплексы турында болай ди:
— ГТО нормаларын тапшыру ул балада “эшли аламмы мин моны, булдыра аламмы?” дигән кызыксыну уята. Укучылар өйдә, секцияләрдә шөгыльләнеп, физкультура дәрес-ләрендә тырышып, ГТО тапшырырга үзен әзерләр дип уйлыйм.
Румия НАДРШИНА