Арчада яңа җитәкче

Арчада яңа җитәкче
19 сентябрьдә икенче чакырылыш Арча район Советының чираттан тыш 40нчы утырышы булды. Аны Арча муниципаль район башлыгы Алмас Назиров ачты.
Утырышта Татарстан Республикасы Дәүләт Советы Рәисе Фәрит Мөхәммәтшин, Татарстан Республикасы Президенты аппараты җитәкчесе урынбасары — Татарстан Республикасы Президентының территорияләр белән эшләү буенча Идарәсе җитәкчесе Илнур Гарипов катнашты.
Депутатлар беренче көн тәртибе буенча Арча муниципаль районы башкарма комитеты структурасына үзгәрешләр керттеләр, Илшат Галимуллинның Арча муниципаль районы башкарма комитеты җитәкчесе вәкаләтләрен срогыннан алда туктату турындагы гаризасын канәгатьләндерделәр.
Татарстан Республикасы Президенты Указы белән Алмас Назиров Татарстан Республикасы урман хуҗалыгы министры итеп билгеләнде. Шуңа бәйле рәвештә ул утырыш карамагына Арча муниципаль районы башлыгы вазифаларыннан азат итү, район Советы депутаты вәкаләтләрен төшерү турында гариза кертте. Депутатлар аның гаризасын канәгатьләндерделәр.
Аннан соң сүз Татарстан Республикасы Дәүләт Советы Рәисе Фәрит Мөхәммәтшинга бирелде.
Дәүләт Советы Рәисе 14 сентябрьдә булган сайлауларның оешкан төстә үтүен, “Бердәм Россия” партиясенең зур өстенлек белән җиңүенә арчалыларның лаеклы өлеш кертүләрен әйтеп үтте.
— Республиканың урман хуҗалыгы министры вазыйфаларына Алмас Әминовичтан да әйбәтрәк кандидат тапмадык, — диде ул. — Иң беренчесе — ул бу өлкәдә яхшы белгеч, урман хуҗалыгында да башкарасы күп эшләр көтә. Аннан ундүрт елга якын тынгысыз вазыйфа башкарды. Арча шәһәрен, районны үстерүгә зур өлеш кертте. Республика программаларын тормышка ашыруда Арча районы иң алда баручылар арасында. Ике контурлы газ казаннарын Арча районы 2011 елда ук урнаштырып бетерде, күп районнар бу эшләрне башлады гына. Район үзәге, шәһәр танымаслык булып үзгәрде. Күрәсе килмәгән кеше күрми инде ул. Мин Алмас Әминович үзенең үҗәтлеге, нык торучанлыгы, максатка омтылучанлыгы белән ра-йонны алга алып барды дип саныйм.
— Тормыш дәвам итә, — диде Алмас Назиров, сүз алып. — Аңлашып, бердәм булып эшләгән кешеләргә зур рәхмәт. Үземнән соң матур, төзек район кала. Уңышларны югалтмыйча, тагын да баетып эшләргә язсын.
Фәрит Мөхәммәтшин Алмас Назировка “Татарстан Республикасында җирле үзидарәне үстерүдәге хезмәтләре өчен” медале тапшырды. Ул шулай ук моңа кадәр район башкарма комитеты җитәкчесе булып эшләгән Илшат Галимуллинның да эшчәнлеген уңай бәяләде, аңа ТР Президентының Рәхмәт хатын тапшырды.
— Аның тәҗрибәсе, эшкә осталыгы моннан соң да кирәк булыр дип ышанам, — диде Ф.Мөхәммәтшин.
Илшат Галимуллин моннан соң район башкарма комитеты җитәкчесе урынбасары булып эшләячәк.
— Сезнең районга яңа җитәкчене читтән эзләргә теләмәдек, — диде Фәрит Мөхәммәтшин. — Илшат Габделфәрт улы Апаз авылында туган, нык ихтыярлы, көчле җитәкче, эшкә җаваплылык белән карый торган кеше.
Депутатлар бертавыштан Арча муниципаль районы башкарма комитеты җитәкчесе вазыйфаларын Нуриев Илшат Габделфәрт улына йөкләү турында карар кабул иттеләр.
Илшат Нуриев ышаныч күрсәткәннәре өчен республика Президенты Рөстәм Миңнехановка, депутатларга рәхмәт әйтте.
— Моңа кадәр ирешелгәннәрне югалтмыйча, алга куелган бурычларны үтәр-лек итеп эшләрбез дип ышанам, — диде ул. — Дөрес итеп эшләгән кешегә борчылырлык урын юк. Мәсьәләләр бар. Бергә–бергә, матур итеп эшләрбез дип өметләнәм.
Ильяс ФӘТТАХОВ