Экстремизмга — юк, дибез

Экстремизмга — юк, дибез
Арча үзәк китапханәсе хезмәткәрләре даими рәвештә кызыклы, мавыктыргыч, дөньяны танып белүгә ярдәм итәрлек чаралар оештырып килә. Өлкәннәр, яшьләр, балалар, укучылар өчен ул чын мәгънәсендә икенче мәктәп, дисәк тә ялгышмабыз. Узган атнада гына да биредә “Экстремизмга — юк” дигән исем астында үткәрелгән республика айлыгы уңаеннан “Экстремизм җәмәгатьчелеккә яный” исемле түгәрәк өстәл артында очрашу булды. Анда Арча беренче урта мәктәбенең 10А сыйныф укучылары катнашты.
Китапханәче Миләүшә Кәлимуллина экстремизм һәм аңа каршы көрәш юллары турында аңлаешлы, үтемле итеп сөйләде, анда яшьләрнең нинди роль уйнавы турында әйтеп үтте.
— Яшьләр экстремизмы аеруча аяусыз, — диде ул. — Безгә ят карашлар, чит идеология тәэсирендә алар бик тиз ялгыш юлдан китәргә мөмкин. Нацистлар, неофашистлар каян килеп чыккан, дисез? Шуңа мәктәп елларында ук егетләр һәм кызларга дөрес юлны күрсәтергә, бер-берсенә, кешеләргә карата ихтирам, дустанә мөнәсәбәт тәрбияләргә кирәк. Һәр кешенең яхшы гына түгел, начар яклары да бар. Берәү дә идеаль түгел. Тик син начар, дип кабатлап тору, чыннан да, аннан начар кеше ясавы мөмкин. Ә менә яхшы якларына ныграк басым ясаганда аннан чын шәхес тәрбияләргә була. Шуңа мөмкин булганча бер-беребезнең яхшы якларын күбрәк күрергә кирәк.
Яшьләрне ныклы характерлы, төпле фикерле итеп тәрбияләүдә бу алымның зур роль уйнавына басым ясады китапханәче. Түгәрәк өстәл артында очрашучыларга да төрле юллар белән шуны җиткерергә тырышты. Егетләр һәм кызларга хыялланырга мөмкинлек бирде, уеннар оештырды, кыскасы, берсен дә тик тотмады. “Тылсымлы кул” уенында балалар үз кулларын чиста кәгазь битенә төшерде, бармакларына үзләренең яхшы, уч төбенә начар сыйфатларын язды. “Менә шул уч төбегездәге сезгә һәрчак аяк чалган начар ягыгызны җиңеп яшәргә тырышырга кирәк”, — дип нәтиҗә ясады соңыннан Миләүшә Кәлимуллина.
Икенче уенда һәр укучы сыйныфташлары арасында кайсы ягы белән булса да охшаш кешене тапты.
Башка шундый кызыклы уеннар да егетләр һәм кызларга үзләренең индивидуаль һәм кабатланмас шәхесләр булуын исбатлады.
— Күрәсезме, һәрберебез кай ягыбыз беләндер бер-беребезгә ошаган. Чөнки без барыбыз да кешеләр. Әмма аермабыз да бар. Милләтебез, характерларыбыз, диннәребез, карашларыбыз һәм башка якларыбыз белән аерылабыз, — диде Миләүшә Кәлимуллина. — Барыбыз да бер төсле үк булсак, тормыштан ямь табылмас иде. Төрле булуыбыз белән бер-беребез өчен кызыклы без. Шуңа һәр кеше дус, тату яшәргә тиеш. Толерантлык безне берләштерсен, үзара мөнә-сәбәтләребезне ныгытсын, ят карашларга, чит идеологиягә күңелләргә үтеп керергә ирек бирмәсен.
Түгәрәк өстәл артында очрашып сөйләшүдән укучылар канәгать калды.
— Яшьләрнең аңын томалаучы, бер гаепсез кешеләр үлеменә китерүче идеологик карашларга юл куймаска иде. Террорчыларны без аңламыйбыз һәм аңларга да те-ләмибез, — диделәр соңыннан укучылар. — Һәм шуңа “экстремизмга — юк”, дибез.
Гөлсинә ЗӘКИЕВА