Мин, син, без, ул — сәламәт ил

Мин, син, без, ул — сәламәт ил
“Наркотикларга каршы мәдәният һәм спорт” массакүләм марафоны старт алды. Бу уңайдан Арча станциясендәге мәдәни–спорт үзәге “Сәламәт буын — көчле ил” республика бәйгесе кысаларында “Яшьләр сәламәтлекне сайлый” дип исемләнгән спорт бәйрәме оештырды.
Чара үзәк мәйданда башланып китте. Анда Арча мәктәпләре укучылары, урта һөнәри белем бирү учреждениеләре студентлары, китапханә хезмәткәрләре катнашты. Кулларында “Мин юк дип әйтәм!”, “Без сәламәт яшәү рәвеше өчен!”, “Бөек илгә —сәламәт яшьләр!”, “Син юк дип әйтә аласың!” дигән һәм башка төрле эчтәлек-тәге плакатлар иде. Спорт бәйрәмен Арча шәһәре башкарма комитеты җитәкчесе Рафил Исмәгыйлев башлап җибәрде.
— Яшьләр, әхлакый һәм физик яктан үсегез, ныгыгыз, наркотиклар белән дуслашмагыз. Безнең район наркотиклардан азат булсын, — диде ул марафонда катнашучыларга мөрәҗәгать итеп.
— Алкоголь белән артык “дуслашып” киткән 300гә якын кеше бездә исәптә тора. Кызганыч, районда наркотиклар белән шаяручылар да бар. Сезгә теләгем шул: тормышның кадерен белеп яшәгез, рәхәтен күрегез, яшьлегегезне “утлы табага” салмагыз, — диде Арча үзәк хастаханәсенең табиб–наркологы Рөстәм Әхмәтҗанов.
Сүзне “Бердәм Россия” сәяси партиясе Арча җирле бүлекчәсенең “Яшь гвардиячеләре” алды. Сәламәт яшәү рәвешен пропагандалауга багышланган чыгышларыннан соң кызлар һәм егетләр марафонда катнашучыларның барысына да шушы темага багышланган дисклар, тынычлык һәм изгелекне чагылдырган тасмалар өләштеләр.
Бәйрәмдә катнашучыларга да үз сүзләрен әйтергә, фикерләрен җиткерергә мөмкинлек бирелде. Чараны оештыручы һәм алып баручы Арча станциясенең мәдәни–спорт үзәге сәнгать җитәкчесе Илмира Фазылҗанова аларга сораулар бирде. Китапханәчеләрдән ул бу юнәлештә нинди максатчан эш алып барулары белән кызыксынды. Бу сорауга җавап итеп китапханәче Миләүшә Кәлимуллина Арча үзәк китапханәсендә үткәрелгән чаралар турында җентекләп сөйләде.
— Сәламәтлекне ныгыту, саклау — тормышыбызның төп байлыгы да ул. Ә моның өчен спорт белән шөгыльләнергә, сәламәтлеккә зыян салучы начар гадәтләрдән азат булырга, бер–беребезгә ярдәм итеп яшәргә кирәк. “Наркотикларга — юк!” дип әйтә алу моңа беренче адым, — диде социаль белем бирү академиясенең өченче курс студенты Инсаф Мөхәммәтгалиев. Яшьләрдән шундый мәгънәле сүзләр ишетү үзе үк киләчәккә өмет уята.
“Яшьләр сәламәтлекне сайлый” дигән спорт бәйрәменең беренче өлеше Арча педагогика көллияте студентлары катнашында флеш–моб белән тәмамланды. Аннан ул Арча станциясендәге мәдәни–спорт үзәгендә дәвам итте. Анда тамашачыларны Россия һәм Татарстан флаглары белән ролерлар каршы алды. Фойеда беренче номерлы Арча шәһәр китапханәсе җитәкчесе Любовь Капралова көче белән бай эчтәлекле күргәзмә оештырылган иде. Шулай ук ул бәйрәмгә килүчеләргә начар гадәтләрдән азат булу кагыйдә-ләрен туплаган китапчыклар да өләште.
Аннан бар да залга күчте. “Арча” балалар–яшүсмерләр спорт мәктәбендә тәрбияләнүчеләрдән тренер Газинур Борһановның тхэквондочылары, Фәнис Зарипов кул астында милли көрәш белән шөгыльләнүчеләр, Мөдәррис Мөхәммәдиевның герчеләре һәм Ирек Шакировның хоккейчылары, Җәүдәт Хәсәновның баскетболчылары күрсәтмә чыгышлары алкышлар астында үтте. Алардан эстафетаны Арча педагогика көллияте студентлары һәм Курса–Почмак мәктәбенең югары сыйныф укучылары алды һәм спорт ярышлары башланды.
— Сез аларның футболкаларына гына игътибар итегез, — диде Илмира Фазылҗанова, — “Мин эчмим һәм тартмыйм” дигән Россия логотибы белән эшләнгән алар.
Димәк, безнең егетләр һәм кызларыбызның берсе генә шуның кадәр кешене сәламәт яшәргә өндәгән очракта да, күпме изгелек кыла, дигән сүз.
Спорт уеннары берсеннән–берсе кызыклы иде. Йөгерделәр, сикерделәр, егылдылар, тагын торып киттеләр, гер күтәрделәр, дротиклар белән аттылар... Ике команда да җиңү хисе белән янды. Башта Курса–Почмак командасы алга чыкты, аннан педагогика көллияте студентлары очколарны тигезләде, тик җиңү шатлыгын барыбер Курса–Почмак командасы татыды. Икесе дә бүләксез калмады.
Монда хикмәт бүләктә түгел, ә яшь спортчыларның сәламәт яшәү рәвешен пропагандалауга керткән өлешләрендә. Кызыклы да, үтемле дә. Соңыннан укучылар тәкъдим иткән сәхнә күренеше моны тагын да тулыландырды.
Лилия ФӘТТАХОВА,
Арчаның икенче мәктәбе укытучысы