“Татарстан кроссы – 2014”

“Татарстан кроссы – 2014”
21 сентябрьдә Арча үзәк стадионында “Татарстан кроссы – 2014” үткәрелде. Анда Арча муниципаль район башкарма комитеты җитәкчесе вазыйфаларын башкаручы Илшат Нуриев тәбрикләү сүзе белән чыкты.
— Бүген җиңелүчеләр булмаячак, иң мөһиме — катнашу, — диде ул.
Кросста теләге булган һәркем катнашты. Кеше бик күп иде. Баш хөкемдар Арча педагогика көллияте физик тәрбия укытучысы Бари Бакиров булды.
Ярышларны башлангыч сыйныф укучылары башлады. Җитәкчеләр арасында да җиңүчеләр булды. Иске Кырлай мәктәбе җитәкчесе Хәйсәр Гыйләҗиев 35–50 яшьлекләр арасында 2 км. ярышта финишка икенче килде!
Иске Чүриле җирле үзидарә башлыгы Гөлнара Заһидуллина: “Бассейнга йөрим, — ди. — Җитәкчеләр ярышында катнашмый калган юк. Кыен түгел. Киресенчә, спорттан күңел күтәренкелеге алам”. Арча үзәкләштерелгән китапханәләр системасы житәкчесе Лилия Фазылова үзенең коллективы өчен шулкадәр янып–көеп йөрде, яннарыннан бер дә китмәде. Ерак авыллардан да китапханәчеләр кросска килгән иде.
Арчаның 7нче мәктәбе җитәкчесе Альмира Гатауллина кросста чордашлары белән бергә йөгерми каламы соң, әлбәттә, юк. “Иң мөһиме — кроссны башкалар белән бергә үтү, — ди ул. — Хәрәкәттә — бәрәкәт!”
50 яшьтән, 60 яшьтән узганнарның кросс бирүләрен җанатарлар зур кызыксыну белән карады. Арчада яшәүче педагог, ике спортчы егет тәрбияләп үстергән (Айрат һәм Булат Гәрәевлар) 65 яшьлек Руфина Гәрәева:
— Мондый массакүләм спорт чараларыннан читтә калырга йөрәк түзми, — ди. — Ветераннар командасында республика күләмендәге ярышларда да катнашам әле мин. Быел майда үткәрелгәнендә 3нче урынны алдык.
Руфина ханым гәүдә авырлыгын күпләр кызыгырлык дәрәҗәдә тота. Сере — тик тормау, хәрәкәт!
Башына ак яулык бәйләгән 52 яшьлек Фирая Вәлишина белән сөйләшәбез.
— Ташкичү мәктәбендә пешекче булып эшлим, — дип сөйли. — Нинди күңелле бит монда! Көне дә кояшлы, матур. Кеше белән аралашуы ни тора. 400 метр араны йөгереп үтмәскә әле! Тик торырга яратмыйм. Кышын чаңгыда да йөрим.
60 яшькә кадәрле чордашлары арасында 400 метр араны беренче булып үткән Лесхоз мәктәбе башлангыч сыйныф укытучысы Дания Фәхриева:
— Өченче көнне көтүдә идем, шуның файдасы булдымы, бүген рәхәтләнеп йөгердем. Хәер, мин гел җәяү йөреп торам. Мал–туар тотабыз. Тик торган юк. Сабантуйларда капчык киеп йөгерүдә мин беренче инде...
Район үзәк хастаханәсе йөгерүчеләре махсус спорт киемнәреннән иде. Коллективның үз костюмнары булуы отышлы. Әллә каян “Мин!” дип күренеп торалар.
— Хәзер миңа 43 яшь, — ди Кәче мәктәбе физкультура укытучысы, узган елгы кросста беренче урынны алган Хәйдәр Зәйнуллин. — 35 яшьтән 50 яшькәчә ир–егетләр белән йөгерәчәкмен. Кая ул 35 яшьтәгеләр белән сынашу?! Беренчелекне алып булмас... Максатым җиңү үзе!
Тәки Хәйдәр беренче килде бит! Афәрин! Аннан да өлкәнрәк Курса– Почмак мәктәбе физкультура укытучысы Хәлил Хәсәнов та җитез, ул да призлы урынны алды.
50 яшькәчә хатын-кызлар арасында 400 метрга кросс бирүчеләр арасында Арча станциясендәге мәдәни–спорт үзәгенең сәнгать җитәкчесе Илмира Фазылҗанованың йөгерүенә сокланып карап тордым. Үз төркемендә икенче булып финиш бирде ул. “Файдасы бардыр, гел йөреп торабыз бит”, — ди.
35 яшькәчә хатын–кызлар арасында 1нче, 2нче, 3нче урыннарны алган кызлар Энҗе Гыйззәтова, Энҗе Һидиятова, Айзилә Галимуллина бертавыштан:
— Без барыбыз да Бари Каюмовичта тәрбияләнгән спортчылар, — диделәр.
...Кросс тәмам. Алда яңалары көтә. Спортны үзеңә иптәш итеп алсаң, гел хәрәкәттә булсаң, әлбәттә, сәламәт булачаксың, ярышлар да куркытмаячак. ГТОның кире кайтуы да шуны күздә тота.
Румия НАДРШИНА