Менә шундый җитәкче

Менә шундый җитәкче
Депутатлар сайланган вакытта гына бик юмарт була, матур вәгъдәләр яудыра да, сайлангач, юкка чыга, дигән фикер яши. Дөресен әйткәндә, аның күбесенең вәгъдәдән башка бирер әйбере дә булмый. Бу яктан Мөндеш халкы бәхетле.
— Бөтен авыл Динар Илдар улы исән–имин эшли генә күрсен дип тели, — ди Иске Кырлай авыл җирлеге башлыгы Фәргать Сираҗетдинов. — Быел гына да авылга 30 мең сумлык трансформатор куйдырды, Сабантуйга ел саен акча бирә, күпме кешене эшле итте.
Мөндеш халкы рәхмәтләр укып туя алмаган район Советы депутаты Динар Төхвәтуллин тумышы белән бу авыл кешесе дә түгел үзе. Шушы авыл халкын бәхетле итәргә язган аңа.
Моннан ярты гасыр элек Наласа авылында Флера һәм Илдар Төхвәтуллиннар гаиләсендә беренче бала булып дөньяга килә ул. Әтисе колхозның тырыш механизаторы, әнисе мәктәптә пионервожатый, соңрак мәдәният йорты директоры була. Динар мәктәптә бишле билгеләренә генә укый. Чаңгы ярышларында районнан алдынгы урыннарны яулап кайта. Шул ярышларның берсендә педучилищеның физкультура укытучысы аны үзләренә укырга чакыра. Анда укыганда да спорт белән ныклап шөгыльләнә, чаңгы спорты буенча беренче разрядны үти.
Педагогия училищесын тәмамлаган елны Казан дәүләт педагогика институтына читтән торып укырга керә. Шул ук елда армиягә алына, ГДРда хезмәт итә.
Армиядән кайткач, егетне район комсомол оешмасына эшкә чакыралар. “Күн туп”, “Алтын алка” һ.б. балалар арасында уза торган ярышларны оештырып йөри. 1989 елда район комсомол оешмасының беренче секретаре итеп сайлана. Илдә зур үзгәрешләр барган, элекке җәмгыять сүтелә башлаган, яңасы нинди буласын беркем дә күз алдына китерә алмаган еллар бу. Комсомол да яшәүдән туктый, аның урынына яшьләр оешмасы төзеп тә маташалар әле.
Динар Төхвәтуллин 1991 елдан 1996 елга кадәр районның “Сельхозхимия” оешмасында тәэминатчы булып эшли. Районда гектарына бер тоннага кадәр ашлама кертелгән вакытлар бу.
— Россия буйлап күп йөрергә туры килде, — ди ул. — Ашламаны кайдан гына ташымадык.
1996 елдан эшмәкәрлек белән шөгыльләнә башлый. 2004 елда таралу алдында торган “Сельхозтехника”ның Мөндеш бүлекчәсен сатып алгач, бу эшкә чын–чынлап тотына. Бүлекчәнең кешеләре китеп беткән, булган әйбере тарала башлаган. Үзенә ярдәмгә энеләре Дамир белән Ирекне дә чакыра. Өчесе дә таза бәдәнле, киң күкрәкле, Наласаларга хас булганча, тәвәккәл егетләр.
Быел менә шушы эшкә тотынуларына ун ел тулуны Мөндештә зурлап Сабантуй үткәрү белән билгеләп үттеләр. Коллектив белән Яңа ел алдыннан Арчада өстәл чәе артына җыелу традицияләре дә бар. Йөздән артык кеше алар хәзер. Бөтен республикага терлек тораклары төзеп, җиһазлап бирәләр. Безнең районда гына да өч һәм аннан күбрәк сыер асраучы 300дән артык шәхси хуҗалыкны саву аппаратлары белән тәэмин иттеләр. Республика буйлап ундүрт бригадалары эшли.
Кешегә кадер зур биредә. Әйбәт хезмәт хакын вакытында алалар. Терлек асраучылар печән, салам, фураж белән тәэмин ителә. Вахта автобусы йөреп тора, үз машинасы белән эшкә йөрүчеләргә бензин бирәләр, хуҗалыкларда эшләүчеләрне көнгә ике тапкыр бушка ашаталар.
Машина, төзү материаллары алырга теләгән, гомумән, акча кирәк булган кешегә анысын да процентсыз биреп торалар. Хезмәт хакыңнан әкренләп түлисең. Элек эшләп чыккан утызлап ветеран Өлкәннәр көнендә бүләген ала. Динар Төхвәтуллин илле яшьлек юбилеен менә шулай кешеләргә шатлык китереп, игелекләр кылып каршылый. Мондый җитәкче булу аның кул астында эшләүчеләр өчен дә бәхет.
Ильяс ФӘТТАХОВ