13 капчык катнаш азык урлаган

13 капчык катнаш азык урлаган
Җинаять эше материалларыннан күренгәнчә, 2014 елның 17 августында кич белән Мари Иле кешесе Вячеслав Архипов үзенең танышыннан Арча районына барып кайтырга сорый. Янәсе, Түбән Оры авылында сатып алынган катнаш азык тутырылган капчыкларны барып аласы бар. Танышы риза була.
Шул ук көнне кич белән В. Архипов танышы белән автомобильдә Түбән Оры авылының амбарына килә. Машинадан төшеп, танышына көтеп торырга кушып, складлар ягына таба китә. В. Архипов ашлык урлау максаты белән килгән була. Карак ашлык складының беркем тарафыннан да сакланмавын белә. Ул, складка үтеп кереп, аннан 20 минут эчендә 13 капчык катнаш азык алып чыга. Зыян 16 мең сумнан артып китә.
Урланган азык ике рейс белән каракның әти–әнисенә китерелә.
Тикшерү вакытында урланган катнаш азык табылды һәм “Вамин– Мәрҗани агрофирмасы”на кире кайтарылды.
Суд хөкем чыгарганда В. Архиповның үз гаебен тулысынча тануын, элек хөкем ителмәвен, яшәү һәм эш урыныннан канәгатьләнерлек характеристика бире-лүен, балигъ яшенә җитмәгән баласы булуын исәпкә ала. Аңа 8 мең сум штраф салына.
Моннан тыш тикшерү нәтиҗәләре буенча “Вамин–Мәрҗани агрофирмасы” җитәкчесенә объектларны ныгыту буенча чаралар күрелүе турында күрсәтмә бирелә.
Радик ХӘБИБУЛЛИН
прокурор ярдәмчесе,
юстиция киңәшчесе