Кырлай яңа үрләр яулый

Кырлай яңа үрләр яулый
17 сентябрьдә Татарстан Республикасы Президенты Рөстәм Миңнеханов Арча районында булды. Аны ТР Премьер–министр урынбасары, авыл хуҗалыгы һәм азык–төлек министры Марат Әхмәтов озата килде. Аларны муниципаль район башлыгы Алмас Назиров каршы алды.
Рөстәм Миңнеханов “Кырлай” ширкәтендә бәрәңге игү, саклау технологиясе белән кызыксынды. Әлеге ширкәт республикада икенче икмәкне үстерү буенча төп хуҗалыкларның берсенә әверелеп бара. Быел сугарулы мәйданнарда 600 гектарда үстерелде. Бер гектардан 400 центнердан артык уңыш алалар.
Бәрәңге алу тулысынча механикалаштырылган, комбайннар тәүлек буе эшли. Президент быел кайткан комбайнның эшен кызыксынып карады. Әлеге комбайн сабакны урып бара, сәгатенә 2–3 гектар бәрәңге ала. Анда бары тик бер генә кеше эшли, элеккеге дүрт комбайнны алыштыра.
Басуда урнаштырылган стендта районның үсешен чагылдырган саннар күрсәтелгән иде. Шунда ук игелә торган культуралар үрнәкләре куелган. “Татмелиорация” компаниясе генераль директоры Әнвәр Залаков сугарулы мәйданнарны арттыру буенча башкарыла торган эшләр турында сөйләде. Арча районында мондый җирләр алдагы елларда 2 мең гектардан артып китәчәк.
Район авыл хуҗалыгы һәм азык–төлек идарәсе җитәкчесе Айдар Габбасов районның төп җитештерү һәм икътисади күрсәткечләре белән таныштырды. Районның 122,7 мең гектар сөрүлек җирләре бар. Шуның 50,6 процентын “Арча” ширкәте, 15,1 процентын “Сервис–агро” ширкәте били. Арча ширкәтенә 2013 елда районның барлык акча кеременең 32,9 проценты, ә “Сервис–агро” шир-кәтенә 23, 4 проценты туры килде.
— Менә резервлар кайда! — диде авыл хуҗалыгы һәм азык–төлек министры Марат Әхмәтов, әлеге саннарга күрсәтеп. — “Арча” ширкәте сөт буенча да артта. — “Вамин”ның “Просто молоко”га кергән хуҗалыклары күпкә узып киттте сезне.
— “Сервис–агро” ширкәтенең күрсәткечләре киләчәктә тагын да үсәчәк әле, — диде Президент.
Әйе, моның өчен ныклы нигез салына. Киләсе елда 1 мең гектардагы бәрәңгене сугарып үстерәчәкләр. Иске Кырлай авылы янында тагын бер буа төзелә. Бәрәңге игү өчен кирәкле барлык техника кайтарылган, басуда аларны да күрергә мөмкин иде. Президентка буразна ясый торганын эшләтеп тә күрсәттеләр.
Рөстәм Миңнеханов Яңа Иябаш авылында бәрәңге, яшелчә складларын да карады. Биредә бар да автоматлаштырылган, компьютерлаштырылган. Киләчәктә монда 20 мең тоннага якын бәрәңге, яшелчә саклап булачак. Бәрәңге, чөгендер, кишерне юдырып, төреп кибетләргә озаталар.
Ильяс ФӘТТАХОВ